2 ABEIZY 5 - Mara Bible RV (BSI)

Nâmâ phawhpa patlâhna

¹ Aramia bei pheisaih hyutuhpa Nâmâ cha Abeipa ta Aramia mo pachhatuhpa ta a hmâ tyhpa vâta a zibeipa pachâna liata chyhsa zachhih ngaitapa nata mody kawpa châ ta. Ano cha chyhsa thatlôpa nata riahphapa châ ta, anodeikua phawhpa châ ta.

² Aramia mo cha a hlao hlao ta hrâsie tyh ei ta, Izarei râh tawhta chanô hawti pakha sei ta a vaw chhi ei ta, ano cha Nâmâ lapinô chakaotuhpa ta y ta.

³ Noh kha cha a zibeinô hnohta, “Ei zibeipa he Samâri liata hrohsopa pangai sala ei tah kaw dia! A phawhpa he a vaw patlâh thlâh ha awpa tlai,” tah ta.

⁴ Nâmâ cha a zibeipa lâ a kei ngia ta, a hnohta, “Izarei râh tawhta chanô hawtipa khata cha hawhta a tah,” tahpa ta chho ta.

⁵ Aramia bei ta, “Sie mah y, thlai sie mah y. Izarei bei lâta châ ei paphao aw,” tah ta. Nâmâ cha sie ta, tâkâ talent miahrawh nata ngôh sekel sâh charu nata chysia a patly awpa zo hrawh phaoh ta.

⁶ Châ cha Izarei bei hnohta pie ta, châ liata hetana heta ropa a châ: “He châ he na kô a vaw tlô tita, nâ chakaotuhpa Nâmâ he a phawhpa tawhta na vaw patlâh awpa ta nâ lâta ei vaw tuah tahpa vaw pahno mah y,” tahpa ta.

⁷ Châ cha a rei khai nahta, Izarei bei cha a chysia hrie ta, “Kei he chyhsazy thie thei ta, a pahro theituhpa Khazohpa ma ei châ? Khazia he chyhsa heta phawhpa chyhsa patlâh awpa ta kei lâ a vaw tuah tly? Chavâta pachâ u la pahno teh u, einâ hryuh thei nawpa lâpi a tluapa a châ hih,” tah ta.

⁸ Khazohpa chyhsa Elaisâh ta Izarei bei ta a chysia a hrie tahpa a thei nahta, abei lâ chyhsa tuah ta, a hnohta, “Khazia na chysia cha na hrie? Kei lâ a vy mawh sy. Chatanachata Izarei liata hrohsopa a y tahpa a pahno aw,” tah ta.

⁹ Nâmâ cha arâzy nata a talailihzy chhaota sie ta, Elaisâh o ochhi liata a kei duah ta.

¹⁰ Elaisâh ta ano lâ lyuhchâpa tuah ta, a hnohta, “Vawh la, Zawdâh chavah liata ei sari a kei ny la, na sapa ualuapa ta y heih aw ta, na vaw pathaih ha aw,” tah ta.

¹¹ Nâmâ cha a hiehâh ngaita ta, sie syulyu ha ta, “Pachâ teh u, kei lâta vaw puapa ta, a vaw duah aw ta, Abeipa a Khazohpa moh pado aw ta, ei phawhna chô liata a ku hiepa ta phawhpa he a patlâh aw khiah ma, tah na ta.

¹² Dâmaskâ liata Abanâ nata Phâpa chavahzy cha Izarei ti zydua hlâta pha via veih ei ma? Chazy liata ngai a sipa ta a pathai thei va na ma?” tah ta. Chatanachata a lie ta, hiehâh ngaitapa ta sie ha ta.

¹³ A chakaotuhpazy ta a kei hnia ei ta, a hnohta, “Ei pâ y, hrohsopa ta hmo laipa cha pataosa sala, tao aw va chi ma? ‘Ti liata a kei ny teh, na pathaih ha aw,’ a cha tahpa cha hmo rairupa chhao châ va,” tah ei ta.

¹⁴ Chatanachata Nâmâ cha zu ta, Khazohpa chyhsa reipa hawhta, Zawdâh chavah liata ei sari zâ ny ta. A sapa cha hawtipa sa hawh tlai ta vaw y pathi ha ta, a vaw pathaih haw.

Kehâzi khohleikhona nata hriena

¹⁵ Chatawhcha Nâmâ cha a sahlao zydua chhaota Kha­zohpa chyhsa yna lâ a lie ta. A tlô nahta, a hmiakô liata a kei duah ta, a hnohta, “Izarei lia dei leipa ta cha, khizaw zydua liana heta Khazohpa rai y vei tahpa ei pahno haw. Chavâta châ chakaotuhpa kuhria he a hlâh mah y,” tah ta.

¹⁶ Châhrasala Elaisâh ta, “Ei chakao tyhpa Abeipa hrona reipa ta ei reih, khâpa hmah la aw va na,” tah ta. La awpa ta reipasao chaimâh ta, châhrasala la khoh leipa ta.

¹⁷ Nâmâ ta a hnohta, “Cha khiahta la, ngiachhiepa ta châ chakaotuhpa he alâ phao no alei na pie mah y. Tahmâ tawhta cha, châ chakaotuhpa heta Abeipa lâ dei leipa ta cha, raopa hlâna nata atheihna zy khazoh hropazy lâta hlâ khao aw va na.

¹⁸ Cha kyh liata Abeipa ta châ chakaotuhpa he a ngiahthai mawh sy. Ei zibeipa Aramia bei ta a khazoh a chhy awpa ta Rimaw achhyna o lâ â ngiana maihta, ei zibeipa cha ei bâh a patupa ta ei chhihtha tyh awpa byuh ta, kei chhao Rimaw achhyna o liana cha ei bôh tyh awpa a byuh. Rimaw achhyna o liata ei bôh tita, cha kyh liata Abeipa ta châ chakaotuhpa he a ngiahthai mawh sy,” tah ta.

¹⁹ Elaisâh ta a hnohta, “Thlalôhpa ta sie mah y,” tah ta. Nâmâ cha Elaisâh tawhta pua ta, a sie pasi hlâta,

²⁰ Khazohpa chyhsa Elaisâh chakaotuhpa Kehâzi ta, “Moh tua u, ei zibeipa ta Aramia chyhsa Nâmâ kha ngiachhie ta, hmo a vaw phaopazy a ku tawhta la leipa ta, a pasiesa haw. Abeipa hrona reipa ta ei reih, a kei chadai aw na ta, khâpa chhâ ma ei kei la tua aw,” tah ta.

²¹ Chatanachata Kehâzi ta Nâmâ cha a kei chadai ta. Nâmâ cha chyhsa pakha ta â vaw chadaipa a hmô nahta, ano a tyh awpa ta talailih tawhta chô ta, a hnohta, “Ato a pha khai ma?” tah ta.

²² Kehâzi ta, “A pha khai na. Ei zibeipa ta, ‘Epharai tlâh râh tawhta hrohsopa sahlao sawchapawzy hry liatapa satlia pano ta na vaw tly ei ta, âmo cha tâkâ talent miakha nata chysia a patly awpa zo no bâh vaw pie mah y,’ tahpa ta cha pachhosa awpa ta eina vaw tuah,” tah ta.

²³ Nâmâ ta, “Tale miano a lypa ta la mah y,” tah ta. Tâkâ talent miano la awpa ta reipasao ta. Cha cha sykhao miano ta chaty ta, chysia a patly awpa miano chaty pâ ta, a chakaotuhpa pano paphaosa ta. Kehâzi hmialâ ta siekhei ei ta.

²⁴ Tlâh a tlô nahta, ama ku tawhta la ta, o chhôh liata soh ta, chyhsazy cha pasiesa ta, sie ha ei ta.

²⁵ Kehâzi cha a ngia ta, a zibeipa hmiakô liata a kei duah ta, Elaisâh ta a hnohta, “Kehâzi, khataih tawhta nâ vy?” tah ta. Ano ta, “Châ chakaotuhpa he khataih lâ hmah sie va na,” tah ta.

²⁶ Elaisâh ta a hnohta, “Kha chyhsa ta châ tyh awpa ta a talailih tawhta â vaw lie nona kha, ei palôh na hnohta a vaw sie ha mâh tâh. He daihti he tâkâ zy, chysia zy, ôli sadô zy, kre sadô zy, mietaku zy, viahchao tôhpa zy, seichapawzy nata seichanôzy a hlâ nawpa daihti a châ ma?

²⁷ Nâmâ phawhpa kha ta cha patu aw ta, na pathlazy chhao chhâzaw ta a patu lymâ aw,” tah ta. Chatanachata Kehâzi cha Elaisâh hmiakô tawhta pua ta, dâhaw hawhta ngyuhpa ta, phawhpa vaw châ ha ta.