2 KAWRINI 8 - Mara Bible RV (BSI)

Piena kyh pachuna

¹ Unawh saih u, Mâsidônia Awnanopazy hry liata Khazohpa ngiachhiena ama topa kyh nama pahno awpa eima khoh.

² Rietheina hluhpi ta pasiapa ama châpa chhao ta, amâ lyna khô pathlah ta; dyhchhie kawpa ta ama ypa chhao ta, amâ pasaina a bie pakhô.

³ Ama hneina nata â phuhpa ta pie ei ta, âmo khotlyna tlai ta, ama hneina khô lâ taihta ama pie tahpa ei pahnokhei ei.

⁴ Mopathaihpazy deichhy chakaona rai liata a hlao hra awpa ta thata miah amâ haw.

⁵ Cha chhao cha eima pangiasa leipa hawhta ama tao. Abeipa liata âmosasyh a hlâ tua ei ta, cha khai tawhta, Khazohpa khozie hawhta keimo liata miah amâ ngiarih.

⁶ Chatanachata ngiachhie chakaona sôh thyuna nama hry liata a vaw pathao hapa kha, patlô awpa ta Titu eimâ haw.

⁷ Kyh to liata nama tao pha ngaita. Ngiapâna, bie rei thaina, pahnona nata phahnai ngiahna zy liata tao pha kaw ei chi ta, kyh miah nama pachâna zy liata chhao nama tao pha ngaita. Hmopiepa ta ngiachhie chakaona raihria liata chhao tao pha a chhuah teh u.

⁸ Biepiepa hawhta reih leipa na ta, mohropazy phahnai ngiahna cha pahnosa ta, nâmo chhao kyhpachâna hmeiseihpa nama hneipa pasia nawpa ta ei reih.

⁹ Eima Beipa Zisu Krista ngiachhiena cha, ano dyhchhiena vâta nâmo nama hneirôh thei nawpa ta, hneirôhpa a châpa chhao ta nâmo vâta dyhchhiepa ta â taona liata nama pahno.

¹⁰ He kyh liata nama châta pha awpa ei pahnopa cha he he a châ: Zâkô liata he chakaona rai a hria tua chaipa nama châpa dei châ leipa ta, chakao khohna a hnei tua chaipa nama châ.

¹¹ Nama chakaona patlô teh u. Chatanachata chakao khohna nâmo liata a ypa cha, nama hneina nata â phuhpa ta nama piena liata â lâ aw.

¹² Pie khohna a y khiahta cha, chyhsa ta a hnei leipa châ leipa ta, a hneipa nata â phuhpa ta a piepa cha a pyh tlâh a châ.

¹³ Mohropa tha padâh ta, nâmo phao cha pahri awpa ei chhuahpa châ vei. A deichhy raihrie awpa khona vâta a châ.

¹⁴ Tahmâ he nama hneina ta amâ ngiahna deichhy aw ta, ama hneina ta namâ ngiahna a deichhy hra aw. Chatanachata a deichhy raihriepa a châ aw,

¹⁵ “A hluhpi a huahpa ta laibâhpa hnei leipa ta, a chyhta a huahpa ta a phahla hlei vei,” tahpa ropa hawhna khata.

Titu pahnokheina

¹⁶ Kei ta nama châta phahnai ei ngiahpa hawhta, Titu liata phahnai ngiahna a pahneisatuhpa Khazohpa cha reithaipa ta y mawh sy.

¹⁷ Eimâ hawna â pyhpa dei châ leipa ta, ano phahnai ngiahna nata khotlyna tlai ta nâmo lâ â vy.

¹⁸ A hnohta unawh pakha eima vaw tuah. Ano cha thâtihpha chhona kyh liata Awnanopa zydua ta ama reithaipa a châ.

¹⁹ Cha dei châ vei, Abeipa rônah nawpa nata saiheina eima hneipazy palâsa awpa ta, ngiachhie chakaona rai eima hriana liata miah sielâh awpa ta, ano cha Awnanopazy ta ama raopa a châ.

²⁰ Riapha ngaitapa ta hmopiepazy eima mohôhna kyh liata seina a y lei nawpa ta, he hawhta eima taopa a châ.

²¹ Abeipa mohmô lia dei châ leipa ta, chyhsa mohmô liata chhao adona palâsa eimâ chhuah.

²² Ama hnohta eima unawhpa eima vaw pasiesa. Ano cha ei hluhpi pasia pi ta, kyh hluhpi liata phahnai a ngiah ngaitapa chyhsa châ ta, tahmâ chhochhi cha a cha ngâ kawpa vâ ei ta, nâmo lâ a vy awpa phahnai â ngiah pachai.

²³ Titu cha nama pha nawpa ta ei kaolâhpa nata ei hrialâhpa a châ. Eima unawhzy cha Awnanopazy lyuhchâpa châ ei ta, Krista rônahna ama châ.

²⁴ Chavâta he chyhsazy kyh nama pachâna cha, Awnanopazy hmiakô liata palâsa u la, eima châ palaikheina â dozie chhao, he chyhsazy chô liata vaw palâsa muh vy.