2 KAWRINI 1 - Mara Bible RV (BSI)

Anaohna

¹ Pawla, Khazohpa khozie ta Krista Zisu lyuhchâpa nata eima unawhpa Timawthy ta Kawrini khih liata Khazohpa Awnanopa nata Akai râh liata mopathaihpazy eima châ naoh.

² Khazohpa eima Paw nata Abeipa Zisu Krista tawhta ngiachhiena nata thlalôhna nama hnohta y mawh sy.

Thlalôhna to Khazohpa

³ Eima Beipa Zisu Krista Khazohpa nata Paw a châpa, zawngiahna Paw nata thlalôhna to Khazohpa cha reithaipa ta y mawh sy.

⁴ Ano cha eima riethei taona zydua liata thlah miah palôhtuhpa a châ. Chatanachata keimo chhao, Khazohpa ta thlah miah a palôhna cha hmâpa ta, rietheina kheihawhpa rai a taopazy thlah eima palôh thei hra aw.

⁵ Krista pasa taona hawhta eima tao hluh via nahta, Krista liata eima thlalôhna a pôh rili.

⁶ Pasataopa ta eima y khiahta cha, nâmo thlalôh nawpa nata pachha nawpa châ ta, thlahpalôhpa ta eima y khiahta cha, nâmo thlalôh nawpa a châ. Cha thlalôhna cha keimo pasa taopa hawhta palôh pasi ngaitapa ta pasa nama tao hrana liata nama hmô tyh.

⁷ Eima pasa taona miah hlykheipa nama châpa hawhta, eima thlalôhna chhao miah a hlykhei awpa nama châpa eima pahno. Chavâta nâmo châta eima hnabeiseihna â i ngaita.

⁸ Unawh saih u, Asia râh liata pasa eima taopa kyh kha nama pahno lei awpa khoh ma pi. Eima tao thei awpa hlâta a hri viapa ta miah vi ta, hro awpa chhao a ngâ khao ma pi.

⁹ Hmeiseihta la, thi awpa ta eimâ pachâ hapa a châ. Châhrasala keimo a ngâ leipa ta, athihpa pathyutuhpa Khazohpa eima ngâ thei nawpa ta, kha hmo kha a vaw ypa a châ.

¹⁰ Khazohpa ta thina chichhihpa tawhta miah pachha ha ta, miah pachha heih aw ta, miah a pachha lymâ aw tahpa eima hnabeiseihna ano liata eima pahnieh.

¹¹ Chyhsa hluhpi thlahchhâna vâta byhnâ to pi ta, chyhsa hluhpi ta keimo vyuhpa ta alyna bie ama rei thei nawpa ta, thlahchhâ miah bao muh vy.

Pawla khitly â hnawh

¹² He he eimâ palaikhei: Khizaw sona ta châ leipa ta, Khazohpa ngiachhiena vâta, he khizaw liata nata nâmo liata pathaihna nata Khazohpa liata adona ta eima hro tyhpa kha, eima chhie na pha pahnona ta miah a pahnokhei.

¹³ Nama rei thai awpa nata nama pahno thai awpa dei leipa cha, bie hropa nâmo lâ vaw roh ma pi. Chavâta nama pahno thai khai aw tahpa ei hnabei a seih.

¹⁴ A rakhapa ta miah nama pahnopa kha, miah nama pahno pasia ha bâ. Chavâta eima Beipa Zisu noh liata miah a palaikhei aw ei chi ta, keimo chhao eima châ palaikhei hra aw.

¹⁵ Cha kyh liata ei sia thlâh hapa vâta, ngiachhiena a lie no ta nama to thei nawpa ta, nâmo lâ a vy tua awpa ei chhuah.

¹⁶ Mâsidônia lâ ei siena liata cha vaw tly pâ ta, Mâsidônia tawhta nâmo lâ vaw kua heih ta, nâmo ta Zudia lâ eina pathlie awpa ei chi ei chhuah.

¹⁷ Ei chhuahpa pananopa a châ no kha, ei palôh â i leizie a palâsapa ma ei châ? Chyhsapa lâ tawhta achhuahna tao ta, cha nota, “A châpa cha, a châpa” tah ta, “Â châ leipa cha, a châ leipa” a tah thlâhthlipa ma ei châ?

¹⁸ Khazohpa ngâ â chhihpa hawhta, nâmo lâta eima bie chhao, a châh ta “A châ” tah ta, a châh ta “Châ vei” tahpa hawhpa châ vei.

¹⁹ Kei nata Timawthy nata Silvanâ ta, nama hry liata eima phuahpa Khazohpa Sawchapawpa Zisu Krista kha, “A châ” nata “Châ vei” châ pakaoh vei. Ano liata cha khati no rai ta “A châ” tahpa a châ lymâ.

²⁰ Khazohpa bietai zydua cha Krista liata, “A châ” tahpa ta â vaw ki khai haw. Chavâta ano moh ta nata ano rônah nawpa ta, Khazohpa lâ Amen eima tah tyh.

²¹ Krista liata nâmo nata hmaohkha ta miah a paduapa nata sathaw miah a thupa cha, Khazohpa ano tlai a châ.

²² Ano eih eima châpa miah ngiatuhpa chhao châ ta, bie ataihna châta a Thlahpa eima palôh liata miah pietuhpa a châ hra.

²³ Nâ pahnokheituhpa châta Khazohpa ei aw. Nâmo cha patypamâ awpa ei khoh leipa vâta Kawrini khih lâ kha ei vy leipa a châ.

²⁴ Namâ ngiapâna chô liata biehnei a chhuah leipa pi ta, namâ ngiapâna liata â ipa ta namâ duapa vâta, namâ ly nawpa ta eima cha hrialâhpa tlao a châ.