2 ABEIZY 3 - Mara Bible RV (BSI)

Izarei bei Zehôrâ

¹ Zudâh bei Zehôsaphâ kô hrawh hleicharie â bei kô ta, Ahabâ sawchapawpa Zehôrâ cha Izarei chô liata Samâri liata a bei pathao ta, kô hrawh hleino â bei.

² Abeipa mohmô liata hmo pha lei ngaitapa tao ta. A nô nata a paw hawh ngâsâ ta la hmo parao vei. A paw ta Bâlâ lô a vaw bôpa cha a thy haw.

³ Châhrasala Izarei a pamoleisapa Nebâ sawchapawpa Zerôbaw moleinazy liata khâchâ a bai ta, siesai khoh vei.

Môabâ mo pahniena

⁴ Môabâ bei Mesâ cha mietaku pasatuhpa châ ta, Izarei bei hnohta mietakutaw 100,000 nata mietaku tôhpa 100,000 hmi a pie tyhpa a châ.

⁵ Ahabâ a thi tawhta, Môabâ bei ta Izarei bei cha a chariah ta.

⁶ Chavâta Bei Zehôrâ cha Izarei zydua pahruapa ta, hrâsie awpa ta Samâri tawhta pua ta.

⁷ Sie ta, Zudâh bei Zehôsaphâ bieta ta, “Môabâ bei ta nâ chariah ha ta, Môabâ adyuhna lâ eina sielâh aw chi ma?” tah ta. Zehôsaphâ ta, “Ei sie aw. Kei cha, nâ châ na ta, ei chyhsazy cha na chyhsazy châ ei ta, ei arâzy cha na arâzy a châ,” tah ta.

⁸ Zehôsaphâ ta, “Kha­taih lâpi lâta eima sie aw?” tah ta. Zehôrâ ta, “Edôma râhchawhpa lâpi lâta,” tah ta.

⁹ Chatanachata Izarei bei cha Zudâh bei nata Edômâ beizy chhaota sie ei ta. Noh sari chahlô ei ta, pheisaihzy nata ama sahroh a chhipazy do awpa ti y leipa ta.

¹⁰ Izarei bei ta, “A pei rimâ cha! He bei pathôhzy he Môabâ ku liata hlâ awpa ta, Abeipa ta miah a awpakhy he zaw,” tah ta.

¹¹ Zehôsaphâ ta, “Abeipa miah a saohiahpa awpa Abeipa hrohsopa he liata y tlâ veih ei ma?” tah ta. Izarei bei chakaotuhpa pakha ta a chhy ta, “Elaizâh ku ti a bao tyhpa, Saphâta sawchapawpa Elaisâh a y,” tah ta.

¹² Zehôsaphâ ta, “Abeipa bie a hnohta a y chuh,” tah ta. Izarei bei nata Zehôsaphâ nata Edômâ bei zy cha ano lâ zu ei ta.

¹³ Elaisâh ta Izarei bei hnohta, “Nâ nata kei ta azaona khâpa eima hnei? Na paw hrohsopazy lâ sie la, na nô hrohsopazy lâ sie teh,” tah ta. Izarei bei ta a hnohta, “Sie aw va na., He bei pathôhzy he Môabâ ku liata hlâ awpa ta Abeipa ta miah a awpakhypa a châ hih,” tah ta.

¹⁴ Elaisâh ta, “A hmiakô liata ei dua tyhpa Pheisaihzy Abeipa hrona reipa ta ei reih, Zudâh bei Zehôsaphâ hmia ei mopa vâta châ vei mawh sala, nâ la a mo chhao cha moh leipa aw na ta, a hmô rai ta cha hmô khoh aw va na.

¹⁵ Tahmâ he totâ a tô thaipa na awpa teh u,” tah ta. Totâ a tô thaipa ta a tô nahta, Abeipa ku Elaisâh chô liata vaw tlô ta.

¹⁶ Elaisâh ta, “Abeipa ta hetana heta a tah: ‘He saikao he khaohtlô ta pabie teh u.’

¹⁷ Abeipa ta hetana heta a tah: ‘Thlih hmô leipa aw ei chi ta, vâsua chhao hmô leipa aw ei chi ta, châhrasala he saikao he ti ta a bie khai aw. Chatanachata nâmo nata nama sahrohzy nata nama râhsazy ta nama doh aw.’

¹⁸ Cha cha Abeipa pachâ ta hmo chyhpata dei a châ. Môabâ mo cha nama ku liata a cha pie aw ei.

¹⁹ Thokhy a hneipa khihpi zydua nata khihpi phapa zydua parao aw ei chi ta, tho phapa zydua thlu aw ei chi ta, tihnawh zydua pamai aw ei chi ta, râh phapa zydua cha alô pahmaoh thlupa ta nama parao khai aw,” tah ta.

²⁰ A mylâ my ta, atheihna hlâna daihti rachhôh ta, Edômâ râh lâ tawhta ti vaw loh chaimâh ta, chhaohlei cha ti ta a bie khai haw.

²¹ Môabâ mo zydua ta âmo a dyuh awpa ta beizy amâ khy tahpa ama thei nahta, chariah chhaichhi a tobi theipa maih, hawti chaipa tawhta uhthei chaipa taih awpakhy ei ta, râhri liata a vaw byh ei ta.

²² Mydi kari ta thyu ei ta, noh ta ti cha za khaih ta, Môabâ mo ta ama dady liata ti cha thisaih hawh tlai ta saihpa ta hmô ei ta.

²³ “Thisaih a châ huh. Beizy âmo nata âmo a dyuh ei ta, âmo nata âmo amâ thie khai hapa a châ huh. A vy teh u, Hy Môabâ, hraona hmo kei la ei suh u!” tah ei ta.

²⁴ Izarei riehmo ama kei tlô nahta, Izarei mo cha eikhapi ta vaw thyu ei ta, Môabâ mo cha chhawh ei ta, ama hmiakô liata a râpai ei ta. Hmia tôh lymâ ei ta, Môabâ mo cha ama râh ama tlôna taihta thie lymâ ei ta.

²⁵ Khihpizy parao ei ta, chhaohlei phapa su zydua cha alô thy thlu ei ta, alô ta a bie khai haw. Tihnawh zydua pamai ei ta, tho phapa zydua thlu ei ta, chatanachata Kiharese khihpi liata alôzy deita a y bâ. Cha khihpi chhao cha cheisiah a siah thaipazy ta dôh ei ta ama pahnie haw.

²⁶ Môabâ bei ta adyuhna liata ano a nawh viapa hawhta a hmô nahta, zaozi pheisaih 700 a chhi ta, Edômâ bei dady liata kei tôh a chhuah ta, châhrasala tôh thei leipa ei ta.

²⁷ A sawchapaw uhtheipa, ano su liata bei a châ awpa a chhi ta, raopa hlâna ta thokhy chô liata hlâ ta. Cha chata Izarei chô liata pathiiana lai ngaitapa vaw patlôsa ta, chatanachata Môabâ bei cha a sysai ei ta, ama râh lâ amâ lie haw.