2 KAWRINI 11 - Mara Bible RV (BSI)

Pawla nata lyuhchâpa pakheipazy

¹ Ei vaw hru pâ hapa chhao ta eina chhyh thai awpa ei chi ei khoh kaw. Rie na chhyh thai muh vy!

² Vahpa pakha, Krista tlai cha, châ pahawhpa ei na ta, ano châta laihsa kôpa pathaihpa châ awpa ta a hnohta ei hlâ hapa nama châpa vâta, Khazohpa hiatliana ta ei hia ei cha tlia ei.

³ Parih ta piehpiepa ta Evâ a dôveipa hawhta, Krista châta nama ngâchhihna nata pathaihna tawhta nama palôhzy a chhi chheipa ta y pathlei lah ei chi tahpa ei chi kaw.

⁴ Ahy tlyma a vy sala, keimo eima cha chhopa Zisu a châ leipa, Zisu hropa kyh vaw reih sala tlyma; Thlahpa nama topa a châ leipa, thlahpa hropa kyh vaw reih sala tlyma; thâtihpha nama daopa a châ leipa, thâtihpha hropa kyh vaw reih sala tlyma, namâ pyh thlâh ha khiahta cha, a naopa ta dôvei theipa nama châ tahna a châ.

⁵ Lyuhchâpa laipa nama tahpazy hlâta nawh viapa hawhta a pachâ va na.

⁶ Bie reih thai vei hraw sah la, pahnona liata nawh hlei va na. Cha kyh cha hmo to nata kao to tawhta nama hnohta eima palâsa haw.

⁷ Thâtihpha a saipa ta cha chho ei na ta, palyupalihpa ta nama y thei nawpa ta, keimasasyh ta ei panawhpa cha, moleina hmo a taopa ei châ rai ma?

⁸ Nâmo chakao awpa ta, Awnanopa hropazy pahryuh na ta, âmo tawhta baona ei dao tyh.

⁹ Nama hnohta y na ta, ei phahla nota ahy phaohri hmah châ beih va na. Mâsidônia râh tawhta a vypa unawhzy ta ei phahlanazy liata eina deichhy lymâ ei. Nama phao cha pahri lei awpa a chhuah na ta, cha hawhta ei tao lymâ aw.

¹⁰ Krista biehmeihseihpa keima liata a ypa hawhta, cha ei palaikheina cha Akai râh liata ahy hmahta chalihsa thei aw veih ei.

¹¹ Khâpa vâta maw? Kyh ei cha pachâ leipa vâ ei ta ma? Khazohpa ta a pahno!

¹² Eima hriapa hawhta a hria hrapa ta a reih ei ta, ama chakaona a palaikhei kawpazy bie ei pachhai thei nawpa ta, ei tao tyhpa hawhta ei tao lymâ aw.

¹³ Cha hawhpa chyhsazy cha, chyhsa dôvei hmâhpa hriatuhpa, âmosasyh ta Krista lyuhchâpa ta â taopa, lyuhchâpa pakheipazy ama châ.

¹⁴ Cha cha noâhchhihpa châ vei, Sâtâ chhao ta khaihna vâlyuhchâpa hawhta anosasyh ta â tao tyh.

¹⁵ Chavâta Sâtâ chakaotuhpazy ta siana chakaotuhpazy hawhta âmosasyh amâ tao hrapa cha, noâhchhihpa châ vei. Ama chhâna cha ama hmotaopa hawhta a châ aw.

Lyuhchâpa raihria liata Pawla pasataonazy

¹⁶ Ei rei heih aw, ahy hmahta ahrupa ta na rao khah ei sy. Eina rao hapa chhao ei chi ta, ahrupa hawhta na pachâ u la, a chyhta ei vaw palai pâ tua aw.

¹⁷ Ei bie reipa he Abeipa rei awpa chi la châ vei. Ahrupa hawhta apalaina bie ngâh buluhpa ta ei reih.

¹⁸ Chyhsa hluhpi ta ama sapa lâ kyh amâ palaikhei kawpa vâta, kei chhao ei vaw palaikhei hra tua aw.

¹⁹ Nâmo la asopa nama châpa vâta, ahrupazy chhao palôh pha kawpa ta nama chhyh thai!

²⁰ Chyhsa ta sei ta cha tao ei sala, cha nie khai ha ei sala, cha tlybai ei sala, âmo hmia a pasah ei sala, nama hmia liata cha chabaih ei sala, nâmo la nama chhyh thei.

²¹ He kyh liata, keimo la eima chiehlei kaw, a phih va na, ei no chhao a za kaw. Châhrasala chyhsa ta â palaikhei ngâhpa maih cha, ahrupa bie rei ta reih aw sah la, kei chhao ta ei palaikhei ngâh hra.

²² Hebrai chyhsa ama châ ma? Kei chhao ei châ. Izarei chyhsa ama châ ma? Kei chhao ei châ. Abarahâ pathla ama châ ma? Kei chhao ei châ.

²³ Krista chakaotuhpazy ama châ ma? Âmo hlâta ei châ via. Ahrupa bie rei ta reih aw sah la, âmo hlâta hriapasa via syulyu na ta, patâh hluh viapa châ na ta, a ei rei tiah lei ta chhei hluh viapa châ na ta, thi theina duahmo chhao ei tyh hluh via syulyu.

²⁴ Zuzy ku liata chheina ei sypalih tloh nawpa ei kha byuhpa ta, cha hawhpa chheina cha ei pangawh tlai ei tyh.

²⁵ Ei thôh sôsi ta chheipa châ na ta, ei kha alô ta vawhpa ei châ. Ei thôh balyh raona a tyh na ta, zâ kha nata noh kha tilaipi liata phao pahaipa ta ei y.

²⁶ Ei hluhpi ei khitlynazy liata, chavahzy liata chichhihna, hraotuhpazy liata chichhihna, ei chiheihzy liata chichhihna, Zenitaizy liata chichhihna, khihpi liata chichhihna, khitaw liata chichhihna, tilaipi liata chichhihna nata unawh pakheipazy liata chichhihnazy ei tyh tyh.

²⁷ Riethei rairunazy thata a tyh na ta, a mô leipa ta zâ hluhpi y na ta, nodi dâhphipa ta ei hluhpi y na ta, kâhvileipa ta y tyh na ta, chasipa nata thluahruapa ta ei hluhpi ei y.

²⁸ Chazy nata hmo hropazy hleikhô ta, Awnanopa zydua pachâna ta noh chareih eina vi.

²⁹ Ahy ma chiehleipa ta y ta, chiehleikheipa ta ei y vei tly? Ahy ma pahluasapa ta y ta, hiehâhkhei leipa ta ei y tly?

³⁰ A palaikhei awpa ei châ khiahta cha, ei chiehleina a palâsatuhpa hmozy ei palaikhei aw.

³¹ Abeipa Zisu Krista châta Khazohpa nata Paw a châpa, chhâzaw ta reithaipa Khazohpa ta haipa bie ei rei leizie a pahno.

³² Dâmaskâ khih liata deikua cha, Bei Aretâ ry liata ryureituhpa ta na patu awpa ta Dâmaskâ khihpi cha pavaisa ta,

³³ châhrasala thokhy opy tawhta hrâbyh ta na pathliah ei ta, a ku tawhta ei boh haw.