2 KAWRINI 6 - Mara Bible RV (BSI)

Daihti rypaohpa

¹ Khazohpa ngiachhiena cha hraoleipa nama pachâsa lei nawpa ta, Khazohpa hrialâhpazy ta eima châ haw.

² Khazohpa ta, “Daihti rypaohpa liata cha nathlie na ta, Pachhana noh liata ei cha bao,” a tah. Pachâ teh u, tahmâ he daihti rypaohpa cha châ ta, tahmâ he pachhana noh cha a châ.

Pawla riethei taona

³ Eima chakaona raihria he seipa ta a y lei nawpa ta, ahy lâpi lia hmahta achapiana lô soh ma pi.

⁴ Khazohpa chakaotuhpazy eima châpa hawhta, kyh to liata chyhsa modypa ta eima y. Thata pasa taona liata zy, riethei taona liata zy, rairuna liata zy, pachârôhna liata zy;

⁵ chheina liata zy, patâhna liata zy, tymâna liata zy, hriapasana liata zy, mokuh saihna liata zy, nodina liata zy;

⁶ hro pathaihna liata zy, pahnona liata zy, daotheina liata zy, nôphana liata zy, Thlahpa Pathaihpa liata zy, kyhpachâna hmeiseihpa liata zy;

⁷ bie hmeiseihpa reina liata zy, Khazohpa hmotaotheina liata zy, chachâh lâ nata chavei lâta siana chaihrai chabana liata zy;

⁸ rônahna nata nozana liata zy, reipachhiena nata reithaina liata zy, modypa ta eima y tyh. Chyhsa dopa châ pi ta, châhrasala chyhsa dôvei thaipa hawhta miah ama pachâ.

⁹ Pahno khi leipa ta pachâpa châ pi ta, châhrasala chyhsa to pahnopa eima châ. Thi awpa ta pachâpa châ pi ta, châhrasala moh tua u, eima hro thlâh ha hih. Hriepa châ pi ta, châhrasala thiepa châ ma pi.

¹⁰ Pachârôh awpa ta pachâpa châ pi ta, châhrasala khâ eimâ ly. Dyhchhiepa hawhta pachâpa châ pi ta, châhrasala chyhsa hluhpi a pahneirôhsapa eima châ. Khâpa hmah a hnei leipa hawhta pachâpa châ pi ta, châhrasala ato eima hnei.

¹¹ Hy Kawrini mo saih u, khotalaipa nata palôh pahy khaipa ta nama hnohta bie eima reih.

¹² Keimo la nâmo liata khâpa hmah phih ma pi, nâmo deikua cha keimo châta a pahy veih ei chi.

¹³ Sawzy hnohta bie reipa hawhta nama hnohta ei reih. Nâmo chhao miah nama deichhy thei hra nawpa ta, nama palôh zy a pahy via teh u.

Khazohpa hrohpa Achhyna o

¹⁴ Ngiapâleipazy nata raopaky a ky khoh khuh vy. Siana nata moleina ta khâpa a hly theipa ama hnei? Khaihna nata zohna ta khâpa akaona ama hnei?

¹⁵ Krista nata ahripa ta khâpa aryhna ama hnei? Ngiapâtuhpa nata ngiapâleipa ta khâpa to khohpa ama hnei?

¹⁶ Khazohpa Achhyna o nata nothlahpazy ta khâpa aryhna ama hnei? Keimo he Khazohpa hrohpa Achhyna o cha eima châ, Khazohpa ta, “Ama hry liata pahrâ aw na ta, Ama hnohta ei charei aw; Ama Khazohpa châ aw na ta, Ei phopi ama châ aw,” a tahpa hawhna khata.

¹⁷ “Chavâta ama hry tawhta pua u la, Â nano ta y teh u, Abeipa ta a tah. Hmo pathaih leipa hria khuh vy, Chatanachata ei châ ly aw ei;

¹⁸ Nama paw châ aw na ta, Ei sawchapawzy nata ei sawchanôzy nama châ aw, Abeipa Atotaotheipa ta a tah,” a tahpa hawhna khata.