2 ABEIZY 24 - Mara Bible RV (BSI)

Nebukaneza ta Zerusale a siehnao

¹ Zehôki â bei nota Babylaw bei Nebukaneza ta Zerusale siehnao ta, Zehôki cha ano chakaotuhpa ta kô thôh y ta. Cha khai tawhta Zehôki ta Nebukaneza cha a heihsaipa ta, a chariah ha ta.

² Abeipa ta Kaldia pheisaihzy, Aramia pheisaihzy, Môabâ pheisaihzy nata Amawna pheisaihzy cha Zehôki a dyuh awpa ta tuah ta. Abeipa ta a chakaotuhpa hrohsopazy hmâpa ta a vaw rei hapa Abeipa bie hawhta, Zudâh siehnao ta parao awpa ta a tuapa ei a châ.

³ Cha hmo cha Manase moleinazy nata a hmotaopa zydua vâta, Zudâh cha Abeipa mohmô tawhta pahlei awpa ta, Abeipa biepiepa ta Zudâh chô liata a vaw tlôpa a châ.

⁴ Manase ta chyhsa siapazy thisaih palo ta, Zerusale cha chyhsa siapazy thisaih ta a pabiepa vâta, Abeipa ta a ngiahthai thei vei.

⁵ Zehôki thâtih hropazy nata a hmotaopa zydua cha, Zudâh beizy thâtih rona châbu liata ropa a châ.

⁶ Zehôki cha a pathlatuhpazy hnohta a mô ta, a sawchapawpa Zehôkhi ta ano su liata â bei.

⁷ Babylaw bei ta Izi bei ry liata a ypa, Izi Chavah tawhta Ufrâti chavah taihta râh zydua a la khai hapa vâta, Izi bei cha a râh tawhta kaw pua khao vei.

Zudâh bei Zehôkhi

⁸ Zehôkhi cha kô hrawh hleichariepa a châ nota a bei ta, Zerusale liata thla thôh â bei. A nô moh cha Nehustâ châ ta, Zerusale khihpa Enâthâ sawchanô a châ.

⁹ Zehôkhi cha a paw taozie zydua hawhta tao hrapa ta, Abeipa mohmô liata hmo pha leipa tao ta.

Zerusale lapa a châ

¹⁰ Cha nota Babylaw bei Nebukaneza chakaotuhpazy cha Zerusale lâ khy ei ta, khihpi cha dôh ei ta.

¹¹ A chakaotuhpazy ta khihpi ama dôh hai nota, Babylaw bei Nebukaneza cha khihpi lâ a vy ta,

¹² Zudâh bei Zehôkhi cha, a nô nata a chakaotuhpazy nata a beimachâzy nata abei o liata hyutuhpazy chhaota Babylaw bei lâ kei pua ei ta. Chatanachata Zehôkhi cha â beina kô chariena liata Babylaw bei ta a patu haw.

¹³ Abeipa ta a vaw reipa hawhta, Abeipa o liata ryusôhpa zydua nata abei o liata ryusôhpa zydua cha Babylaw bei ta a siekhei khai haw. Izarei bei Sawlawmaw ta Abeipa Achhyna o liata ngôh hmobaoh a taopa zydua chhao a pakeichheih khai haw.

¹⁴ Zerusale khihsaw zydua, beimachâ zydua nata pasaipha zydua siekhei khai ta, sei 10,000 tlai a siekhei ei. Zôthaipa nata syudaihpa zydua chhao a siekhei khai ha ei. Chyhsa dyhchhie chaipazy tah leipa ta cha, râh liata ahy hmah y khao veih ei.

¹⁵ Nebukaneza ta Zehôkhi cha Babylaw lâ a chhi ta. Abei nô, abei lapinôzy, beimachâzy nata râh liata chhituhpazy cha sei ta Babylaw lâ â chhi ha ei.

¹⁶ Babylaw bei ta chariah a dyuh thei awpa pasaipha sai ta 7,000 nata zôthaipa nata syudaihpa 1,000 sei ta Babylaw lâ â chhi ha ei.

¹⁷ Babylaw bei ta Zehôkhi paw unawhpa Mâtaniah cha Zehôkhi su liata bei ta tao ta, a moh Zedekia tahpa ta a thla.

Zudâh bei Zedekia

¹⁸ Zedekia cha â bei pathao nota kô kih nata kô khapa châ ta, Zerusale liata kô hrawh hleikha â bei. A nô moh cha Hâmutâ châ ta, Libnâ khihpa Zere­miah sawchanô a châ.

¹⁹ Zehôki taozie zydua hawhta tao hrapa ta, Abeipa mohmô liata hmo pha leipa tao ta.

²⁰ Abeipa pathiiana vâta, a mohmô tawhta papua hana taihta Zerusale nata Zudâh chô liata a vaw tlô hapa a châ. Zedekia cha Babylaw bei ry liata a ypa tawhta pua a chhuah ta.