2 ABEIZY 20 - Mara Bible RV (BSI)

Hezekia pasana nata tlâhna

¹ Cha nohzy liata Hezekia cha thi daihmâpa ta pasa ta. Amôza sawcha­pawpa hrohsopa Isai ano lâ a vy ta, a hnohta, “Abeipa ta hetana heta a tah: ‘Na chhôhkha khihsatôhtuzie awpa paryh teh, na thi aw, hroh aw va chi,’” tah ta.

² Hezekia cha a hmia pâhchhô lâ paheipa ta Abeipa lâ thlâhchhâ ta,

³ “Hy Abeipa, na hmiakô liata ngâchhihpa nata palôh phao phapakipa ei hnei tyhzie nata na mohmô liata hmo phapa ei tao tyhzie zy kha, ngiachhiepa ta a thei thlâh ha mah y,” tah ta. Hezekia cha thata cha ta.

⁴ Isai cha abei o tlyhmia a khô hlâta, Abeipa bie a hnohta vaw tlô ta,

⁵ “Kua la, ei phopi hyutuhpa Hezekia hnohta, Abeipa, châ pathlatuhpa Dâvi Khazohpa ta hetana heta a tah: ‘Na thlahchhâna thei na ta, na mothlihzy ei hmô haw. Nathlie teh, cha patlâh aw na ta, noh thôhna noh ta Abeipa o lâ na khy aw.

⁶ Kô hrawh hleipangawh ta na hro ei pasisa aw. Nâ nata khihpi he Asuria bei ku tawhta cha pachha aw ei na ta, keima vâta nata nâ chakaotuhpa Dâvi vâta khihpi he ei pabohsa awh,’ tahpa ta kei chho teh,” tah ta.

⁷ Isai ta, “Theiku viahchhâ vaw cheih teh u. Cha cha la ei sala, kheihluh liata bai ei sala, a tlâh aw,” tah ta.

⁸ Hezekia ta Isai hnohta, “Abeipa ta na patlâh aw ta, noh thôhna noh ta Abeipa o lâ ei khy thei tlai aw tahpa ngiana khâpa a châ aw?” tah ta.

⁹ Isai ta, “He he Abeipa ta bie â taihpa cha a tao tlai aw tahpa Abeipa tawhta ngiana a châ aw: Nohpahlipa hmia lâ keih hrawh sie awpa ma na khoh, hnôh lâ keih hrawh a sy awpa?” tah ta.

¹⁰ Hezekia ta a chhy ta, “Nohpahlipa cha hmia lâ keih hrawh sie awpa cha nao kaw ta, châhrasala nohpahlipa cha hnôhlâ keih hrawh tlao a sy sy,” tah ta.

¹¹ Hrohsopa Isai ta Abeipa pado ta, Ahâza kahmi liata nohpahlipa a pasie hapa cha hnôh lâ keih hrawh pasysa ta.

Babylaw vyuhtuapazy Hezekia ta â ly

¹² Cha daihti liata, Bâladâ sawchapawpa Babylaw bei Merôdâ Bâladâ ta Hezekia tlâhleipa thâtih vaw thei ta. Hezekia lâta vyuhtuapazy tuah ta, châ nata kuhria zy paphao ta.

¹³ Hezekia ta âmo cha a vaw ly ta, a ryusôhpa sona o zydua pamosa ta. Tâkâzy, ngôhzy, ia-ôzy, sathaw sôhpazy nata a chariah chhaichhizy â kipa ta pamosapa ta, ryusôhpa sopakhyna ozy liata a ypa zydua pahmô khai ta. A o liata a hmo a ypa nata a râh chhôh liata hmo a ypazy Hezekia ta âmo a pahmô leipa y vei.

¹⁴ Chatawhcha hrohsopa Isai cha Bei Hezekia lâ vawh ta, a hnohta, “Kha chyhsazy kha khâpa bie ma ama reih? Khataih tawhta nâ lâ a vypa ma ama châ?” tah ta. Hezekia ta, “Râh hla ngaitapa, Babylaw tawhta a vypa ama châ,” tah ta.

¹⁵ Isai ta, “Na o liata khâpa ama hmô?” tah ta. Hezekia ta a chhy ta, “Ei o liata a ypa zydua ama hmô khai. Ei hmo sopakhyna ozy liata a ypa âmo ei pahmô leipa ei y vei,” tah ta.

¹⁶ Isai ta Hezekia hnohta, “Abeipa bie nathlie teh:

¹⁷ Pachâ teh, na o liata a ypa zydua nata châ pathlatuhpazy ta tanoh taihta ama vaw pachôpakhypa hmo zydua Babylaw lâ ama siekhei nawpa nohzy a vaw tlô hai. Khâpa hmah pahlôhpa châ aw vei, Abeipa ta a tah.

¹⁸ Na sawchapawpa, na chhôh tawhta a pua awpa, nâ ta na sa awpazy tlai chhao siekhei aw ei ta, Babylaw abei o liata hrilyupa ta ama y aw,” tah ta.

¹⁹ Hezekia ta Isai hnohta, “Abeipa bie na reipa cha a pha na,” tah ta. “Ei hro chhôh ta thlalôhna nata abohna a y awpa khiahta cha, cha cha pha thlâh ha vei ma,” tahpa ta a pachâpa vâta, cha bie cha a reipa a châ.

Hezekia thina

²⁰ Hezekia hmotaopa hropazy, a thatlôna zydua nata tipo nata ti lana tao ta, khihpi chhôh lâ ti a patlôsapa thâtihzy cha, Zudâh beizy thâtih rona châbu liata ropa a châ.

²¹ Hezekia cha a pathlatuhpazy hnohta a mô ta, a sawchapawpa Manase ta ano su liata â bei.