2 ABEIZY 4 - Mara Bible RV (BSI)

Nôhmei sathaw papôhna

¹ Hrohsopa sahlao lapinôzy hry liata chanô pakha ta Elaisâh hnohta, “Châ chakaotuhpa ei vahpa thi ha ta, châ chakaotuhpa kha Abeipa a chipa a châ tahpa na pahno. Leibâh â bâhpa chyhsa a vy ta, ei saw panozy cha sei ta a chhi awpa â chhuah,” tahpa ta a nôpona kyh chho ta.

² Elaisâh ta a hnohta, “Khâpa ei cha taopa aw? Na chho teh, o liata khâpa na hnei?” tah ta. Chanô ta, “Châ chakaotuhnô heta sathaw ôh kha dei leipa ta o liata khâpa hmah hnei va na,” tah ta.

³ Elaisâh ta, “Vawh la, na opazy beih ruapa a kei hlâh teh, a chyhta a hlâh khah y.

⁴ Chatawhcha a ngia la, nâ nata na sawchapawzy ochhi a khawhlôh u la, sathaw na hneipa cha beih zydua liata ryh la, a biepa maih ânano ta soh lymâ mah y,” tah ta.

⁵ Chanô cha Elaisâh tawhta sie ta, ano nata a sawchapawzy cha ochhi a khawhlôh ei ta. A sawchapawzy ta beih vaw pie ei ta, ano ta sathaw cha beihzy liata pabie lymâ ta.

⁶ Beihzy a bie khai nahta, a sawchapawpa hnohta, “Beih hropa na vaw pie teh,” tah ta. Ano ta, “Beih hropa y khao vei,” tah ta. Cha khai tawhta cha sathaw chhao chhâ pâ ha ta.

⁷ Chanô ta sathaw kyh cha Khazohpa chyhsa kei chho ta, ano ta, “Vawh la, sathaw cha kei zuah la, na dyuchei cha kei thô mah y. A laibâhpa cha nâ nata na sawchapawzy niedo châta châ mawh sy,” tah ta.

Elaisâh nata Sunâ chanô

⁸ Noh kha cha Elaisâh cha Sunâ lâ khi kei tlyh ta. Cha khih liata chanô hneirôh kawpa pakha y ta, chanô chata Elaisâh cha pati nie awpa ta a haw ta. Cha noh tawhna cha a chapiana maihta, cha liata pati nie awpa ta a ngia tyh ta.

⁹ Chanô ta a vahpa hnohta, “Pachâ teh, he chyhsa, khâ miah a chapia tyhpa he Khazohpa chyhsa pathaihpa a châ tahpa ei pahno.

¹⁰ Vâphuh liata pâhchhô chhôh sih la, chhôhpadâhpa chyhpa taopa sih la, rakhô, tlâhkhai, dyuchhai nata meiôh zy sopa sih la, keimo lâ â vyna maihta, cha liata â ngia tyhna hâh ta,” tah ta.

¹¹ Noh kha cha Elaisâh vaw tlô ta, chhôhpadâhpa lâ cha a ngia ta, a zia ta.

¹² Ano chakaotuhpa Kehâzi hnohta, “Sunâ chanô kha kei aw tua,” tah ta. Sunâ chanô cha kei aw ta, a hmiakô liata a vaw duah ta.

¹³ Elaisâh ta a chakaotuhpa hnohta, “Sunâ chanô kha chho la a hnohta, ‘Pachâ teh, miah pasô ngaita chi ta, khâpa ei cha taopa hra aw? Abei tlyma, pheisaih hyutuhpa tlyma, ei cha chhopa awpa na khoh ma?’ tah mah y,” tah ta. Sunâ chanô ta a chhy ta, “Ei chiheihzy hry liata pahrâ na ta, a ngiahpa hnei va na,” tah ta.

¹⁴ Elaisâh ta, “Cha hawhpa khiah ano châta khâpa taopa awpa ma a châ aw?” tah ta. Kehâzi ta a chhy ta, “A châ na, he chanô he sawchapaw hnei leipa ta, a vahpa hra cha pawpi ha ta,” tah ta.

¹⁵ Elaisâh ta, “Kei aw tua,” tah ta. A kei aw nahta, chhikao liata a vaw duah ta.

¹⁶ Elaisâh ta, “Hâhkô tahmâ daihti liana heta sawcha­paw nâ pyh aw,” tah ta. Chanô ta, “Châ vei, ei zibeipa, Hy Khazohpa chyhsa y, châ chakaotuhnô he dôvei khah y,” tah ta.

¹⁷ Châhrasala chanô cha saw phaoh ta, Elaisâh ta a hnohta a reipa hawh tlai ta, a hâhkô, cha daihti liata sawchapaw sa ta.

Sunâ chanô sawchapawpa pathyuna

¹⁸ Hawti cha vaw lai ta, noh kha cha a paw hnohta sâh hriatuhpazy lâ sie ta.

¹⁹ A paw hnohta, “Ei luh, ei luh!” tah ta. A paw ta a chakaotuhpa hnohta, “Pi la, a nô lâ vawkhei teh,” tah ta.

²⁰ Chakaotuhpa ta hawti cha chalo ta, a nô lâ vawkhei ta, hawti cha a nô byh chô liata nohchhô taih a tyuh ta, chatawhcha thi ha ta.

²¹ Chanô cha khy ta, hawti cha Khazohpa chyhsa rakhô liata pazia ta, ochhi khawhlôh ta, pua ta.

²² A vahpa hnohta, “Chakaotuhpa pakha nata alâ pô kha na pachâpa teh, Khazohpa chyhsa lâ vawh para aw na ta, thlai ei vaw lie aw,” tah ta.

²³ A vahpa ta, “Khazia tanoh cheingei cha ano lâ sie nâ chhuah? Thla thiehpa chhao châ leipa ta, Pahânoh chhao châ va,” tah ta. Chanô ta, “A pha thlâh ha aw,” tah ta.

²⁴ Alâ ky padia ta, a chakaotuhpa hnohta, “Sahroh he chatliesa la, sie lymâ teh. Ei cha chho leipa khiahta cha, na padusawsa awpa châ vei,” tah ta.

²⁵ Chatanachata sie ta, Khazohpa chyhsa yna Kâmel Tlâh cha kei tlô ta. Chanô â vy haipa cha Khazohpa chyhsa ta lâhlapi tawhta vaw hmô ta, a chakaotuhpa Kehâzi hnohta, “Moh tua, Sunâ chanô kha a châ huh.

²⁶ Ano dy awpa ta a kei râ la, a hnohta, ‘Na tlâh ma? Na vahpa a tlâh ma? Hawtipa a tlâh ma?’ kei tah teh,” tah ta. Chanô ta a vaw chhy ta, “Ama tlâh khai,” tah ta.

²⁷ Khazohpa chyhsa yna tlâh a tlô nahta, a phei patu ta. Kehâzi a vy ta, chanô cha parai awpa a chhuah ta. Châhrasala Khazohpa chyhsa ta, “Kheihta hmah tah khah y, a nô a po ngaita hih. Abeipa ta kei tawhta nyu chy ta, na chho mâh vei,” tah ta.

²⁸ Chanô ta, “Ei zibeipa hnohna heta sawchapaw ei cha hiah rai ma? ‘Na dôvei khah y,’ ei cha tah vei ma?” tah ta.

²⁹ Elaisâh ta Kehâzi hnohta, “Na chai a saih la, ei chôchahrei he na ku ta chaba la, sie teh. Chyhsa nâ tyh khiahta cha, a naoh leipa la, chyhsa ta ama châ naohpa chhao ta, a naoh palie leipa la, ei chôchahrei he hawtipa hmia liata kei pahnieh mah y,” tah ta.

³⁰ Hawtipa nô ta, “Abeipa hrona nata na hrona reipa ta ei reih, cha siesai cheita aw va na,” khâchâ tah ha ta. Chavâta Elaisâh cha thyu ta, chanô cha pazi ta.

³¹ Kehâzi cha hmialâ ta sie ta, chôchahrei cha hawtipa hmia liata pahnieh ta, châhrasala a ao thei awpa y leipa ta, ano liata hrona rai y vei. Chavâta Elaisâh chho awpa ta vaw kua ta, a hnohta, “Hawtipa a thei khao vei,” tah ta.

³² Elaisâh cha o kei tlô ta, hawtipa cha a rakhô liata athipa ta â vaw zia thlâh hapa hmô ta.

³³ A kei ngia ta, ama pano ta ochhi a khawhlôh ta, Abeipa lâ thlahchhâ ta.

³⁴ Rakhô lâ kiah ta, hawti cha a byuhnie ta, a hmao nata a hmao, a mo nata a mo, a ku nata a ku patyh ta. A chô liata a byu thlu ta, hawtipa pôhpa cha vaw lalôh lymâ ta.

³⁵ Thyu ta, o chhôh liata a hlaihlâ ta, rakhô chô lâ kiah heih ta, a chô liata a byu thlu heih ta. Hawtipa cha ei sari vaw hâthih ta, a mo vaw padeih ta.

³⁶ Elaisâh ta Kehâzi aw ta, a hnohta, “Sunâ chanô kha kei aw teh,” tah ta. Kei aw ta, ano lâ â kei ngia nahta, Elaisâh ta, “Na sawchapawpa he a pyh teh,” tah ta.

³⁷ A kei ngia ta, Elaisâh phei thaby liata pao ta, alei taih a bôhpa ta a naoh ta. Chatawhcha a sawchapawpa cha a pyh ta, pua ha ta.

Hrohsopazy châta Elaisâh hmotao noâhpazy

³⁸ Râh liata chakâhna a tlô nota, Elaisâh cha Kilkal lâ sie heih ta. Hrohsopa sahlao sawchapawzy cha a hmiakô liata a tyuh ei ta, a chakaotuhpa hnohta, “Beih laipa khaih la, hrohsopa sahlao sawchapawzy châta abie pati chhopa teh,” tah ta.

³⁹ Ama hry liata pakha cha lyurâhpa lâ ahmie tlua awpa ta sie ta, zôhripa hmô ta, cha tawhtapa ôhpyzy a viahkao ta vaw chaty ta, a vaw tlô nahta pachhaih ta, khâpa a châ tahpa pahno leipa ta, beih liata abie pati liata thla ta.

⁴⁰ Hrohsopazy nie awpa ta vaw sipa ei ta. Ama nie hai nota, “Hy Khazohpa chyhsa, beih chhôh liata thina a y!” tah ei ta. Chatana­chata nie thei khao leipa ei ta.

⁴¹ Elaisâh ta, “Viahdie vaw cheih teh u,” tah ta. Viahdie cha beih liata thla ta, “Hrohsopazy nie awpa ta vaw sipa teh u,” tah ta. Chatawhcha chichhihpa khâpa hmah beih chhôh liata y khao vei.

⁴² Bâlâsalisâ tawhta chyhsa pakha vaw tlô ta, Khazohpa chyhsa châta sâh thiehpa ta taopa bâli viahchhâ tlâ kih nata sâh thiehpa suhzy sykhao ta vaw phaoh ta. Elaisâh ta, “Hrohsopazy nie awpa ta kei pie teh u,” tah ta.

⁴³ A chakaotuhpa ta, “Kheihta ma he zie heta chyhsa za kha ei tô thei aw ei?” tah ta. Elaisâh ta, “Hrohsopazy nie awpa ta kei pie teh, Abeipa ta hetana heta a tah: ‘Nie aw ei ta, a laibâhpa a y aw,’” tah ta.

⁴⁴ Chatanachata chakaotuhpa ta hrohsopazy cha pati tô ta. Nie ei ta, Abeipa bie hawhta, a laibâhpa chhao y ta.