2 ABEIZY 9 - Mara Bible RV (BSI)

Izarei bei Zehu

¹ Hrohsopa Elaisâh ta hrohsopa sahlao sawchapawzy hry liata pakha aw ta, a hnohta, “Na chai a saih la, he sathaw byh he na ku ta chaba la, Ramôkilia khih lâ vawh teh.

² Na kei tlô nahta, Nimsi sawchapawpa Zehôsaphâ sawchapawpa Zehu kei tlua mah y. A kei ngia la, a unawhzy hry tawhta pathyu la, chhôhpadâhpa chhôh chaipa liata a ngiakhei mah y.

³ Chatawhcha sathaw byh la la, a luh liata hry la, a hnohta, ‘Abeipa ta hetana heta a tah, Izarei chô liata bei châta sathaw ei cha thu,’ tah mah y. Chatawhcha ochhi pahy la, a râ ha mah y. Na y parei awpa châ vei,” tah ta.

⁴ Chatanachata hrohsopa chakaotuhpa satliapa cha Ramôkilia lâ sie ta.

⁵ A kei tlô nahta, pheisaih hyutuhpazy amâ tyupahmaoh hai no châ ta, ama hnohta, “Hy pheisaih hyutuhpa y, na hnohta bie rei awpa ei hnei,” tah ta. Zehu ta, “Ahy hnohna heta maw?” tah ta. Ano ta, “Hy pheisaih hyutuhpa y, nâma châta a châ,” tah ta.

⁶ Zehu cha thyu ta, o chhôh lâ a ngia ta. Satliapa ta a luh liata sathaw hry ta, a hnohta, “Zehôvah, Izarei Khazohpa ta hetana heta a tah: Abeipa phopi Izarei chô liata bei châta sathaw ei cha thu.

⁷ Na zibeipa Ahabâ chhôhkhazy chhawh pathlah khai aw chi ta, chatanachata nâ chakaotuhpa hrohsopazy thisaih nata Abeipa chakaotuhpa zydua thisaih phuh cha Zezebel chô liata ei lapa a châ aw.

⁸ Ahabâ chhôhkha zydua ama leidia khai aw. Izarei liata Ahabâ chhôhkha chapaw saw maih cha, sei chhao, khotalaipa chhao, ei chhawh pathlah khai aw ei.

⁹ Ahabâ chhôhkha cha Nebâ sawchapaw­pa Zerôbaw chhôhkha hawhta tao aw na ta, Ahiza sawchapawpa Bâsâ chhôhkha hawhta ei tao aw.

¹⁰ Zezabi cha izy ta Zezari râh liata chaih aw ei ta, a pabu awpa y aw veih ei,” tah ta. Chatawhcha ochhi pahy ta a râ ha ta.

¹¹ Zehu cha a zibeipa chakaotuhpazy lâ vaw pua ta, ama hry liata pakha ta a hnohta, “Ato a pha khai ma? Kha ahrupa kha khâpa vâta nâ lâ a vypa ma a châ tly?” tah ta. Zehu ta ama hnohta, “Nama pahnopa chyhsa châ ta, a bie reipa chhao nama pahno kha zaw,” tah ta.

¹² Âmo ta, “Pahno ma pi, miah chho teh,” tah ei ta. Zehu ta, “Abeipa ta hetana heta a tah: ‘Izarei chô liata bei châta sathaw ei cha thu,’ tahpa ta eina chho,” tah ta.

¹³ Chatawhcha chyhsa to ama chysia thlai pahluh ei ta, a phei tly nawpa kahmi liata phaw ei ta, chiahmie tô ei ta, “Zehu cha bei a châ,” tahpa ta awh ei ta.

Zehu ta Zôrâ nata Ahazia a thie

¹⁴ Chatawhcha Nimsi sawchapawpa Zehôsaphâ sawchapawpa Zehu ta Zôrâ cha arulâta tei pathao ta. Aramia bei Hâze toh awpa ta, Zôrâ nata Izarei zydua ta Ramôkilia khihpi cha vaih ei ta.

¹⁵ Bei Zôrâ deikua cha Aramia bei Hâze nata amâ dyuhna liata Aramia mo ta hmah ama paphaopa vâta a patlâ awpa ta Zezari khih lâ a lie ha ta. Zehu ta, “Bei ei châ awpa he nama khohpa tlai a châ khiahta cha, he thâtih he Zezari liata reih awpa ta ahy hmah khihpi ama puasai awpa châ leipa ta, nama parâsa awpa châ hra vei,” tah ta,

¹⁶ Zehu cha a talailih kiah ta, Zezari lâ sie ta. Zôrâ cha, cha liata a zia thlâh ha ta. Zudâh bei Ahazia chhao, Zôrâ tly awpa ta zu ta.

¹⁷ Zezari thokhy chô liata a duahpa riahvaituhpa ta Zehu py amâ vypa cha kei hmô ta, “Pheisaih py ei hmô,” tah ta. Zôrâ ta, “Âmo dy awpa ta arâ pheisaih pakha tuah la, ama hnohta, ‘Phana kyh a châ ma?’ kei tah mawh sy,” tah ta.

¹⁸ Chatanachata arâ pheisaih pakha ta kei dy ta, a hnohta, “Abei ta, ‘Phana kyh a châ ma?’ a tah,” tah ta. Zehu ta, “Phana cha khâpa ma na taona aw? A palie la, na vaw pazi teh,” tah ta. Riahvaituhpa ta, “Lyuhchâpa kha âmo lâ kei tlô tlai ta, châhrasala vaw kua khao vei,” tah ta.

¹⁹ Arâ pheisaih hropa pakha tuah heih ta, âmo lâ kei tlô ta, “Abei ta, ‘Phana kyh a châ ma?’ a tah,” tah ta. Zehu ta a chhy ta, “Phana cha khâpa ma na taona aw? A palie la, na pazi teh,” tah ta.

²⁰ Riahvaituhpa ta, “Ano chhao âmo lâ kei tlô ta, vaw kua khao vei. A talailih haohzie tawhta Nimsi sawchapawpa Zehu haohzie a lyu, a chatlie ngaitapa ta a haoh,” tah ta.

²¹ Zôrâ ta, “A chhuanoh teh u,” tah ta. A talailih a chhuanoh ei ta. Izarei bei Zôrâ nata Zudâh bei Ahazia cha ama talailih chyu kiapa ta kei pua ei ta, Zehu cha kei dy ei ta, Zezari khihpa Nâbô sadô liata a kei tyh ei ta.

²² Zôrâ ta Zehu a hmô nahta, a hnohta, “Zehu, phana kyh a châ ma?” tah ta. Zehu ta a chhy ta, “Na nô Zezebel sihryhna nata dyuthaina a hluh chhôh zydua cha, khâpa phana kyh ma na rei hra?” tah ta.

²³ Zôrâ cha ta a palie ta, a râ ta, Ahazia hnohta, “Dôveina, Hy Ahazia!” tah ta.

²⁴ Zehu cha a tha zydua papuapa ta a libaw a kei ta, Zôrâ cha a phiahkao nata a phiahkao likawh liata kei ka ta, châtai cha a châh-ao liata a ngia ta, a talailih liata a chahyh ta.

²⁵ Zehu ta a pheisaih hyutuhpa Bidakâ hnohta, “Chalo la, Zezari khihpa Nâbô sadô liata kei thy teh. Nâ nata kei ta a paw Ahabâ pazipa ta talailih eima kia nota, Abeipa ta ano hriena kyh a vaw reipa kha a thei thlâh ha mah y.

²⁶ Abeipa ta, ‘Zâhnia Nâbô thisaih nata a sawchapaw­zy thisaih ei hmô. He su liana tlai heta viari ei cha thô aw,’ a vaw tah hapa a châ. Chavâta tahmâ Abeipa bie hawhta, chalo la, he lei su liana tlai heta thy teh,” tah ta.

Zehu ta Ahazia a thie

²⁷ Zudâh bei Ahazia ta cha cha a hmô nahta, Bethâkâ khih lâ a râ ta. Zehu ta a chadai ta, “Ano chhao kha thie hra teh u,” tah ta. Ibalia khih kiapâh Kurâ lâ khyna liata a talailih liata ka ei ta. Mekidô khih lâ a râ ta, cha liata thi ha ta.

²⁸ A chakaotuhpazy ta Zerusale lâ talailih ta siekhei ei ta, Dâvi khihpi liata ano thlâ liata a pathlatuhpazy hnohta ama pabu haw.

²⁹ Ahabâ sawchapawpa Zôrâ kô hrawh hleikha â bei kô ta, Ahazia cha Zudâh chô liata â bei pathao.

Zehu ta Zezebel a thie

³⁰ Zehu cha Zezari khih kei tlô ta, cha thâtih cha Zezebel ta thei ta. A mo kiahzy rôh hnia ta, a luh a tobi ta, opy tawhta vaw moh ta.

³¹ Zehu cha thokhy chhikao â kei ngia nahta, a hnohta, “Nâ, Zimri, na zibeipa a thietuhpa, phana kyh a châ ma?” za tah ta.

³² Zehu cha opy lâ mohmia kaw pasaih ta, “Ahy ei chhâh a châ chi? Ahy?” tah ta. Hrilyupa pano pathôh ta za moh ei ta.

³³ Zehu ta, “Kha chanô kha za thy pathla teh u,” tah ta. Za thy pathla ei ta. Pâhchhô nata arâzy liata a thi a pie ta, arâzy ta ama tlysao haw.

³⁴ Zehu cha abei o chhôh lâ a ngia ta, niepa ta, doh ta, “Kha chhiesapa chanô kha kei pasopanô teh u, abei sawchanô pakha châ tlôh ta, kei pabu ha teh u,” tah ta.

³⁵ Châhrasala pabu awpa ta ama vaw nahta, a luh ru nata a pheizy nata a kupazahzy tah leipa ta cha khâpa hmah hmô khao leipa ei ta.

³⁶ A vaw lie ei ta, Zehu cha chho ei ta, Zehu ta, “Cha cha Abeipa bie a châ. A chakaotuhpa Tisabi chyhsa Elaizâh hmâpa ta Abeipa ta, ‘Zezabi sapa cha izy ta Zezari râh liata chaih aw ei ta,

³⁷ he he Zezebel a châ tahpa chyhsa ta ama pahno khao lei nawpa ta, a ri cha Zezari râh liata lyu liata ie hawhta a y aw,’ tahpa a reipa kha a châ hih,” tah ta.