2 PITY 1 - Mara Bible RV (BSI)

Anaohna

¹ Zisu Krista chakaotuhpa nata lyuhchâpa Saimaw Pity ta Zisu Krista eima Khazohpa nata Pachhatuhpa siana vâta keimo topa hawhpa ngiapâna sôh ngaitapa a to hrapazy ei châ naoh ei.

² Khazohpa nata eima Beipa Zisu pahnona liata ngiachhiena nata thlalôhna nama chô liata pôh rili mawh sy.

Khazohpa awpa nata atlyhpa

³ Ano eima pahnona zawhzi ta, ano rônahna nata phana vâta miah awtuhpa Khazohpa hmotaotheina chata hrona nata Khazohpa pachâna hmo zydua miah a patosa.

⁴ Chatanachata a bietai sôh ngaitapa nata rônah ngaitapazy miah pie ta, chazy zawhzi ta moleina aohraohna vâta khizaw liata paraona a ypa cha a râsaipa ta, Khazohpa nôchâ a hlytuhpazy nama vaw châ haw.

⁵ Cha vâna tlai chata nama theina zydua papua u la, namâ ngiapâna liata adona a hlao sala, adona liata pahnona a hlao sala,

⁶ pahnona liata asohsina a hlao sala, asohsina liata tiamana a hlao sala, tiamana liata Khazohpa pachâna a hlao sala,

⁷ Khazohpa pachâna liata unawhzy atlaichhaina a hlao sala, unawhzy atlaichhaina liata kyhpachâna a hlao mawh sy.

⁸ Cha chânazy cha hnei u la, a pôh lymâ khiahta cha, eima Beipa Zisu Krista pahnona kyh liata hmotaotheina hnei leipa nata pathei leipa ta y aw veih ei chi.

⁹ Ahy rai, cha chânazy a hnei leipa cha mochaopa châ ta, lâhniapa dei hmô thei ta, kha hlâta moleina a vaw taopazy pathaisa hapa a châzie a my haw.

¹⁰ Chavâta unawh saih u, a cha awna ei nata a châ tlyhna ei cha, pa-i awpa ta tiama papua rili teh u. Chazy nama tao khiahta cha pao beih aw veih ei chi.

¹¹ Chatanachata eima Beipa nata Pachhatuhpa Zisu Krista chhâzaw khinarâh liata a ngia theina cha, pasai ngaitapa ta piepa nama châ aw.

¹² Chavâta cha hmozy cha pahnopa ta, biehmeiseihpa nama hneipa liata namâ i ha tarawpa ta, cha chânazy cha cha pahnosa chanei tyh awpa ei, ei chhuah.

¹³ Sapa pôhpa ta ei y chhôh zydua cha, cha pahnosa chanei tyh ta, nama tha cha pathyu awpa cha, hmo phapa a châpa ta ei pahno.

¹⁴ Eima Beipa Zisu Krista ta eina pahnosapa hawhta, ei pôhpa paso nawpa daihti a tlô patoh aw tahpa ei pahno.

¹⁵ Ei sie tawh chhao ta, cha hmozy cha khâ namâ thei thlâh nawpa ta ei tei lylia aw.

Krista rônahna nata hrohsona bie

¹⁶ Eima Beipa Zisu Krista hmotaotheina nata â vy heih awpa kyh eima cha pahnosa nona kha, phôhpa phichhyhpazy cha chho ma pi. Keimo cha a rônahna a hmôtuhpazy eima châ.

¹⁷ Rônahna Beichaipa tawhta, “He he ei Sawchapawpa kho ngaitapa, a chô liata ei ly ngaitapa a châ,” tahpa ta ao vaw pua ta, Krista cha Paw Khazohpa tawhta palyupalihna nata rônahna a to nona kha,

¹⁸ a hnohta tlâh pathaihpa liata y pi ta, avâ tawhta a zâ puapa ao cha keimo tlai ta eima thei.

¹⁹ Hrohsona bie a i via pachaipa hnei pi ta, khih vaw deih ta deiva awhsi nama palôh liata a vaw pua hlâlei zohna liata meiôh a khaih chypa hawhta, cha hrohsona biezy cha nama pachâ khiahta cha, nama châta a pha aw.

²⁰ Biehrai liata hrohsona bie kheihawhpa rai, chyhsapa tawhta a puapa bie châ vei tahpa pahno tua awpa a byuh.

²¹ Hrohsona bie kheihawhpa rai, chyhsapa pachâna tawhta a puapa châ leipa ta, Khazohpa tawhta a puapa bie cha, chyhsazy ta Thlahpa Pathaihpa chhihthapa ta ama reih tyhpa tlao a châ.