2 SAMUELA 10 - Mara Bible RV (BSI)

Dâvi ta Amawna mo nata Asuria mo a pahnie

¹ Cha khai tawhta Amawna bei cha thi ta, a sawchapawpa Hânu ta ano su liata a bei ta.

² Dâvi ta, “Nahâsâ sawchapawpa Hânu cha, a paw ta ei chô liata phana a palâsa tyhpa hawhta, kei chhao ta a chô liata phana ei palâsa hra aw,” tah ta. Chatanachata a paw thina kyh liata thlapalôh awpa ta, Dâvi ta Hânu lâ a chakaotuhpazy tuah ta. Dâvi chakaotuhpazy cha Amawna râh kei tlô ei ta.

³ Châhrasala Amawna beimachâzy ta ama zibeipa Hânu hnohta, “Dâvi heta na paw a zapa vâta na hnohta thlapalôhtuhpa a vaw tuapa a châ nata na pangiasa ma? Dâvi heta khihpi he chahryh ta, mohparu ta, a pahnie thei nawpa ta, a chakaotuhpazy he a vaw tuapa tlao châ vei ma?” tah ei ta.

⁴ Hânu ta Dâvi chakaotuhpazy cha patu ta, ama kâhhmi hiakha lâ ngyu ta, ama viahkaozy â khophie liata, ama chaosa dady ta tai ta, âmo cha pakuasa ha ta.

⁵ Cha kyh cha Dâvi chho ei ta, a chyhsa tuapazy ama no a za ngaitapa vâta, Dâvi cha âmo dy awpa ta chyhsa tuah ta. Abei ta, “Nama kâhhmi a seih hlâlei cha Zerikô liata vaw y chy u la, cha khai tawhta a vy lah vâ ei chi,” tah ta.

⁶ Amawna mo cha Dâvi hmia liata ama roh a chhie haw tahpa ama pahno nahta, Amawna mo ta Berô nata Zôbâ liata Aramia alei pheisaih 20,000 bieta ei ta, Mâkâ bei lâta 1,000 nata Tôbâ mo lâta 12,000 bieta hra ei ta.

⁷ Cha thâtih cha Dâvi ta a thei nahta, Zôabâ nata pheisaih riahphapa zydua tuah ta.

⁸ Amawna mo cha vaw pua ei ta, a dyuh awpa ta khihpi thokhy chhikao liata a paziah ei ta. Zôbâ nata Rehô tawhta Aramia mo nata Tôbâ mo nata Mâkâ mozy deikua cha lyurâhpa liata âmo dei ta y ei ta.

⁹ Zôabâ ta a hmia a hnôh ta amâ vaw dyuhpa a hmô nahta, Izarei pheisaih pha chaipazy a tlyh ta, Aramia mo a dyuh awpa ta âmo cha paziah ta.

¹⁰ A pheisaih hropazy cha a unawhpa Abisai ku liata soh ta, Amawna mo a dyuh awpa ta paziah ta.

¹¹ Zôabâ ta, “Ei châta Aramia mo ama tha a tlô tu ha khiahta cha, na vaw bao aw chi ta, Amawna mo cha na châta ama tha a tlô tu ha khiahta cha, a vy aw na ta, ei cha vaw bao aw.

¹² Riahphapa ta y u la, eima phopi nata Khazohpa khihpizy châta riahphapa ta y ei suh u. Abeipa ta pha a tahpa hawhta tao mawh sy,” tah ta.

¹³ Zôabâ nata a pheisaihzy cha Aramia mo a dyuh awpa ta a kei hnia ei ta, Aramia mo cha Zôabâ hmiakô liata a râpai ha ei ta.

¹⁴ Aramia mo amâ râpai hapa Amawna mo ta ama hmô nahta, âmo chhao cha Abisai hmiakô liata a râpai ei ta, khihpi liata amâ ngia haw. Chatawhcha Zôabâ cha Amawna mo adyuhna tawhta a lie ta, Zerusale lâ sie ha ta.

¹⁵ Aramia mo cha Izarei ta a pahnie hapa ei ama pahno nahta, a hmaohpakhy ei ta.

¹⁶ Hadâdeze ta Ufrâti chavah haosâ lâta a ypa Aramia mo aw awpa ta chyhsa tuah ta. Aramia mo cha Hadâdeze pheisaih hyutuhpa Sôbâ chhihthana ry liata Helâmi lâ a vy ei ta.

¹⁷ Cha thâtih cha Dâvi chho ei ta, Izarei pheisaih zydua awpakhy ta, Zawdâh chaka ei ta, Helâmi pangaipa ta sie ei ta. Aramia mo cha Dâvi a dua khâhpa ta a vaw paziah ei ta, Dâvi cha a dyuh ei ta.

¹⁸ Aramia mo cha Izarei sawzy hmiakô liata a râpai ha ei ta, Dâvi ta talailih a haohpa Aramia pheisaih 700 nata arâ pheisaih 40,000 thie ta, ama pheisaih hyutuhpa Sôbâ chhao chhawh ta, cha liata thi ha ta.

¹⁹ Hadâdeze chakaotuhpa bei zydua ta Izarei sawzy hmiakô liata pahniepa ta ama ypa ama hmô nahta, Izarei nata adyhna tao ei ta, Izarei mo chakaotuhpa ta y ha ei ta. Chavâta Aramia mo ta Amawna mo cha bao ngâh khao veih ei.