2 ABEIZY 22 - Mara Bible RV (BSI)

Zudâh bei Zôsia

¹ Zôsia cha kô chariepa a châ nota a bei pathao ta, Zerusale liata kô sythôh nata kô kha â bei. A nô moh cha Zedidâh châ ta, Bôskâ khihpa Adiah sawchanô a châ.

² A pathlatuhpa Dâvi lâpi zydua a chhihpa ta, Abeipa mohmô liata hmo dopa tao tyh ta, chachâh lâ tlyma, chavei lâ tlyma tlei beih vei.

Zôsia ta Achhyna o a taopathi

³ Bei Zôsia â beina kô hrawh hleichariena liata, abei ta Mesulâ sawchapawpa Azaliah sawchapawpa chârohtuhpa Sâphâ cha, Abeipa o lâ tuah ta, a hnohta,

⁴ “Theihthai beichaipa Hikia lâ khy la, ochhi vaituhpazy ta chyhsazy tawhta ama kheipa Abeipa o liata ama vaw sopa tâkâ reih sala,

⁵ Abeipa o raihria mokhâhtuhpazy ku liata pie sala, âmo chata Abeipa o liata o raopa a taopathituhpazy pie mawh ei sy.

⁶ Abeipa o taopathi nawpa ta tho chaleina nata alô chaona châta hmâ awpa ta, tâkâ cha tho raihriatuhpazy, o satuhpazy nata alô khaituhpazy hnohta ama pie aw.

⁷ Ama ku liata tâkâ piepa hmâna kyh mopasia awpa byuh hlei aw vei, ngâchhih kawpa ta a tao tyhpa ama châ,” tah ta.

Ryhpa Châbu Hikia ta a hmô

⁸ Theihthai beichaipa Hikia ta chârohtuhpa Sâphâ hnohta, “Abeipa o liata Ryhpa Châbu ei hmô haw,” tah ta. Hikia ta châbu cha Sâphâ pie ta, Sâphâ ta châbu cha reih ta.

⁹ Chârohtuhpa Sâphâ cha abei lâ vawh ta, abei hnohta bie kei tlôkhei ta, “Châ chakaotuhpazy ta Abeipa o liata tâkâ a ypa zydua la ei ta, o rai mokhâhtuhpazy hnohta ama pie khai haw,” tah ta.

¹⁰ Chârohtuhpa Sâphâ ta abei hnohta, “Theihthaipa Hikia ta châbu eina pie,” tah ta. Sâphâ ta châbu cha abei hmiakô liata reih ta.

¹¹ Abei ta Ryhpa Châbu biezy a thei nahta, a chyhsiazy hrie ta.

¹² Abei ta theihthaipa Hikia, Sâphâ sawchapawpa Ahikâ, Mikai sawchapawpa Akabaw, chârohtuhpa Sâphâ nata abei chakaotuhpa Asiah zy hnohta,

¹³ “Vawh u la, he châbu ama hmôpa liata biezy kyh liata, kei nata zawpi nata Zudâh zydua châta Abeipa miah a saohiahpa teh u. He châbu bie zydua he eima tao awpa châ ta, châhrasala miah pathlatuhpazy ta ama zyh leipa vâta, eima chô liata Abeipa pathi thata a ia ha hi,” tah ta.

¹⁴ Chatanachata theihthaipa Hikia, Ahikâ, Akabaw, Sâphâ nata Asiah zy cha chysia sona mohôhtuhpa Harhâ sawchapawpa Tikavâ sawchapawpa Sâluh lapinô hrohsonô Huldâ kei chho ei ta. Ano cha â hnai lâta Zerusale liata a pahrâpa a châ.

¹⁵ Huldâ ta ama hnohta, “Abeipa, Izarei Khazohpa ta hetana heta a tah: ‘Kei lâta châ vaw tuahtuhpa chyhsa hnohna chata,

¹⁶ Abeipa ta hetana heta a tah, pachâ teh, Zudâh bei ta châbu bie a reipa liata chhiena zydua kha he su nata a chhôh liata a pahrâpazy chô liata ei vaw patlôsa aw.

¹⁷ Na siesai ei ta, khazoh hropazy lâta atheihnazy hlâ ei ta, ama ku ta ama taopa zydua ta ei hie eina pahâh ei. Chavâta he su he ei pathiiana mei ta pakâ aw na ta, pachhaipa châ aw vei.

¹⁸ Abeipa a saohiah awpa ta châ vaw tuahtuhpa Zudâh bei hnohta deikua cha, hetana heta chho teh u, Abeipa, Izarei Khazohpa ta hetana heta a tah: Na bie theipazy kyh liata,

¹⁹ he su nata a chhôh liata a pahrâpazy kyh liata, roryhrapa nata chhiesapa ta ama y aw tahpa kyh ei reipa na thei nahta, na palôh naipa ta Abeipa hmiakô liata a panawh chi ta, na chysiazy hriepa ta, ei hmiakô liata na chapa vâta, kei chhao ta ei cha thei, Abeipa ta a tah.

²⁰ Chavâta pachâ teh, châ pathlatuhpazy hnohta cha pahlyh aw na ta, thlalôhpa ta thlâkhaoh a ngia aw chi ta, he su chô liata chhiena ei patlôsa awpa cha, na mo ta hmô aw vei,’ tahpa ta nama chho aw,” tah ta. Cha biezy cha abei lâ tlôkhei ei ta.