2 KAWRINI 2 - Mara Bible RV (BSI)

Krista liata kyhpachâna

¹ Palôh pasana a y heih awpa pachâpa ta, cha vaw tly khao lei awpa ei chhuahpa a châ.

² Nâmo palôh ei cha pasasa ha khiah ei ta cha, ahy kei nâ palysa khao aw? Palôh ei pasasapa nâmo pyly cha nâ palysa awpa châ veih ei chi ma?

³ Ei vy tita, nâ palysa awpazy ta eina pasasa lei nawpa ei chi ta, kha châ kha ei ropa tlai a châ. Keima alyna cha nama zydua alyna a châ hra tahpa nama zydua ta ei cha ngâ ei.

⁴ Thlazoh ngaitapa nata palôh rietheipa nata mothlih hluhpi tlana chôta nama hnohta ei vaw ropa a châ. Nama palôh pasasa nawpa châ leipa ta, nama kyh ei cha pachâ ngaitanazie nama pahno thei nawpa ta ei ropa a châ.

Moleipa ngiahthaina

⁵ Ahy rai pachârôhna a tlôkhei khiahta cha, keima pachâ eina parôhpa dei châ leipa ta, nama zydua pachârôhna a tlôkheituhpa a châ. Ei cha pasi tu leina awpa ei ta, cha bie cha ei reipa a châ.

⁶ Cha hawhpa chyhsa châna chata, chyhsa hluh via tawhta hriena â tyhpa cha â daih na.

⁷ Hrie via awpa hlâta cha, a ngiahthai u la, a thlah palôh teh u. Chataleipatala pachârôhna ta a vaosao pathlei aw na.

⁸ Chavâta a chô liata nama kyhpachâna pa-i awpa ta ei châ haw ei.

⁹ Cha kyh vâta châ kha ei cha vaw paphao ei, kyh to liata rei namâ ngiah nata ngiah lei ei cha pasia thei nawpa ei ta.

¹⁰ Namâ ngiahthaipa maih kei chhao ei ngiahthai hra aw. Ei ngiahthai khiahta cha, nâmo vâta Krista hmiakô liata ei ngiahthaipa a châ.

¹¹ Chataleipatala Sâtâ ta miah a pahnie pathlei aw. Sâtâ hmochhuahpa pahno leipa ta y ma pi.

Krista liata pahniena

¹² Krista thâtihpha chho awpa ta Tarôsa khih ei vaw tlô nona kha, Abeipa ta ochhi na pahypa ta.

¹³ Châhrasala ei unawhpa Titu ei hmô leipa vâta, ei thlahpa a chhôhmoh thei leipa ta, âmo cha reikah phapa ta a chhaih na ta, Mâsidônia râh lâ ei palâh haw.

¹⁴ Krista liata pahniena ta khâ miah a chhituhpa nata keimo hmâpa ta su to liata ano pahnona ropahâhpa a patheisatuhpa Khazohpa cha reithaipa ta y mawh sy.

¹⁵ Pachha haipazy nata leidia haipazy hry liata Khazohpa châta Krista ropahâhpa châ pi ta,

¹⁶ py kha châta thina tawhta thina lâ ropahâhpa châ pi ta, py hropa châta hrona tawhta hrona lâ ropahâhpa eima châ. Chazy châta ahy a tloh thei aw?

¹⁷ Chyhsa hluhpi ta Khazohpa bie he sôhpaliena ta ama hmâpa hawhta keimo la hmâh ma pi. Keimo la Khazohpa tuapa chyhsa ngâchhihpazy châ pi ta, Khazohpa mohmô ta Krista liata bie eima reih tyh.