2 PITY 2 - Mara Bible RV (BSI)

Hrohsopa nata pachutuhpa pakheipazy

¹ Chyhsazy hry liata hrohso pakheipazy ama vaw pua tyhpa hawhta, pachutuh pakheipazy chhao nama hry liata ama vaw pua aw. Âmo chatlaituhpa Abeipa tlai cha a paphasaipa ta, chyhsa a parao theipa pachuna do leipazy arulâta a vaw ngiakhei aw ei ta, âmosasyh ta ama chô liata raona thlai ama patlôsa aw.

² Ama hrozie nozachhihpa cha chyhsa hluhpi ta a mopâ aw ei ta, âmo vâta biehmeiseihpa lâpi reipachhiepa a châ aw.

³ Sôh tlaichhaina vâta haipa biezy reih aw ei ta, sôhpalie nawpa ta ama cha hmâh aw. Ama thaileichâna cha hlâno tawhta y chakhyh thlâh ha leipa ta, ama leidiana chhao a mô vei.

⁴ Vâlyuhchâpazy moleina hmo ama tao nona kha, Khazohpa ta âmo cha pahlôh leipa ta, hriena su liata thy ta, pachiana daihti a tlô hlâlei khaohtlô zohpa liata a khô chy ei.

⁵ Ano a uasa leipazy yna khizaw liata tipa-ua a patlôsa nona kha, Khazohpa ta hlâno khizaw kha pahlôh leipa ta, siana bie a chhotuhpa Nôah nata mohropa pasari deita a pahlôh ei.

⁶ Sawdawmâ nata Kawmawrâ khihpizy kha ano a uasa leipazy pakhona châta hmâh ta, Khazohpa ta khihpizy cha buchâh lâta pachâsa ta a pamua ha ei.

⁷ Moleipazy parâ aohraohna vâta a pachâ thata a rôh tyhpa mosiapa Lawta kha, Khazohpa ta a pachha haw.

⁸ Kha chyhsa siapa kha ama hry liata y ta, chyhsazy ta ryhpa rai zyh khoh leipa ei ta, âmo khozie hawhta noh chareih ama hropa a hmôpa nata a theipazy ta a siana palôh a pasasa ngaita tyh.

⁹ Cha hawhna chata Abeipa ta ano a pachâtuhpazy cha reipasaona tawhta a pachha nawpazie pahno ta, sialeipazy cha pachiana noh a tlô hlâlei hriena ry liata soh chy nawpazie chhao a pahno.

¹⁰ Sapa aohraohna lôhrâ a patlô tyhpa nata biehneina a mohnaopazy hrie nawpa chhochhi a pahno via pachai. Hru riahphapazy châ ei ta, a palai ngaita ei ta, vâ liata rônahpazy reipachhie awpa hmah a chi leipazy ama châ.

¹¹ Thatlôna nata hmotaotheina a hnei viapa vâlyuhchâpazy hmahta, chazy reipachhiena bie Abeipa hmiakô liata reih veih ei.

¹² Âmo deikua cha, pachâna a hmâh thai leipa râhsa, patuapaluana a hnei leipa hmohrohneipazy hawhta châ ei ta, patu awpa nata pahleipadia awpa ta a pihpazy ama châ. Ama pahno leipa kyhzy reipachhie ei ta, râhsazy hawhta âmo chhao pahleipadiapa ama châ hra aw.

¹³ Chyhsa ama pasasapa ty hmôpa ta âmo chhao pasasapa ama châ aw. Nohchhô sawhvaw pi ta haosai daihti a hmâh tyhpazy châ ei ta, nama kyhchhi ama châ hlao nota chhao, haosai sai pachâ ei ta, apuapa a kiapa nata seina a hneipazy ama châ.

¹⁴ Ama mokhaoh cha apheina ta bie ta, moleina hmo taona liata ama rih a bie beih leipa ama châ. Chyhsa a i leipazy sydie ei ta, karâhneina palôh phaoh ei ta, chhiesapa sawzy ama châ.

¹⁵ Lâpi dopa tleisai ei ta, ama pavia haw. Hmo doleipa taopa tawhta athôhna hmô a tlaichhaipa Beô sawchapawpa Bâlâma lâpi amâ chhih.

¹⁶ Châhrasala Bâlâma cha a moleina vâta rapa châ ta, alâ reih pathlie thei leipa cha chyhsapa hawhta bie vaw reih ta, hrohsopa hruna cha a pakhâ haw.

¹⁷ Cha chyhsazy cha ti a y leipa vahtiezy châ ei ta, thlihpipa ta a phao pahaipa ameihzy ama châ. Zohna chhakaluhpa nôpona cha âmo châta sopa a châ.

¹⁸ A patahtheisa kawpa ta bie hraoleipazy reih ei ta, moleipa chyhsazy tawhta a râ dyupazy cha, sapa aohraohna moleina liata ama pahluasa tyh.

¹⁹ Chyhsazy hnohta khotalaina bie a taih ei ta, âmo chaipa deikua cha avyuhna sei ta ama y. Kheihawhpa hmo rai ta a pahniepa chyhsa cha, cha hmo sei ta a ypa a châ.

²⁰ Eima Beipa nata Pachhatuhpa Zisu Krista ama pahnopa vâta, khizaw puanazy amâ râsai ha tawhta, cha lilaw liata a tâh heihpa ta, pahniepa ta ama y heih khiahta cha, hnôhlâ ta ama yzie cha hmialâ ta ama yzie hlâta a chhie via ha tyh.

²¹ Siana lâpi pahno ha tlôh ta, ama hnohta biepiepa pathaihpa pavaosapa a heihsai heihpa hlâta cha, siana lâpi pahno leipa ta vaw y lâlao ei sala ama châta a pha via awpa tlai.

²² “I ta a palipa a nie heih tyh,” tahpa nata “Vao panô cha a ngai â si khai tawhta chiatlao liata â ny heih tyh,” tahpa bieso dopa ama chô liata a vaw tlô.