2 PITY 3 - Mara Bible RV (BSI)

Abeipa Noh

¹ Kho ngaitapa saih u, he he nama hnohta châpaphaopa ei no ei vaw rona a châ haw. A miano ta, nama pahno chiehpa pahno heih ta, nama palôh pathaihpa tha pathyu nawpa ta ei ropa a châ.

² Chatanachata hrohsopa pathaihpazy biereipa nata nama lyuhchâpazy hmâpa ta Abeipa nata Pachhatuhpa biepiepa cha namâ thei thlâh ha aw.

³ He he pahno tua awpa a byuh. Daihti chhâna nohzy liata cha, mohnaotuhpazy ta ama moleina hmo khopazy chadaipa ta, chyhsazy mohnaona chôta a vy aw ei ta,

⁴ “Â vy heihna bietai cha khataih liata a y haw? Pathlatuhzy amâ mô tawh chhao ta, hmotaopazy tao tua nota ama yzie ualua ta hmo to zydua ama y thlâh he zaw” ama tah aw.

⁵ Avâzy he Khazohpa bie ta hlâno tawhta a ypa a châzie nata alei chhao ti tawhta nata ti hry liata a vaw ypa a châzie pahno lei a pachâ raruah ei ta,

⁶ cha tizy ta cha daihti liata khizaw cha vao ta, a pahleipadia hapa kyh chhao pahno lei amâ pachâ raruah.

⁷ Châhrasala cha bie lilaw chata tahmâno ta avâ nata alei a ypazy he mei châta pachô ta, Khazohpa a uasa leipazy pachiana nata leidiana noh a tlô hlâlei â pakhei chy ei.

⁸ Kho ngaitapa saih u, he hmo miakha he my khuh vy: Abeipa pachâ ta cha, noh kha he kô sâh kha hawhta châ ta, kô sâh kha chhao noh kha hawhta a châ.

⁹ Thokha ta Abeipa cha a bietai patlôna kyh liata nainôsôpa hawhta pachâ ei ta, châhrasala a nainôsô vei. Abeipa cha nâmo châta palôh pasi ngaitapa châ ta, ahy hmah ama leidia awpa khoh leipa ta, chyhsa zydua ama ro khai awpa tlao a khoh.

¹⁰ Abeipa Noh cha parutuhpa hawhta vaw tlô aw ta, cha noh liata avâzy cha thata arôhna chôta leidia aw ei ta, avâ liata hmo a ypazy cha mei ta pakâpa ta pahleipadiapa châ aw ta, alei nata a chhôh liata a ypa zydua chhao a leidia khai aw.

¹¹ Cha hawhta hmo to zydua pahleipadia khai awpa a châpa vâta, pathaihna nata Khazohpa pachâna hro ta a hrohpa chyhsazy nama châ awpa a byuh.

¹² Cha hawhta yna chôta Khazohpa Noh cha hâ aw ei chi ta, a vaw tlô nawpa daihti nama chatliesa aw. Cha Noh a vaw tlôpa chata avâzy khi kâpa ta pahleipadia aw ta, avâ liata a ypazy cha mei ta a pazao khai aw.

¹³ Châhrasala a bietaipa hawhta, keimo la mosiapazy pahrâna avâ thiehpa nata alei thiehpa a hâtuhpazy eima châ.

Bietapa hnôhchaipazy

¹⁴ Chavâta kho ngaitapa saih u, cha hmozy a hâtuhpa nama châpa vâta, apuapa a bai leipa nata seina hnei leipa ta, thlalôhpa ta nama ypa a cha hmô thei nawpa ei ta, tiama papua teh u.

¹⁵ Eima unawh kho ngaitapa Pawla chhao ta, a hnohta sona piepa lymâ hawhta nâmo lâ châ a ropa hawhna khata, eima Beipa daotheizie he pachhana ta rao teh u.

¹⁶ A châpaphaopa zydua liata, cha biezy cha reih ta, cha hawhta a roh tyh. A bie ropazy liata thokha cha pahno ru ngaitapazy châ ei ta, chazy cha chyhsa so leipa nata a i leipazy ta, Biehrai bie hropazy ama chhopasiazie hawhta, pako pakâ ei ta, âmosasyh ta amâ pahleipadia tyh.

¹⁷ Chavâta kho ngaitapa saih u, nâmo la, cha bie cha nama pahno hapa vâta a vaih teh u. Chataleipatala ryhpa papeisaleituhpazy paraona liata a chhipa châ aw ei chi ta, nama duahmo a ipa nama paosai pathlei aw.

¹⁸ Eima Beipa nata Pachhatuhpa Zisu Krista ngiachhiena nata pahnona liata laiseih lymâ teh u. Tahmâ nata chhâzaw ta Abeipa hnohta rônahna y mawh sy. Amen.