2 ABEIZY 7 - Mara Bible RV (BSI)

Elaisâh ta niedo a y awpa bie â taih

¹ Elaisâh ta, “Abeipa bie he thei teh u. Abeipa ta hetana heta a tah: Mylâ tahmâ ti heta Samâri thokhy chhikao liata viahdie dipa saikhua hmo kha cha sekel miakha ta zuah aw ei ta, bâli sâh saikhua hmo no cha sekel miakha ta ama zuah aw,” tah ta.

² Pheisaih hyutuhpa, abei ta a ku liata â pahniehpa ta Khazohpa chyhsa hnohta, “Abeipa ta avâ opyzy a pahypa chhao ta, cha hawhpa hmo cha a y thei aw ma?” tah ta. Khazohpa chyhsa ta, “Na mo tlai ta na hmô aw, châhrasala nie aw va chi,” tah ta.

³ Thokhy angiana chhikao kiapâh liata phawhpa chapaw papalih y ei ta. Âmo nata âmo a chho ei ta, “Khazia ma thi awpa hâpa ta he liata eimâ tyuh thlâh ha tly?

⁴ ‘Khihpi chhôh lâ a ngia ei suh u,’ tah mawh sih la, khihpi chakâh tlôh ei ta, cha liata thi pyly aw pi. He liata eimâ tyupa chhao ta, thi pyly aw pi. Chavâta a vy teh u, Aramia pheisaihzy riehmo lâ vawh thlâh tua suh u. Eima hrona miah ama pahlôh khiahta cha, hroh aw pi ta, miah ama thie khiahta cha, cha liata thi thlâh ha lah vâ pi,” tah ei ta.

⁵ Chatanachata Aramia mo riehmo lâ vaw awpa ta azo hrahri ta pua ei ta. Aramia mo riehmo tytuapa ama tlô nahta, ahy hmah vaw y leipa ei ta.

⁶ Abeipa ta Aramia pheisaihzy cha talailih pyuzy, arâ pyuzy, pheisaih hluhpi pyuzy patheisa ta, chavâta âmo nata âmo a chho ei ta, “Pachâ teh u, keimo miah siehnao awpa ta, Izarei bei ta Hiti beizy nata Izi beizy a hrua ha ei hih,” tah ei ta.

⁷ Chatanachata thyu ei ta, azo hrahri ta a râpai ha ei ta. Ama poh ozy, ama arâzy, ama alâzy a râsai ei ta, ama riehmo cha a ualua ta siesai ei ta, ama hrona pabohsa awpa ta amâ râpai khai hapa vaw châ ta.

⁸ Phawhpazy cha riehmo tytuapa ama kei tlô nahta, poh o miakha chhôh lâ a ngia ei ta, niepa ta doh ei ta. Cha liata tâkâ nata ngôh nata chysiazy la ei ta, pua ei ta, kei nyu ei ta. Vaw kua ei ta, poh o hropa liata a ngia heih ei ta, cha liata hmozy cha la ei ta, pua ei ta, kei nyu ei ta.

⁹ Chatawhcha a chhohia ei ta, “Eima tao chhei kaw na. Tanoh he thâtih pha tlô noh châ ta, he hawhta a chalihpa ta khihdeipa eima hâ thlâh ha khiahta cha, hriena eimâ tyh aw. Chavâta tahmâ a vy teh u, abei chhôhkhazy kei chho ei suh u,” tah ei ta.

¹⁰ Vawh ei ta, khihpi ochhi vaituhpazy awsao ei ta, ama hnohta, “Aramia mo riehmo lâ vawh pi ta, cha liata ahy hmah vaw y leipa ei ta, chyhsa pyu rai y leipa ta, arâzy nata alâzy deita hraipa ta y ei ta, poh ozy cha a y ualuapa ta a vaw y thlâh haw,” tah ei ta.

¹¹ Chatawhcha chhikao vaituhpazy ta tlâh awh ei ta, cha thâtih cha abei o lâ kei chho ei ta.

¹² Abei cha zâ ta thyu ta, a chakaotuhpazy hnohta, “Aramia mo miah ama taonazie ei cha chho aw ei. Eima nodizie he pahno ei ta, chavâta ‘Khihpi tawhta ama vaw pua tita, ahrohpa ta patu aw pi ta, khihpi chhôh lâ eimâ ngia aw,’ tahpa pachâpa ta, lyurâhpa liata a nyu awpa ta ama riehmo ama puasaipa a châ hih,” tah ta.

¹³ A chakaotuhpa pakha ta a chhy ta, a hnohta, “Chyhsa thokha tuah sih la, khihpi liata arâ a y tlakaihpazy hry liata pô pangawh he a chhi ei sala, kei moh tua mawh ei sy. Khihpi chhôh liata a ypazy cha Izarei zawpi a thi hapa hawhta pachâpa châ pi ta, chavâta a puapazy chhao, khihpi chhôh liata a ypazy chhao, ananona y khao vei” tah ta.

¹⁴ Talailih arâ pô no a chhi ei ta, abei ta âmo cha Aramia pheisaihzy a chadai awpa ta tuah ta, ama hnohta, “Sie u la, kei moh tua teh u,” tah ta.

¹⁵ Zawdâh taih a kei chadai ei ta, amâ para tupa vâta Aramia mo thypa chysiazy nata chhaichhizy lâpi tlykha ta y lymâ ta. Lyuhchâpazy cha vaw kua ei ta, abei cha chho ei ta.

¹⁶ Chatanachata zawpizy cha pua ei ta, Aramia mo riehmo cha hrao ei ta. Abeipa bie hawhta, viahdie dipa saikhua hmo kha cha sekel miakha ta zuapa châ ta, bâli sâh saikhua hmo no cha sekel miakha ta zuapa a châ.

¹⁷ Abei ta pheisaih hyutuhpa, a ku liata â pahniehpa cha thokhy chhikao vaituhpa ta tao ta. Zawpi ta ano cha thokhy chhikao kiapâh liata tlysao ei ta, Khazohpa chyhsa ta ano lâ abei â zu nota a reipa hawhta thi ha ta.

¹⁸ Khazohpa chyhsa ta abei hnohta, “Mylâ tahmâ ti heta Samâri thokhy chhikao liata bâli saikhua hmo no cha sekel miakha ta zuapa châ aw ta, viahdie dipa saikhua hmo kha cha sekel miakha ta zuapa a châ aw,” a tah nota,

¹⁹ pheisaih hyutuhpa ta Khazohpa chyhsa cha a chhy ta, “Abeipa ta avâ opyzy a pahypa chhao ta, cha hawpa cha a y thei aw ma?” tah ta. Elaisâh ta, “Na mo tlai ta hmô aw chi ta, châhrasala nie aw va chi,” tah ta.

²⁰ Cha hawhna tlai chata a chô liata vaw tlô ta, chyhsazy ta thokhy chhikao kiapâh liata tly ei ta, a thi hapa a châ.