2 ABEIZY 8 - Mara Bible RV (BSI)

Sunâ chanô râh

¹ Elaisâh ta a sawchapawpa a pahro heihpa chanô hnohna kha ta, “Thyu la, na chhôhkha chhao ta nama y theina su lâ kei y chy muh vy. Abeipa ta chakâhna aw ha ta, râh liana he kô sari chhôh chakâhna a tlô aw,” tah ta.

² Chanô cha thyu ta, Khazohpa chyhsa bie hawhta tao ta. A chhôhkhazy chhaota sie ta, Philistinâ mo râh liata kô sari chhôh kei y ta.

³ Kô sari chhâna liata, chanô cha Philistinâ mo râh tawhta vaw kua ta, abei lâ vawh ta, a o nata a lyu hnei heih awpa ta hiah ta.

⁴ Abei cha Khazohpa chyhsa chakaotuhpa Kehâzi hnohta, “Elaisâh ta hmo rônahpa a taopa zydua na chho tua,” tahpa ta a vaw chho hai no châ ta.

⁵ Elaisâh ta athihpa a pathyuna thâtih Kehâzi ta abei a chho hai nota, a sawchapawpa a pahro heihpa chanô chata a o nata a lyu abei hnohta vaw hiah ta. Kehâzi ta, “Ei zibeipa, Hy abei y, he he chanô cha a châ. He he Elaisâh ta a pahro heihpa a sawchapawpa cha a châ,” tah ta.

⁶ Abei ta chanô cha hiahri ta, chanô ta â dozie chho ta. Abei ta hyutuhpa pakha rao ta, a hnohta, “Ano eih zydua pie pakhua la, râh a puasai noh tawhta tahmâ taihta a lyuzy liata kô a veihpa zydua chhao pie pakhua khai mah y,” tah ta.

Aramia bei Hâze

⁷ Elaisâh cha Dâmaskâ lâ sie ta. Aramia bei Benhadâ cha vaw pasa ha ta. “Khazohpa chyhsa a vaw tlô” tahpa chho ei ta.

⁸ Abei ta Hâze hnohta, “Kuhria a chei la, Khazohpa chyhsa cha a kei hmô la, ano hmâpa ta Abeipa a kei saohiah la, a hnohta, ‘He pasana tawh heta ei tlâh thei aw ma?’ tahpa ta na hiahripa mah y,” tah ta.

⁹ Hâze cha Khazohpa chyhsa a hmô awpa ta sie ta. Kuhria châta Dâmaskâ liata hmo phapa to, râraoseihpa sypalih phao tlai phaopa ta. A tlô nahta, a hmiakô liata a kei duah ta, a hnohta, “Na sawchapawpa Aramia bei Benhadâ ta, ‘He pasana tawh heta ei tlâh thei aw ma,’ tahpa ta cha hiahri awpa ta nâ lâta eina vaw tuah,” tah ta.

¹⁰ Elaisâh ta a hnohta, “Sie la, a hnohta, ‘Na tlâh heih tlai aw,’ tahpa ta kei chho mah y. Châhrasala a thi tlai aw tahpa ta Abeipa ta eina pahmôsa,” tah ta.

¹¹ Khazohpa chyhsa ta Hâze cha a kâchhiena taihta a mo tawpâ ta. Chatawhcha Khazohpa chyhsa cha vaw cha ta.

¹² Hâze ta, “Ei zibeipa cha khazia ma a cha tly?” tah ta. Khazohpa chyhsa ta a chhy ta, “Izarei sawzy chô liata hmo pha leipa na tao awpa ei pahnopa vâta a châ. Ama thokhyzy rao aw chi ta, ama satliazy zaozi ta thie aw chi ta, ama hawtizy taichheih aw chi ta, saw phaohpa ama chanôzy py na pahy aw,” tah ta.

¹³ Hâze ta, “Châ chakaotuhpa he khâpa ma a châ tly, i deita châ ta, kheihta ma cha hawhpa hmo rônahpa cha a tao thei aw?” tah ta. Elaisâh ta a chhy ta, “Aramia chô liata nâ bei aw tahpa Abeipa ta eina pahmôsa haw,” tah ta.

¹⁴ Hâze cha Elaisâh tawhta pua ta, a zibeipa kô a tlô nahta, a zibeipa ta, “Elaisâh ta khâpa a cha chho?” tah ta. Ano ta, “Na tlâh heih tlai aw, tahpa ta eina chho,” tah ta.

¹⁵ Châhrasala a mylâ ta poh chhapa la ta, ti liata ny ta, cha chata Benhadâ cha a thina taihta a hmia pahly ta. Chatanachata Hâze cha ano su liata a bei ha ta.

Zudâh bei Zehôrâ

¹⁶ Zehôsaphâ Zudâh bei a châ nota, Ahabâ sawchapawpa Zôrâ cha Izarei liata a bei ta, â beina kô pangawhna liata Zehôsaphâ sawchapawpa Zehôrâ cha Zudâh liata abei pathao ta.

¹⁷ Zehôrâ cha kô sythôh nata kô no a châ nota a bei pathao ta, Zerusale liata kô charie â bei.

¹⁸ Ahabâ sawchanô lapinô ta a hneipa vâta, Ahabâ chhôhkha taozie hawhta, Izarei beizy lâpi a chhi hrapa ta, Abeipa mohmô liata hmo pha lei ngaitapa tao ta.

¹⁹ Châhrasala Abeipa ta Dâvi nata a pathlazy cha chhâzaw ta meiôh pie awpa ta bie â vaw taih hapa vâta, a chakaotuhpa Dâvi zawhzi ta Zudâh cha pahleipadia khoh vei.

²⁰ Ano â beina daihti liata Edômâ ta Zudâh ryureina cha a dyuh ta, ano eih ta bei a tao ei ta.

²¹ Zôrâ cha Zairâ khih lâ a talailih zydua chhaota sie ta. Zâ ta pua ta, ano nata a talailih hyutuhpazy ta âmo a dôhpa Edômâ mo cha a kei dyuh ei ta. A pheisaihzy deikua cha ama poh o chyu lâta a râ khai ha ei ta.

²² Chatanachata Edômâ cha tanoh taihta Zudâh â dyuh ngâ thlâh haw. Cha daihti liata Libnâ khi chhao Zudâh a dyuh ha hra ta.

²³ Zôrâ thâtih nata a hmotaopa hropa zydua cha Zudâh beizy thâtih rona châbu liata ropa a châ.

²⁴ Zôrâ cha a pathlatuhpazy hnohta a mô ta, a pathlatuhpazy hnohta Dâvi khihpi liata pabu ei ta, a sawchapawpa Ahazia ta ano su liata â bei.

Zudâh bei Ahazia

²⁵ Ahabâ sawchapawpa Izarei bei Zôrâ a beina kô hrawh hleinona liata, Zehôrâ sawchapawpa Ahazia cha Zudâh liata a bei pathao ta.

²⁶ Ahazia cha kô kih nata kô nopa a châ nota a bei pathao ta, Zerusale liata kô kha â bei. A nô moh cha Athaliah châ ta, Izarei bei Ômri samohnô a châ.

²⁷ Ahabâ chhôhkha piahpa a châpa vâta, Ahabâ chhôhkha taopa hawhta, Ahabâ chhôhkha lâpi a chhihpa ta, Abeipa mohmô liata hmo pha lei ngaitapa tao ta.

²⁸ Ahabâ sawchapawpa Zôrâ hnohta Ramôkilia khih liata Aramia bei Hâze adyuhna lâ sie hra ta. Zôrâ cha Aramia mo ta hmah vaw paphao ei ta.

²⁹ Bei Zôrâ cha Aramia bei Hâze amâ dyuhna liata Aramia mo ta Râmâ khih liata hmah ama paphaopa cha, Zezari khih liata a patlâ awpa ta kua ta. Zudâh bei Zehôrâ sawchapawpa Ahazia cha Ahabâ sawchapawpa Zôrâ a pasapa vâta a hmô awpa ta Zezari khih lâ zu ta.