2 KAWRINI 9 - Mara Bible RV (BSI)

Mopathaihpazy châta thyuna

¹ Mopathaihpazy châta chakaona kyh cha nama hnohta ei roh hluh awpa byuh vei.

² Cha chakaona raihria châta a mâ chiehpa ta nama ypa pahno na ta, Akai râh cha zâkô tawh khata a mâh chiehpa ta ama y tahpa ta Mâsidônia mo hmiakô liata ei châ palaikhei kaw ei. Nama phahnai ngiahna ta chyhsa hluhpi palôh a pahra haw.

³ Cha kyh liata eima châ palaikheina cha aruapa châ leipa sala, ei reipa hawhta namâ chhuanoh thei nawpa ta, unawhzy he nâmo lâ ei vaw tuah.

⁴ Chataleipatala Mâsidônia mo ta na vaw zi ei sala, namâ mâ leipa ama cha hmô khiahta cha, eima cha ngâpa hawhta a châ leipa vâta, nâmo maophyuh leipa aw ei chi ta, keimo maophyuhna a châ aw.

⁵ Chavâta pie awpa namâ taihpazy kha pasia awpa ta, unawhzy he nâmo lâ pavysa chhielie a byuhpa ta ei pahno. Chatanachata tararuahna ta châ leipa ta, pasai ngaitapa ta piepa châ aw ta, a mâ chiehpa ta a y thei aw.

Piena kyh liata riaphana

⁶ He he pahno teh u: A chyhta a tupa ta a chyhta hria aw ta, a hluhpi a tupa ta a hluhpi a hria aw.

⁷ Chyhsa to pasai leina chôta pie leipa ta, pie lei thei lei awpa hawhta pachâpa ta pie hra leipa ta, ama palôh ta amâ chhuahpa hawhta pie chyu mawh ei sy. Khazohpa ta a ly ngaitapa ta a pietuhpa kyh a pachâ.

⁸ Khazohpa ta ngiachhiena hluhpi nama chô liata vaohei thei ta, chatanachata khati no rai ta hmo to namâ ngiahpa hawhta hnei aw ei chi ta, raihria phapa hluhpi nama hria thei aw,

⁹ “A saipa ta rai ta, Dyhchhiepazy a pie ei; A siana cha chhâzaw ta a y,” tahpa ropa hawhta.

¹⁰ Chitutuhpa hnohta chi a pietuhpa nata nie awpa châta viahchhâ a pietuhpa ta nama tu awpa chi cha pie aw ei ta, chi cha papôhsa aw ta, nama siana thei hluhpi a patheisa aw.

¹¹ Kyh to liata riaphapa nama châ thei nawpa ta, kao to liata pahneirôhsapa ta y aw ei chi ta, nama riaphana chata keimo hmâpa ta Khazohpa lâ alyna biereina a sa papua aw.

¹² Cha deichhy chakaona raihria cha, mopathaihpazy phahlana pazaona dei châ leipa ta, Khazohpa lâta alyna biereina hluhpi a paysatuhpa a châ hra.

¹³ Cha chakaona cha, Krista thâtihpha namâ pyhpa vâta, Zerusale liata mopathaihpazy châta nata mohropazy châta riapha ngaitapa ta nama thyupa a châzie ama pahno tita, Khazohpa ama palyupalih aw.

¹⁴ Nama chô liata Khazohpa ngiachhiena rônahpa vâta, Zerusale liata mopathaihpazy ta cha vâ kaw aw ei ta, thlah ama chhâpa tyh aw.

¹⁵ A hmosaipiepa rei tiah leipa vâta Khazohpa hnohta alyna bie y mawh sy!