2 KAWRINI 12 - Mara Bible RV (BSI)

Pawla aluahna nata ahloh

¹ Ei palai via heih tua aw. Phahnaina y vei hra sala, Abeipa aluahna nata biephuahpa kyh ei reih tua aw.

² Kô hrawh hleipalih a sie hapa liata, vârâh chhâh thôhna lâta a chhipa ta a ypa, Krista liata chyhsa pakha ei pahno. Pôhpa ta a chhipa ma a châ, pôhpa leipa ta ma, tahpa deikua pahno va na. Khazohpa ta a pahno.

³ Cha chyhsa cha pôhpa ta ma a y, pôhpa leipa ta ma, pahno va na, Khazohpa ta a pahno.

⁴ Pârâdi lâ a chhipa ta y ta, reipasia thai awpa a châ leipa bie, chyhsapa châta rei hraoh leipa biezy a thei tahpa ei pahno.

⁵ Cha hawhpa chyhsa cha ei palaikhei aw, kei deikua la, ei chiehleina tah leipa ta la, keimasasyh a palaikhei awpa hnei va na.

⁶ Keimasasyh a palaikhei khohpa rai châ aw sah la, biehmeiseihpa a reihpa ei châ awpa vâta, ahrupa châ aw va na. Châhrasala chyhsazy ta ei taopa nata ei reipa hlâta rônah viapa ta eina pachâ pathlei lei nawpa ei ta, keimasasyh a palaikhei lei awpa ei chhuah.

⁷ Aluahna rônah ngaitapa ei hmôpazy vâta ei palai tu pathlei lei nawpa ta, ei pôhpa liata ahloh piepa ei châ. Cha ahloh cha, ei palai tu pathlei lei nawpa ta, ei pôhpa liata pasana na pie awpa ta Sâtâ lyuhchâpa a châ.

⁸ Cha kyh liata, ahloh ta eina puasai thei nawpa ta ei thôh tlai Abeipa hiah na ta.

⁹ Châhrasala Abeipa ta, “Ei ngiachhiena na châta â daih na, ei hmotaotheina he chiehleina liata pakipa ta a y tyh,” eina tah haw. Chavâta Krista hmotaotheina ei chô liata a y thei nawpa ta, ei chiehleinazy he a ly ngaitapa ta ei palaikhei via lymâ aw.

¹⁰ Cha vâna tlai chata chiehleina liata zy, mohnaona liata zy, rietheina liata zy, taolana liata zy, nôpona liata zy palôhtlâh ei paoh tyh. Ei chiehleina daihti maihta thatlôpa ei châ tyh.

Kawrini Awnanopa châta saiheina

¹¹ Ei hru ha hih! Nâmo ta einâ duakhei awpa ei chi châ taraw ta, châhrasala hru lei thei lei awpa ta eina tao ha ei chi. Khâpa hmah châ vei hraw sah la, lyuhchâpa laipa nama tahpazy hlâta nawh via tiarâh va na.

¹² Lyuhchâpa hmeiseihpa châna â lâna, ngianazy nata hmonoâhpazy nata hmotaotheinazy taopa ta, tiama ngaitapa ta nama hry liata eima chakao tyh.

¹³ Khâpa kyh liata ma Awnanopa hropazy hlâta nama nawh via? Nama phao ei cha pahri leipa ei liata ma? Ei tao pado leipa khiahta cha, nâ ngiahthai teh u.

¹⁴ Pachâ tua u, tahmâ he nâmo lâ a vy awpa ei chhuahna a ei thôhna a châ. Nama phao cha pahri aw veih ei na. Nama hmo hneipa tlua a chhuah leipa na ta, nâmo tlao ei cha tlua ei. Sawzy ta nôpawzy châta ryu ama pachôpa awpa châ leipa ta, nôpawzy ta sawzy châta ryu ama pachô tyh.

¹⁵ Kei la a ly ngaitapa ta nama thlahpa châta ei hneinazy hmâh a chhuah na ta, ei pôhpa chhao nama thlahpa châta hmâh khai ei chhuah. Thata kyh cha pachâ ei na ta, a chyhta chhâ kyh na pachâ hra aw veih ei chi ma?

¹⁶ Nama phao ei cha pahri leipa kyh liata, chyhsa pasi nawpa tluapa ta, piehpiena ta hmo a taopa hawhta eina pachâ ei chi.

¹⁷ Nâmo lâ ei vaw tuapazy hry liata ahy tlyma hmâpa ta, nâmo tawhta athôhna ei tlua ma?

¹⁸ Namô lâ a vy awpa ta Titu a haw na ta, a hnohta unawh pakha vaw tuah na ta, Titu ta athôhna ta a cha hmâh ei ma? Palôh miakha phaopa ta a hria khohpa châ ma pi mâ? A nuapa miakha hneipa ta a sie khohpa châ ma pi mâ?

¹⁹ Eima thaichâna bie eima cha rei thlupa hawhta ma nama pachâ? Kho ngaitapa saih u, nâmo taopathi nawpa ta Khazohpa mohmô ta Krista liata bie eima reipa a châ.

²⁰ Ei vy tita, ei pachâpa hawhta ei cha hmô lei awpa ei chi na ta, nâmo chhao ta nama pachâpa hawhta eina hmô lei awpa ei chi ei ngiaroh kaw. Ahryuna, hiatliana, hiehâhna, akhakhaina, areipachhiena, kyh reina, apasâhsana nata tymâna zy a y pathlei aw tahpa ei chi kaw.

²¹ Ei vy heih tita, ei Khazohpa ta nama hmiakô liata na panawh aw ta, pualeina, apatlana nata parâna moleinazy liata a vaw tlaih tyhpazy ama ro leipa vâta, ei palôh thata a pasa heih aw tahpa ei ngiaroh ngaita.