2 KAWRINI 10 - Mara Bible RV (BSI)

Pawla areipasiana

¹ Kei, Pawla ta Krista nôphana nata nônaina ta ei châ haw ei. Nama hnohta ei y nota a reisi kaw tyh na ta, ei sie tawhta deikua cha, nama chô liata ei riah a pha kaw tyh.

² Ei vy tita, he khizaw hrozie ta a hrohpa hawhta miah a pachâpa thokhazy chô liata riahpha awpa hawhta ei riah a pha thei awpa ei pangiasa leipa vâta, eina pachâ thai awpa ei chi ta ei châ haw ei.

³ Khizaw liata y hra sih la, khizaw adyuhna hawhta a dyuh ma pi.

⁴ Eima chariah chhaichhizy cha khizaw chariah chhaichhizy châ leipa ei ta, thokhy a i ngaitapazy parao nawpa ta Khazohpa hmotaotheina a châ.

⁵ Aeichhiana nata pachâna sâhpa hmâpa ta Khazohpa pahnona pakhâ achhuahnazy parao pi ta, pachâna to rai Krista reingiahna lâta eimâ chhi tyh.

⁶ Nama reingiahna pakipa a châ tita, reingiah leina zydua hrie awpa eimâ mâ thlâh haw.

⁷ Nama mohmô liata a ypazy kha moh tua u. Ahy rai Krista eih a châpa â lôh khiahta cha, ano Krista eih a châpa hawhta, keimo chhao Krista eih eima châzie pahno chanei heih mawh sy.

⁸ Nama rao nawpa châ leipa ta, nâmo taopathi nawpa ta Abeipa ta biehneina eina piepa he ei palaikhei pathlei hapa chhao ta, ei noza aw vei.

⁹ Ei châpaphaopazy ta nâmo pachhiparypa hawhta a lâ awpa khoh va na.

¹⁰ Thokha ta, “A châpaphaopazy a hri ta, a tha chhao tlô ta, a pôhpa deikua chiehleipa châ ta, a biereipa chhao khâpa hmah châ vei,” eina tah ei.

¹¹ Nama hnohta eima y vei nota châropa ta eima reipa cha, nama hnohta eima y nota eima hmotaopa a châzie, cha hawhpa chyhsa chata pahno mawh sy.

¹² Âmosasyh a rei paphapa thokhazy cha a rei pâ ngâh leipa pi ta, a pakho ngâh hra ma pi. Châhrasala a thlie raihrie ei ta, amâ pakho tyhpa deikua he cha, novâhna amâ phahlazie a palâsa.

¹³ Keimo la eima hriana su khô lâ a palaikhei aw ma pi. Khazohpa ta chakao nawpa su miah a piepa chhôh liata a ypa deita eimâ palaikhei aw. Nama hnohta thâtihpha cha chho awpa chhao he, Khazohpa ta miah a piepa a châ.

¹⁴ Keimo ta thâtihpha eima chho leina liata eima vaw pakawh laihpa châ vei. Keimo he thâtihpha chho awpa ta nâmo lâ a vaw tlô tua chaipa eima châ.

¹⁵ Eima hriana su khô lâta mohropazy hriapa a palaikhei beih ma pi. Namâ ngiapâna laiseih lymâ aw ta, nama hry liata eima chakaona chhao a kawh via lymâ aw tahpa hnabeiseihna tlao eima hnei.

¹⁶ Chatanachata mohropa chakaona su liata raihria chiehpa a palaikhei leipa ta, nama khô lâ râhzy liata thâtihpha eima chho thei aw.

¹⁷ “A palaipa maihta Abeipa a palaikhei mawh sy.”

¹⁸ Anosasyh a reipaphapa ta reithaina hlao hlei leipa ta, Abeipa ta a reipaphapa ta reithaina a hlao tyh.