2 ABEIZY 6 - Mara Bible RV (BSI)

Ti tawhta ahrei â kaw pho

¹ Hrohsopa sahlao sawchapawzy ta Elaisâh hnohta, “Moh tua, na kiapâh liata eimâ tyu tyhna su he eima châta a chyh tu haw.

² Zawdâh lâ zu sih la, cha liata tho za la chyu sih la, eimâ tyu pahmaoh nawpa su cha liata za tao suh vy,” tah ei ta. Elaisâh ta a chhy ta, “Sie muh vy,” tah ta.

³ Ama hry liata pakha ta, “Ngiachhiepa ta châ chakaotuhpazy hnohta palôhtlâhpa ta za sie hra mah y,” tah ta. Elaisâh ta, “Ei za sie hra aw,” tah ta.

⁴ Chatanachata ama hnohta sie hra ta. Zawdâh ama tlô nahta, tho cha thlu ei ta.

⁵ Chyhsa pakha cha tho a thlu nota ahrei ti liata tla ha ta, “Cha rimâ cha, ei zibeipa! Chyhsa ahrei ei hlâpa châ ta,” tah ta.

⁶ Khazohpa chyhsa ta, “Khataih liata a tla?” tah ta. A tlana su pahmô ta, Elaisâh ta thody chhawh ta, cha liata za thy ta, thua cha a kaw pho ha ta.

⁷ Elaisâh ta, “A huah teh,” tah ta, a ku kei paza ta ahrei cha a huah ta.

Mei talailih nata arâzy

⁸ Aramia bei ta Izarei a dyuh ta, a chakaotuhpazy a saohiah ta, ama hnohta, “Cha su, kha su liata riehmo ei paryh aw,” tah ta.

⁹ Khazohpa chyhsa ta Izarei bei lâ bieta ta, a hnohta, “Cha su cha chapia khuh vy, Aramia mo ta cha lâ cha ama zu hai,” tah ta.

¹⁰ Izarei bei ta Khazohpa chyhsa ta a chhopa su cha chyhsa kei pamo pathlisa tyh ta. Cha hawhna chata zikyu a râ tyh ta. Chatanachata Izarei bei cha, ei kha ei no dei châ leipa ta, ei hluhpi â pabohsa haw.

¹¹ Cha kyh liata Aramia bei cha a palôh nôpo kaw ta. A chakaotuhpazy aw ta, ama hnohta, “Eima hry liana heta ahy ma Izarei bei chhâh a châ tahpa na chho aw veih ei chi ma?” tah ta.

¹² A chakaotuhpazy hry liata pakha ta, “Ahy hmah châ ma pi, Hy ei zibeipa abei y. Izarei liata a ypa hrohsopa Elaisâh ta na chhôhpadâhpa chhôh liata na reipazy Izarei bei a chho tyhpa tlao a châ,” tah ta.

¹³ Abei ta, “Khataih liata ma a y? Cha hrohsopa cha kei tlua teh u. Chyhsa tuah aw na ta ei patusa aw,” tah ta. “Dôthâ liata a y,” tahpa ta chho ei ta.

¹⁴ Chatanachata arâzy, talailihzy nata pheisaih hluhpi tuah ta, cha lâ cha zâ ta sie ei ta, khihpi cha dôh ei ta.

¹⁵ Khazohpa chyhsa chakaotuhpa cha mydi kari ta thyu ta, kei pua ta, pheisaihzy ta arâzy nata talailihzy chhaota khihpi ama dôh khai hapa hmô ta. Chakaotuhpa ta, “Cha rimâ cha, ei zibeipa! Kheihta eima tao aw?” tah ta.

¹⁶ Elaisâh ta, “Chi khah y, âmo chhâh a châpa hlâta keimo chhâh a châpa ama hluh via mâh tâh,” tah ta.

¹⁷ Chatawhcha Elaisâh cha thlahchhâ ta, “Hy Abeipa y, a hmô thei nawpa ta a mo pavâsa mah y,” tah ta. Abeipa ta chakaotuhpa mo cha pavâsa ta. Tlâh cha mei talailihzy nata arâzy ta biepa ta, Elaisâh ama chadôpa hmô ta.

¹⁸ Aramia mo ano lâ amâ zu nahta, Elaisâh cha Abeipa lâ thlahchhâ ta, a hnohta, “He chyhsazy he ama mo pachaosa mah y,” tah ta. Elaisâh thlahchhâna hawhta, cha chyhsazy cha Abeipa ta ama mo pachaosa ta.

¹⁹ Elaisâh ta ama hnohta, “He he lâpi châ leipa ta, he he khihpi châ vei. Na zi teh u, nama tluapa chyhsa lâ cha ei châ chhi aw ei,” tah ta. Chatanachata âmo cha Samâri lâ a chhi ha ta.

²⁰ Samâri khih amâ ngiapata nahta, Elaisâh ta, “Hy Abeipa y, ama hmô thei nawpa ta, he chyhsazy he ama mo pavâsa mah y,” tah ta. Abeipa ta ama mo pavâsa ta, Samâri khihpi liah liata ama ypa hmô ei ta.

²¹ Izarei bei ta âmo cha a hmôpa nahta, Elaisâh hnohta, “Ei pâ, ei thie aw ei ma? Ei thie aw ei ma?” tah ta.

²² Elaisâh ta, “Na thie awpa ei châ vei. Patu chiehpazy cha na zaozi nata na libaw zy ta na thie aw ei ma? Ama hmiakô liata viahchhâ nata ti tlao vaw soh teh. Niepa ta doh ei sala, ama zibeipa lâ a lie heih mawh ei sy,” tah ta.

²³ Izarei bei ta âmo châta kyhchhi tao ta, niepa ta ama do khai nahta, âmo cha pasiesa ta, ama zibeipa lâ a lie ha ei ta. Chatanachata Aramia mo cha Izarei râh lâ hrâsiepa ta za chho khao veih ei.

Samâri khihpi pachhana

²⁴ Cha hnôhlâ ta Aramia bei Benhadâ ta a pheisaih zydua pakhy ta, Samâri khihpi dôh ta.

²⁵ Samâri khihpi cha ama dôh hapa vâta, khihpi liata chakâh mozoh tlô ta, alâ luh miakha cha tâkâ sekel sycharie ta zuah ei ta, vachhuh ie saikhua khophie cha tâkâ sekel tlaw pangawh ta zuapa a châ.

²⁶ Izarei bei cha thokhy chô liata â hlaihlâ hai nota, chanô pakha ta vaw awsao ta a hnohta, “Hy abei y, Hy ei zibeipa y, na bao teh,” tah ta.

²⁷ Abei ta, “Abeipa ta a cha bao leipa khiahta cha, khataih tawhta ma kei ta zua ei cha bao aw? Sawhri tawhta sâh y khao leipa ta, kre saohna tawhta kresawhti y khao vei,” tah ta.

²⁸ Abei ta, “Khâpa tymâna ma na hnei,” tahpa ta hiahri ta. Chanô ta a chhy ta, “He chanô heta ei hnohta, ‘Na sawchapawpa thyu teh. Ano cha tanoh nie aw pi ta, mylâ keima saw­chapawpa eima nie aw,’ tah ta.

²⁹ Ei sawchapawpa cha pasyuh pi ta, nie pi ta. A mylâ ta a hnohta, ‘Na sawchapawpa thyu bâ hra teh, ano cha eima nie bâ aw,’ tah na ta. Châhrasala a sawchapawpa cha a nyu haw,” tah ta.

³⁰ Abei cha chanô bie reipa a thei nahta, a chysiazy hrie ta. Zawpi ta kaw moh ei ta, abei cha a sapa padaihpa ta latho poh a bu ta, thokhy chô liata a hlaihlâ ngâpa kaw hmô ei ta.

³¹ Abei ta, “Saphâta sawchapawpa Elaisâh cha, tanoh a ngiatlâh liata a luh â bô thlâh ha chy khiahta cha, Khazohpa ta ei chô liata tao sala, cha hlâta tha viapa chhao ta tao mawh sy,” tah ta.

³² Elaisâh cha a o liata a tyuh thlâh ha ta, machâzy a hnohta a tyuh ei ta. Abei ta a hmia lâta chyhsa pakha tuah ta. Châhrasala lyuhchâpa a kei tlô hlâta Elaisâh ta machâzy hnohta, “Lianycheituhpa ta ei luh la awpa ta chyhsa a vaw tuapa hao nama hmô ma? Lyuhchâpa a vaw tlôpa nahta ochhi khaw khâh u la, ochhi liata khâchâ pakhâ ha muh vy. A zibeipa phei pyu ta a vaw pazi pâ haw,” tah ta.

³³ Cha hawhta a chho hai no ei ta, lyuhchâpa cha ano lâ a zu ta, a hnohta, “He hmo pha leipa he Abeipa vaw tuapa a châ hih! Khazia Abeipa cha ei hâ khao aw?” tah ta.