2 ABEIZY 23 - Mara Bible RV (BSI)

Zôsia ta taopathina rai a hriapazy

¹ Abei ta chyhsazy tuah ta, Zudâh râh nata Zerusale khihpi liata machâ zydua ano lâ awpakhy ta.

² Abei nata Zudâh râhsaw zydua, Zerusale khihsaw zydua, theihthaipazy nata hrohsopazy, chyhsa zydua a lai a chyh ta Abeipa o lâ khy ei ta. Abeipa o liata ama hmôpa Biehrai Châbu liata bie zydua cha ama nah theina liata reih ta.

³ Abei cha otôh liata a duah ta, Abeipa hmiakô liata biehrai tao ta. Abeipa hnôh pazipa ta, a biepiepazy, a biepahnokheipazy nata a bieraopazy cha a pathipalôh tlokhuh ta nata a thlahpa tlokhuh ta zyh ta, cha châbu liata â rohpa biehrai biezy hawhta tao lymâ awpa ta biehrai tao ta. Zawpi zydua chhao ta biehrai tao ei ta.

⁴ Chatawhcha Abei ta theihthai beichaipa Hikia nata ano a pazipa theihthaipazy nata chhikao vaituhpazy cha Abeipa Achhyna o chhôh liata Bâlâ nata Aseri nata avâ liata a ypa zydua châta taopa hmobaoh zydua cha puakhei khai awpa­ta biepie ta. Chazy cha Zerusale khôtho lâ Kidaraw lyurâhpazy liata abei ta mei ta rao ta, a paohpazy Bethel lâ siekhei ta.

⁵ Zudâh khihpizy nata Zerusale chheipâh liata su sâhpazy liata atheihna hlâ awpa ta Zudâh beizy ta ama raopa theihthaipazy cha pabâh khai ta, Bâlâ lâta nata noh nata thlâpâ nata awhsi nata avâ liata a ypa zydua lâta atheihna a hlâ tyhpazy chhao a pabâh khai ha ei.

⁶ Abeipa o liata Aseri tôh cha Zerusale khôtho lâ Kidaraw chavah lâ puakhei ta, Kidaraw chavah liata rao ta, a paohpadi lâta â liena taihta tlypazao ta, a paohpa cha vâtlâh thlâ liata hie ta.

⁷ Aseri tôh châta pohraipa thaisapa chanôzy yna Abeipa o liata chapaw âzuahpazy yna ozy chhao a parao khai haw.

⁸ Theihthaipa zydua Zudâh khihpizy tawhta lapapua ta, theihthaipazy ta atheihna ama hlâ tyhna, nothlahpa achhyna su sâhpazy cha Kebâ tawhta Besebâ taihta papuapalei khai ha ta, khihpi angiana chhikao chavei lâta, khihpi ryureituhpa moh pachypa ta Zawsua chhikao ama tahpa angiana chhikaozy liata su sâhpazy chhao a pacho khai haw.

⁹ Su sâhpa theihthaipazy cha Zerusale liata Abeipa maisâh lâ a khy leipa ei ta, viahchhâ thinô pahlao leipa deikua ama unawhzy hry liata ama nie tyh hra.

¹⁰ Chatawhcha ahy hmahta ama sawchapaw tlyma, ama sawchanô tlyma, Môleka atheihna châta ama hlâ khao lei nawpa ta, Hinô Sawchapawpa Saikao ama tahpa liata Tôphe chhao a parao haw.

¹¹ Zudâh beizy ta noh lâta ama hlâpa arâzy cha, Abeipa o lâ angiana chhikao tawhta pasie ta. Chazy cha Abeipa o tlyhmia liata molaipa Nâthâmele chhôhpadâhpa kiapâh liata a ypa a châ.

¹² Ahâza o chhâh chô lâta vâphuh liata Zudâh beizy ta maisâh ama taopazy nata Manase ta Abeipa o dôhpachhôh tlyhmia miano liata maisâh a taopazy cha abei ta pacho khaipa ta, pakeichheih ta, azaona dohleizy cha Kidaraw chavah liata thy ta.

¹³ Izarei bei Sawlawmaw ta Sidaw mo khazoh pasichhihpa Astarô châta zy, Môabâ mo khazoh pasichhihpa Khemô châta zy, Amawna mo khazoh pasichhihpa Mikô châ zy ta Zerusale nochhi lâ, raona tlâh chho lâta su sâhpa a sapazy chhao Bei Zôsia ta parao khai ta.

¹⁴ Lôbôzy pakeichheihpa ta, Aseri tôhzy thlu ta, cha suzy cha chyhsapa ruzy ta pabie ta.

¹⁵ Cha dei châ vei, Izarei a pamoleisapa Nebâ sawchapawpa Zerôbaw ta Bethel liata maisâh nata su sâhpa a taopazy a daophi pathlah ta, mei ta rao ta, a zaona taihta a tlychheih khai haw. Aseri tôh chhao mei ta a rao haw.

¹⁶ Chatawhcha Zôsia cha a kaw heih ta, tlâh liata thlâzy hmô ta. Thlâ liata ruzy cha kei palasa ta, nothlahpa achhyna maisâh a papuapalei thei nawpa ta maisâh liata rao ta. Chazy cha Khazohpa chyhsa ta vaw chhochhielie ta a phuah khai hapa Abeipa bie hawhta a vaw tlôpa a châ.

¹⁷ Chatawhcha Zôsia ta, “Hao lôbô ei hmôpa hao khâpa lôbô ma a châ tly?” tah ta. Khihpi chyhsazy ta, “Kha­zohpa chyhsa Zudâh tawhta a vypa, Bethel liata maisâh chô liata na tao hapa hmo a vaw chhochhieliepa thlâ a châ huh,” tah ei ta.

¹⁸ Bei Zôsia ta, “Kheihta hmah tah khuh vy. Ahy ta hmah a ruzy pasie khah sy,” tah ta. Chatanachata Khazohpa chyhsa ruzy cha, Samâri tawhta hrohsopa a vypa ruzy chhaota kheihta hmah tao veih ei.

¹⁹ Zôsia ta Samâri khihpizy liata a ypa su sâhpazy liata achhyna ozy chhao parao khai ta. Chazy cha Izarei beizy ta padua ei ta, Abeipa pathi ama pa-ia hapa kha a châ. Bethel liata a taopa zydua hawhta, chazy chô lia chhao ta tao ta.

²⁰ Cha liata su sâhpa theihthaipa a ypa zydua cha maisâhzy chô liata thie ta, chyhsapa ruzy cha maisâhzy chô liata rao ta, cha khai tawhta Zerusale lâ â lie haw.

Zawpakhô kyhchhi chay heihna

²¹ Chatawhcha abei ta chyhsa zydua biepie ta, “He Biehrai Châbu liata ropa hawhna heta, Abeipa nama Khazohpa lâta Zawpakhô Kyhchhi tao teh u,” tah ta.

²² Izarei chô liata ryureituhpazy ta ryu ama rei daihti rakha tawhna kha ta, Izarei beizy daihti chhôh zydua nata Zudâh beizy daihti chhôh zydua ta, Zawpakhô Kyhchhi he ama vaw chay khao leipa a châ.

²³ Bei Zôsia abeina kô hrawh hleichariena kô lia deita ta Zawpakhô Kyhchhi cha Abeipa lâta Zerusale liata ama chay heih theipa a châ.

Zudâh chô liata Abeipa hiehâhna

²⁴ Cha dei châ vei, Abeipa o liata theihthaipa Hikia ta a hmôpa châbu liata ryhpa bie ropazy a pa-i thei nawpa ta, pachaothaipazy, dyuthaipazy, chhôhkha khazohzy, khazoh nothlahpazy nata Zudâh râh nata Zerusale khihpi liata pasichhihpa ama hmô tyhpa zydua cha, Zôsia ta a pahleipadia khai ha ei.

²⁵ Mawsi ryhpa zydua hawhta, pathipalôh tlokhuh ta nata thlahpa tlokhuh ta nata thatlôna tlokhuh ta Abeipa lâ a heihpa Bei Zôsia hawhpa cha, ano hlâta a ypa beizy hry liata ahy hmah y leipa ei ta, ano hnôhlâ ta beizy hry liata chhao ano hawhpa ahy hmah y khao veih ei.

²⁶ Chatanachôta Abeipa ­ta a hiehâhna ru ngaitapa, Manase ta a pathi a pa-iana zydua vâta Zudâh chô liata a hiehâhna cha papai hlei vei.

²⁷ Abeipa ta, “Izarei ei papuapa hawhta Zudâh chhao ei mohmô tawhta papua aw na ta, khihpi ei tlyhpa, Zerusale nata ‘cha liata ei moh a y aw,’ ei tahpa Achhyna o chhao he hnôh ei chhy aw,” tah ta.

Adyuhna liata Zôsia thina

²⁸ Zôsia thâtih hropazy nata a hmotaopa zydua cha, Zudâh beizy thâtih rona châbu liata ropa a châ.

²⁹ Zôsia â bei nota, Izi bei Phiraoh Nekô cha Asuria bei a dyuh awpa ta Ufrâti chavah lâ khy ta. Bei Zôsia cha sie ta, Phiraoh Nekô cha Mekidô khih liata a kei duakhâh ta. Phiraoh Nekô ta Zôsia cha hmô ta, a thie haw.

³⁰ A chakaotuhpazy ta a ri cha Mekidô tawhta Zerusale lâ talailih ta siekhei ei ta, ano thlâ liata ama pabu haw. Râh chyhsazy ta Zôsia sawchapawpa Zehôahâ a chhi ei ta, sathawthu ei ta, a paw su liata bei ta ama tao.

Zehôahâ abeina nata patuna

³¹ Zehôahâ cha kô kih nata kô thôhpa a châ nota a bei pathao ta, Zerusale liata thla thôh â bei. A nô moh cha Hâmutâ châ ta, Libnâ khihpa Zeremiah sawchanô a châ.

³² Zehôahâ cha ano pathlatuhpazy taozie zydua hawhta tao hrapa ta, Abeipa mohmô liata hmo pha lei ngaitapa tao ta.

³³ Zehôahâ cha Zerusale liata ryureih thei khao lei awpa ta, Phiraoh Nekô ta Hâmathi râh Riblâ khih liata patâh ta, Zudâh râh cha tâkâ talent za kha nata ngôh talent miakha râhpaw a pacheisa lymâ.

³⁴ Phiraoh Nekô ta Zôsia sawchapawpa Eliakima cha a paw Zôsia su liata bei ta tao ta, a moh Zehôki tahpa ta a panano. Zehôahâ deikua cha Izi râh lâ siekhei ta, cha liata thi ha ta.

³⁵ Zehôki ta tâkâ nata ngôh cha Phiraoh pie ta, Phiraoh biepiepa hawhta a tâkâ lâta pie awpa ta, râh liata chhie a khei lymâ. Phiraoh Nekô lâ pie awpa ta, râh chyhsazy chei awpa zie tu ta, tâkâ nata ngôh a khei lymâ ei.

Zudâh bei Zehôki

³⁶ Zehôki cha kô kih nata kô pangawhpa a châ nota a bei pathao ta, Zerusale liata kô hrawh hleikha â bei. A nô moh cha Zebidâh châ ta, Rumâ khihpa Pedai sawchanô a châ.

³⁷ Zehôki cha a pathlatuhpazy taozie zydua hawhta tao hrapa ta, Abeipa mohmô liata hmo pha lei ngaitapa tao ta.