2 ABEIZY 21 - Mara Bible RV (BSI)

Zudâh bei Manase

¹ Manase cha kô hrawh hleinopa a châ nota a bei pathao ta, Zerusale liata kô sypangawh nata kô pangawh â bei.

² Abeipa ta Izarei sawzy hmiakô liata a papua hapa phopizy ta hmo pasichhihpa ama tao tyhpa hawhta, Abeipa mohmô liata hmo pha leipa tao ta.

³ A paw Hezekia ta a parao hapa su sâhpazy paduapathi ta, Izarei bei Ahabâ taozie hawhta, Bâlâ châta maisâhzy padua ta, Aseri tôhzy bô ta, avâ liata a ypa zydua a chhy ta, a chakao ei.

⁴ Abeipa ta, “Zerusale liata ei moh ei paysa aw,” a tahna su, Abeipa o liata khazoh hropa maisâhzy padua ta.

⁵ Abeipa o dôhpachhôh tlyhmia miano liata avâ liata a ypa zydua châta maisâhzy a padua.

⁶ A sawchapawpa cha raopa hlâna atheihna ta hlâ ta, kulâmopa nata pachaopa zy hmâh ta, peihthaipa nata athihpa bie a chho thaipazy â saohiah tyh. Abeipa mohmô liata hmo pha leipa tao ta, Abeipa hie pahâh ha ta.

⁷ Abeipa ta Dâvi nata a sawchapawpa Sawlawmaw hnohta, “He o nata Zerusale khihpi, Izarei chi zydua tawhta ei tlyhpa liana heta ei moh chhâzaw ta ei paysa aw,” a tahna su Achhyna o liata Aseri tôh nothlâhpa a taopa soh ta.

⁸ Abeipa ta, “Ama hnohta bie ei piepa zydua nata nâ chakaotuhpa Mawsi ta ama hnohta ryhpa a piepa zydua kha a phapa ta ama zyh khiahta cha, Izarei pheizy cha ama pathlatuhpazy ei piepa râh tawhtapa he papuasa khao aw va na,” tah ta.

⁹ Châhrasala nathlie khoh leipa ei ta, Abeipa ta Izarei sawzy hmiakô liata a pahleipadia hapa phopizy taopa hlâ chhao ta ru viapa ta hmo parao awpa ta, Manase ta âmo cha a siekheichhei haw.

¹⁰ Abeipa ta a chakaotuhpa hrohsopazy hmâpa ta bie reih ta,

¹¹ “Zudâh bei Manase ta he hmo pasichhih ngaitapazy he tao ta, râh liata a pahrâ tuapa Amawri mo hlâ chhao ta hmo moleipa thata tao via ta, Zudâh chhao ano nothlahpa achhyna liata a pamoleisa hra.

¹² Chavâta Abeipa, Izarei Khazohpa ta hetana heta a tah: Pachâ teh u, Zerusale nata Zudâh chô liata chhiena rarôh ypa patlôsa aw na ta, a theipa maihta ama nah kârano ta â za aw.

¹³ Samâri thliena ri nata Ahabâ chhôhkha padona ri cha Zerusale chô liata parai aw na ta, chyhsa ta beikoh a hnao ta a pakhupa hawhta, Zerusale cha ei hnao aw.

¹⁴ Ei ryuto laibâhpazy cha thy aw ei na ta, ama chariahpazy ku liata pie aw ei na ta, ama chariahpa zydua ta patu awpa nata hrao awpa ama châ aw.

¹⁵ Ama pathlatuhpazy Izi râh tawhta ama kaw pua noh tawhta tanoh taih heta, ei mohmô liata hmo pha lei ngaitapa tao ei ta, ei pathi eina pa-iapa vâ ei ta, cha hmo cha ama chô liata ei tao aw,” tah ta.

¹⁶ Cha dei châ vei, Manase cha mosiapa thisaih thata palo ta, Zerusale doh nata hâ cha thisaih ta a pabie haw. Cha cha Zudâh pamoleisapa ta, Abeipa mohmô liata hmo pha lei ngaitapa ama taopa thota a taopa moleina a châ.

¹⁷ Manase thâtih hropazy nata a hmotaopa zydua nata moleina hmo a taopazy cha, Zudâh beizy thâtih rona châbu liata ropa a châ.

¹⁸ Manase cha a pathlatuhpazy hnohta a mô ta, a o sadô, Uza sadô liata pabu ei ta, a sawchapawpa Amawna ta ano su liata â bei.

Zudâh bei Amawna

¹⁹ Amawna cha kô kih nata kô nopa a châ nota a bei pathao ta, Zerusale liata kô no â bei. A nô moh cha Mesuleme châ ta, Zôbâ khihpa Hâruza sawchanô a châ.

²⁰ A paw Manase hawhta Abeipa mohmô liata hmo pha leipa tao ta.

²¹ A paw lâpi a chhihpa zydua a chhih hra ta, a paw ta khazoh nothlah­pa a chakaopazy chakao ta, â chhy hra.

²² Abeipa, a pathlatuhpazy Khazohpa cha siesai ta, Abeipa lâpi a chhih vei.

²³ Amawna chakaotuhpazy ta arulâta ano cha tei ei ta, abei cha ano o liata ama thie haw.

²⁴ Châhrasala râh zawpizy ta Bei Amawna a teituhpa zydua cha thie ei ta, a sawcha­pawpa Zôsia cha ano su liata bei ta ama tao haw.

²⁵ Amawna hmotaopa thâtih hropazy cha, Zudâh beizy thâtih rona châbu liata ropa a châ.

²⁶ Amawna cha Uza sadô liata ano thlâ liata pabu ei ta, a sawchapawpa Zôsia ta ano su liata â bei.