2 KAWRINI 7 - Mara Bible RV (BSI)

Pathaihna

¹ Kyhpachâ ngaitapa saih u, cha bietaizy cha eima hneipa vâta, pôhpa nata thlahpa a papuapaleipa zydua tawhta a pathai sih la, Khazohpa chipa ta pathaih pakipa ta y suh u.

Pawla alyna

² Nama palôh liata su miah pie teh u. Ahy pei hmah hria leipa pi ta, ahy hmah parao leipa pi ta, ahy hmah dôvei beih ma pi.

³ Cha bie cha nâmo thailei pachâsa nawpa ta ei reipa châ vei. Thi khiah thi khoh, hro khiah hroh khoh tah awpa ta, eima palôh liata khâ nama ypa kyh cha, kha hlâta ei reih haw.

⁴ Nâmo hnohta la, riahpha kawpa ta bie ei reih ngâh. Châ palaikhei ngaita ei na ta, thlalôhna ta ei bie. Eima riethei taona zydua liata alyna ta ei khô pathlah.

⁵ Mâsidônia râh eima vaw tlô nota, eima pôhpa a pahâ beih leipa ta, su to liata riethei pataosapa ta eima y. Khôtho lâta miah a dyuh ei ta, chhôh lâta china ta miah a khu.

⁶ Châhrasala palôh rietheipazy thlapalôhtuhpa Khazohpa ta Titu vaw tuah ta, thlah miah a palôh haw.

⁷ Titu vaw tlôpa vâ dei châ vei. Ano thlah nama palôhpa cha keimo thlah miah a palôhpa nama châ hra. Na vâ ngaita ei chi ta, riethei ei taona liata na taokhei ei chi ta, ei châta phahnai namâ ngiahzie zy miah chho ta, eina palysa via pachai.

⁸ Ei châpaphaopa vâta nama pachâ ei cha parôhsa ei tahpa vaw pahno na ta, buakha chhôh pachârôhna a châpa chhao ta, ei ngiapachhi kaw. Châhrasala a ngiapachhi khao va na.

⁹ Tahmâ la ei ly kaw, pachâ parôhsapa ta nama ypa vâta châ leipa ta, ro awpa ta pachâ parôhsapa vâta a châ. Khazohpa liata pachârôhna namâ tyhpa châ ta, keimo vâta khâpa hmah pahlei veih ei chi.

¹⁰ Khazohpa liata pachârôhna cha, pachha châ nawpa ta rona tlôkhei ta, angiapachhina y vei. Khizaw pachârôhna deikua cha, thina a tlôkhei tyh.

¹¹ Khazohpa liata nama pachârôhna ta nâmo liata a sa papuapa hmozy he moh tua u. Phahnai ngiahna, reipasipasua hlao lei awpa khona, adona hrokhei khohna, Khazohpa china, mopathaihpazy vâna, khopasana nata ryureina dopa hmô khohna zy nâmo liata a sa papua. He kyh liata kao to liata nama pathaihzie nâmo tlai ta nama palâsa haw.

¹² Chavâta nama hnohta châpaphaopa vaw roh hraw sah la, moleina hmo a taotuhpa vâta roh leipa na ta, moleina pasa a taotuhpa vâta roh hra va na. Keimo châta phahnai namâ ngiahzie Khazohpa mohmô ta nama hnohta palâsapa ta a y thei nawpa ta ei roh.

¹³ Chavâta thlalôhpa ta eima y. Keimo thlalôhpa dei châ vei. Nâmo vâta Titu thlahpa cha pathiehpa ta a ypa vâta, Titu alyna liata eimâ ly pachai.

¹⁴ Ei châ palaikheina ei a hnohta reih tyh na ta, maophyuhpa ta y va na. Nama hnohta bie eima rei tyhpa zydua kha, biedopa a châpa hawhta, Titu hmiakô liata nâmo eima châ palaikheina chhao kha biedopa a châ.

¹⁵ Nama zydua ta reingiah ngaitapa châ ei chi ta, china nata chalyuna chôta namâ vaw lyzie â thei thlâh hapa vâta, a cha tlaichhaina ei a pôh via lymâ.

¹⁶ Kyh to liata tlokhuh ta ei ngâpa nama châpa vâta ei ly ngaita.