2 SAMUELA 11 - Mara Bible RV (BSI)

Dâvi nata Bâsebâ

¹ Beizy hrâ ama sie tyhna châhvâ daihti liata, Dâvi ta Zôabâ cha, a chakaotuhpazy nata Izarei pheisaih zydua chhaota hrâsie awpa ta tuah ta. Amawna mo cha chho ei ta, ama khihpi Râbâ cha dôh ei ta. Dâvi deikua cha Zerusale liata y thlâh ha ta.

² Noh kha cha zâlâ nohtla chy ta Dâvi cha a rakhô tawhta thyu ta, abei o vâphuh liata a hlaihlâ ta, vâphuh tawhta chanô pakha a ngai a si ngâpa za hmô ta, cha chanô cha a chhithai ngaitapa châ ta.

³ Dâvi ta chyhsa tuah ta, cha chanô thâtih cha pahiahrisa ta. Chyhsa pakha ta, “Eliami sawchanô Bâsebâ, Hiti chyhsa Uria la­pinô a châ,” tah ta.

⁴ Dâvi ta chyhsa tuah ta, a vaw chhi ei ta, a vaw tlô nahta a ziakhei ta. Chanô cha a thaitlyh leina tawhta a pathai hapa châ ta. Dâvi ta â ziakhei khai tawhta Bâsebâ cha a o la a di ha ta.

⁵ Chanô cha saw phaoh ta, Dâvi hnohta chyhsa tuah ta, “Saw na ei phao haw,” tahpa ta pachhosa ta.

⁶ Dâvi ta Zôabâ cha bieta ta, “Hiti chyhsa Uria kha kei lâ vaw pavysa teh,” tah ta. Zôabâ ta Uria cha Dâvi lâ pasiesa ta.

⁷ Uria cha Dâvi kô a kei tlô nahta, Dâvi ta Zôabâ nata pheisaihzy thâtih nata adyuhna hmasiena thâtihzy hiahri ta.

⁸ Dâvi ta Uria hnohta, “O lâ a di la, na pheizy a zâ si teh,” tah ta. Uria cha abei o tawhta pua ta, abei tawhta kuhria ta ano cha pazi ta.

⁹ Châhrasala Uria cha o lâ a di leipa ta, a zibeipa chakaotuhpazy hnohta abei ochhi thaby liata a rie ta.

¹⁰ Dâvi hnohta, “Uria cha a o lâ a di vei,” tahpa ama chho nahta, Dâvi ta Uria hnohta, “Khitlyna lâ tawhta vaw tlô va chi ma? Khazia na o lâ nâ di vei?” tah ta.

¹¹ Uria ta Dâvi hnohta, “Byh nata Izarei nata Zudâh zy byureih liata y ei ta, ei zibeipa Zôabâ nata ei zibeipa chakaotuhpazy chhao lyurâhpa liata a rie ei ta. Cha nota kheihta ma kei cha ei o lâ a dipa ta, niepa ta doh sah la, ei lapinô ei ziakhei thei aw? Na hrona nata na thlahpa hrona reipa ta ei reih, cha hawhpa hmo cha tao beih aw va na,” tah ta.

¹² Dâvi ta Uria hnohta, “Tanoh cha he liata châh chy la, mylâ sie lah vâ chi,” tah ta. Chatanachata Uria cha cha noh nata a mylâpa chhao Zerusale liata châh ta.

¹³ Dâvi ta Uria cha aw ta, Dâvi hmiakô liata nie ta, doh ta, a pari ngâna taihta padosa ta. Zâ a vaw châ nahta, a o lâ a di leipa ta a zibeipa chakaotuhpazy hry liata a rakhô liata a zia ha heih ta.

¹⁴ A mylâ my ta Dâvi cha Zôabâ lâ châ roh ta, Uria ku liata paphao ta.

¹⁵ Châ liata, “Adyuhna ru chaina liata Uria he hmia vaw pasah u la, a vaw dyuh aw ei ta a thi hana hâh ta, a sysai ha muh vy,” tahpa ta roh ta.

¹⁶ Zôabâ ta khihpi a dôh hai nota, Uria cha pasaiphazy yna ta a pahnona su daih lâ pachhâh ta.

¹⁷ Khihpi chyhsazy vaw pua ei ta, Zôabâ cha a dyuh ei ta, Dâvi chakaotuhpazy hry liata chyhsa khazie tlyma thi ei ta, Hiti chyhsa Uria chhao cha thi ha hra ta.

¹⁸ Zôabâ ta Dâvi lâ chyhsa tuah ta, adyuhna thâtih zydua chho ta.

¹⁹ Zikyurâtuhpa hnohta, “Adyuhna kyh zydua na chho khai tawhta,

²⁰ abei cha a hie vaw hâh sala, na hnohta, ‘Khazia khihpi cha cha tlu ta a hniapa ta namâ kei dyuh? Thokhy tawhta ama cha vaw ka aw tahpa pahno veih ei chi ma?

²¹ Zerubese sawchapawpa Abimele kha ahy ta ma a thie? Chanô ta sâh chariehna alô a chô lâtapa thokhy tawhta za pathla thlu ta, Thebe liata a thi hapa kha châ vei ma? Khazia thokhy namâ kei hnia?’ a tah khiahta cha, ‘Châ chakaotuhpa Hiti chyhsa Uria chhao kha a thi haw,’ na tah aw,” tah ta.

²² Zikyurâtuhpa cha sie ta, kei tlô ta, Zôabâ ta a hnohta a tuana chhâpa zydua Dâvi chho ta.

²³ Zikyurâtuhpa ta Dâvi hnohta, “Chariah pheisaihzy ta miah pahnie via ha ei ta, lyurâhpa lâ taihta miah puahnao ei ta, châhrasala ama thokhy chhikao taihta a chadai palie pi ta.

²⁴ Likathaipazy ta châ chakaotuhpazy cha thokhy tawhta vaw ka ei ta, bei chakaotuhpa khazie rakha ma thi ei ta, châ chakaotuhpa Hiti chyhsa Uria chhao kha a thi haw,” tah ta.

²⁵ Dâvi ta zikyurâtuhpa hnohta, “Zôabâ hnohta hetana heta kei reih mah y, ‘Cha hmo chata a ly leipa ta cha paysa khah sy. Zaozi ta pakha thie ta, mohropa chhao a thie. Khihpi nâ dyuhna liata na tha a patlô via la, khihpi cha pahnie a chhuah mah y,’ tah la, ano cha pasyu mah y,” tah ta.

²⁶ Uria lapinô ta a vahpa Uria a thi haw tahpa a thei nahta, a vahpa mâchhiesa ta.

²⁷ Mâchhiesana daihti a chhâ nahta, Dâvi ta chyhsa tuah ta, Bâsebâ cha a o lâ a chhi ta, a lapinô vaw châ ha ta. Dâvi châta sawchapaw sapa ta, châhrasala Dâvi hmotaopa ta Abeipa cha palysa leipa ta.