2 KAWRINI 5 - Mara Bible RV (BSI)

Eima vâ o

¹ Eima pahrâna lei byureih he phiepa châ hra sala, vârâh liata chhâzaw o eima hnei tahpa eima pahno. Cha o cha ku ta sa leipa, Khazohpa taopa a châ.

² Vâ atobina ta a tobi awpa vâpa ta, he lei byureih liana heta eimâ rôh tyh.

³ Vâ atobina ta eimâ tobi ha khiahta cha, thluahruapa ta y aw ma pi.

⁴ He lei byureih liata eima y chhôh cha phaohripa ta eimâ rôh tyh. A tobi leipa ta y awpa eima khohpa vâta châ leipa ta, a tobi via awpa eima khohpa vâta tlao a châ. Chatanachata he thi theipa he hrona ta a palâ ha aw.

⁵ Cha châta miah pachhuapanohtuhpa cha Khazohpa châ ta, a bietai pa-i nawpa ta a Thlahpa miah a pie.

⁶ Chavâta riahphapa ta eima y tyh. Pôhpa o liata eima y chhôh deita he Abeipa tawhta eimâ hla chypa pahnopa ta,

⁷ hmô theipa ta sie leipa ta, ngiapâna ta eima sie.

⁸ Thlalôhpa ta eima y. Pôhpa o liata y leipa ta, eima y nawpa o liata Abeipa hnohta y awpa eima khoh via.

⁹ Chavâta pôhpa o liata eima y tlyma, y vei tlyma, ano palysa awpa eimâ chhuah tyh.

¹⁰ Chyhsa to ta pôhpa liata hmotaopazy, a chhiepa tlyma, a phapa tlyma, eima taopa hawhta eima hmô chyu thei nawpa ta, Krista ryureina dyuchhai hmiakô liata paluahsapa eima châ khai aw.

Aryhna chakaona rai

¹¹ Chavâta Abeipa china phazie pahnopa ta, chyhsazy eima pasyu tyh. Kheihawhpa chyhsa ma eima châ tahpa Khazohpa ta pahno ta, nâmo chhao ta nama chhie nata pha pahnona hmâpa ta, miah nama pahno hra aw tahpa ei hnabei a seih.

¹² Nâmo liata eimâ rei papha heihpa châ vei. Palôh liata a ypa châ leipa ta, chôpho alâna a palaikheipazy a chhy nawpa nata keimo miah namâ palaikhei thei nawpa ta, daihti rypaohpa eima cha piepa a châ.

¹³ Eima hru khiah, Khazohpa châta châ ta; eima so khiah, nâmo châta a châ.

¹⁴ Chyhsa zydua châta chyhsa pakha a thi khiahta cha, chyhsa zydua cha a thipa ama châ tahpa cha eima bietluna a châpa vâta, Krista kyhpachâna ta miah a tuah raruah.

¹⁵ Chyhsa zydua châta a thipa vâta, ahrohpazy cha âmo châta hroh khao leipa ta, âmo châta thi ta a thyu heihpa châta ama hroh awpa a châ.

¹⁶ Chavâta tahmâ tawhta la, chyhsapa mo ta ahy hmah moh khao ma pi. Chyhsapa mo ta Krista kha vaw moh ha hra sih la, tahmâ cha cha hawhta moh khao ma pi.

¹⁷ Chavâta ahy rai Krista liata a ypa cha hmotao thiehpa a châ. Hmo parohpazy lei ha ta, moh teh u, athiehpa a vaw châ haw.

¹⁸ Cha zydua cha Khazohpa tawhta a puapa a châ. Krista vâta Khazohpa ta ano nata a ryhpa ta miah tao ta, aryhna chakaona raihria miah a pie.

¹⁹ Krista liana chata Khazohpa ta khizaw he ano nata a ryhpa ta tao ta, ama paraonazy cha paraona ta rao khao vei. Cha aryhna bie chho awpa cha keimo liata a pahnieh.

²⁰ Chavâta Krista lyuhchâpazy châ pi ta, Khazohpa ta keimo miah hmâpa ta a châ haw ei. Khazohpa nata a ryhpa ta y awpa ta, Krista vyuhpa ta eima châ haw.

²¹ Krista zawhzi ta Khazohpa siana eimâ hly thei nawpa ta, moleina rai a hnei leipa cha, Khazohpa ta keimo vâta moleipa ta a tao.