2 KAWRINI 13 - Mara Bible RV (BSI)

Zikyurâna chhâna

¹ He he nâmo lâ ei vy ei thôhna awpa a châ. Leihna biezy cha pahnokheituhpa pano tlyma, pathôh tlyma bie ta pa-i awpa a châ.

² Nâmo lâ ei vy ei nona liana khata zikyu ei châ râ ha ei. Tahmâ ei vy hlâta zikyu ei châ râ chanei ei. Ei vy heih tita, kha hlâta moleina a vaw taopazy nata mohropazy pahlôh aw veih ei na.

³ Keima hmâpa ta Krista ta bie a reih ma tahpa pasiana nama tluapa cha nama hmô aw. Ano cha nama chô liata hmotaona kyh liata chiehleipa châ vei. Hmotaothei ngaitapa ta nama hry liata a ypa a châ.

⁴ Chiehleipa ta khaipâpa châ ta, châhrasala Khazohpa hmotaotheina ta a hroh. Keimo chhao ano liata chiehleipa châ pi ta, châhrasala nâmo eima cha chakaopa vâna heta, Khazohpa hmotaotheina topa ta a hnohta eima hroh hra aw.

⁵ Ngiapâna liata nama y ma tahpa nâmosasyh ta a mohpasia u la, nâmosasyh ta a pasia teh u. Zisu Krista cha nâmo liata a y tahpa nâmo tlai ta pahno veih ei chi mâ? Pasiana liata a tloh leipa nama châ vei khiahta cha, nâmo ta nama pahno aw.

⁶ Keimo deikua cha pasiana tloh leipa ta y ma pi tahpa nama pahno na ta ei hnabei a seih.

⁷ Hmo nama parao lei nawpa ta Khazohpa lâ thlah eima cha chhâpa tyh. Pasiana liata a tlohpa hawhta keimo eimâ lâ thei nawpa châ vei. Keimo la a tloh leipa hawhta a lâ hra sih la, nâmo chhâ ta hmo dopa nama tao thei nawpa ta a châ.

⁸ Biehmeiseihpa a dyuhpa ta khâpa hmah tao thei ma pi. Biehmeiseihpa châ deita ta hmo to eima tao tyh.

⁹ Keimo eima chieh vei no chhao ta, nâmo thatlôpa ta nama ypa cha eimâ ly chaina a châ. Phapakipa ta nama y thei nawpa ta thlah eima chhâ lymâ.

¹⁰ Cha vâna chata nama hnohta ei y vei nota, he biezy he ei ropa a châ. Chatanachata ei vy tita, Abeipa ta biehneina eina piepa ei hmâna kyh liata, pasa kawpa ta hmâh leipa ta ei y thei aw. Parao nawpa châta châ leipa ta, padua nawpa châta Abeipa ta biehneina eina pie.

Anaohna

¹¹ Achhâna ta, unawh saih u, a lypa ta y teh u. Phapaki a chhuah u la, thlah a palôh raihrie u la, palôh miakha phaohpa ta, adyryh kawpa ta y teh u. Kyhpachâna nata thlalôhna Khazohpa cha nama hnohta y mawh sy.

¹² Apahnâna pathaihpa ta a naoh raihrie teh u.

¹³ Mopathaihpa zydua ta ama châ naoh.

¹⁴ Abeipa Zisu Krista ngiachhiena, Khazohpa kyhpachâna nata Thlahpa Pathaihpa akaona cha nama zydua hnohta y mawh sy.