2 KAWRINI 3 - Mara Bible RV (BSI)

Biehrai Thiehpa chakaotuhpazy

¹ Keimosasyh ta a reipapha eimâ thao heih aw ma? A châ vei khiah, thokha taozie hawhta, nâmo lâ tlyma, nâmo tawhta tlyma, pahnokheina châ eimâ ngiah ma?

² Nâmo he keimo châta pahnokheina châ, chyhsa zydua pahno thei awpa nata rei thei awpa ta, eima palôh liata ropa châ cha nama châ.

³ Nâmo he Krista ta keimo miah a parosapa Krista châpaphaopa châ ei chi ta, châti ta ropa châ leipa ta, lôphia liata ropa châ hra leipa ta, Khazohpa hrohpa Thlahpa ta chyhsa palôh phiapa liata ropa nama châzie a siapa ta nama palâsa haw.

⁴ Cha hawhta Khazohpa ngâna cha Krista zawhzi ta eima hnei.

⁵ Keimo liata tlohna hnei leipa pi ta, keimo tawhta a puapa rei awpa khâpa hmah hnei ma pi. Eima tlohna cha Khazohpa tawhta a châ.

⁶ Khazohpa ta biehrai thiehpa chakaotuhpazy châ awpa ta miah patlohsa ta, ryhpa vâta châ leipa ta, Thlahpa vâta a châ. Ryhpa ta thie ta, Thlahpa deikua ta a pahro tyh.

⁷ Alô liata khiepa, thina a tlôkheipa châropa zâ phaohtuhpa Mawsi hmia hmahta kha tlatlu ta rônah sala, a lei thlâh ha awpa rônahna hmahta Izarei sawzy ta ama mo ngâh leipa khiahta cha,

⁸ Thlahpa chakaona chhochhi cha, rônah pachai aw vei ma?

⁹ Thailei pachâsana chakaona hmahta a rônah khiahta cha, thai pachâsana chakaona chhochhi cha, a rônah via syulyu awpa a châ.

¹⁰ Eikhano ta rônah kaw tyhpa chhao, ano hlâta rônah viapa a vaw tlô hapa vâta, tahmâ cha rônahna hnei khao vei.

¹¹ Chhâna noh a tlô awpa hmahta rônahna chhaota â vy khiahta cha, y zôzaw awpa chhochhi cha khatlu ta ma a rônah via aw tly!

¹² Cha hawhpa hnabeiseihna eima hneipa vâta, keimo la eima riah a pha ngaita.

¹³ Mawsi hawhta châ ma pi. Ano cha a hmia khaihpa a dia laihpa Izarei sawzy ta ama hmô lei nawpa ta, khuna ta a hmia â khu.

¹⁴ Châhrasala ama palôh kuh pachhasapa châ ta, tanoh taihta, biehrai parohpa ama rei nota, cha khuna cha pahypa châ vei. Khuna cha Krista vâ deita ta pahypa a châ.

¹⁵ Tanoh taihta, Mawsi châbu ama reina maihta, ama palôh cha khuna ta a khu thlâh ha chy.

¹⁶ Châhrasala chyhsa ta Abeipa lâ â heih nahta, khuna cha pahypa a châ tyh.

¹⁷ Abeipa cha Thlahpa châ ta, Abeipa Thlahpa yna maih liata khotalaina a y.

¹⁸ Chatanachata keimo hmia khu leipa ta a ypa zydua pi heta Abeipa rônahna cha palâsa pi ta, rônahna tawhta rônah via rilipa ta, Abeipa rônahna lyuna lâta pananopa ta eima y lymâ. Cha cha Abeipa tawhta eima hmôpa châ ta, Abeipa cha Thlahpa a châ.