2 ABEIZY 2 - Mara Bible RV (BSI)

Elaizâh avâ lâ lapa a châ

¹ Abeipa ta Elaizâh cha khisô ta avâ lâ â chhi nawpa daihti a hnia ha ta. Elaizâh nata Elaisâh cha Kilkal tawhta hmaohkha ta sie ei ta.

² Elaizâh ta Elaisâh hnohta, “Ngiachhiepa ta he liata vaw y mah y. Kei cha Abeipa ta Bethel taih sie awpa ta eina tuah,” tah ta. Elaisâh ta, “Abeipa hrona nata na hrona reipa ta ei reih, cha siesai cheita aw va na,” tah ta. Chatanachata Bethel lâ cha zu ha ei ta.

³ Bethel liata a ypa hrohsopa sahlao sawchapawzy Elaisâh lâ a vy ei ta, a hnohta, “Tanoh he Abeipa ta na chô liata hyutuhpa he a cha lapa aw tahpa na pahno ma?” tah ei ta. Ano ta, “Y, ei pahno na. A chalih thlâh ha muh vy,” tah ta.

⁴ Elaizâh ta Elaisâh hnohta, “Elaisâh y, ngiachhiepa ta he liata vaw y mah y. Kei cha Abeipa ta Zerikô lâ sie awpa ta eina tuah,” tah ta. Elaisâh ta, “Abeipa hrona nata na hrona reipa ta ei reih, cha ysai cheita aw va na,” tah ta. Chatanachata Zerikô cha kei tlô ei ta.

⁵ Zerikô liata a ypa hrohsopa sahlao sawchapawzy ta Elaisâh a kei hnia ei ta, a hnohta, “Tanoh he Abeipa ta na chô liata hyutuhpa he a cha lapa aw tahpa na pahno ma?” tah ei ta. Ano ta, “Y, ei pahno na. A chalih thlâh ha muh vy,” tah ta.

⁶ Elaizâh ta Elaisâh hnohta, “He liata vaw y mah y, ei châ haw na. Kei cha Abeipa ta Zawdâh lâ sie awpa ta eina tuah,” tah ta. Châhrasala ano ta, “Abeipa hrona nata na hrona rei­pa ta ei reih, cha siesai cheita aw va na,” tah ta. Chatanachata ama pano ta sie lymâ ei ta.

⁷ Hrohsopa sahlao sawchapaw­zy hry tawhta sypangawh vawh ei ta, âmo dady liata â hlapi ta a kei duah ei ta. Âmo pano deikua cha Zawdâh chavah kiah liata a duah ei ta.

⁸ Elaizâh ta a viahkao pasipa la ta, â tôh lâta chaty ta, ti cha tu ta, chavei chachâh ta a vaw pachhaih ta, ama pano ta alei hipa liata chaka ha ei ta.

⁹ Haosâ ama kia tawhta, Elaizâh ta Elaisâh hnohta, “Nâ tawhta lapa ta ei y hlâta khâpa ei cha taopa aw, na hiah mah y,” tah ta. Elaisâh ta, “Na thlahpa topa lie no to awpa ta ei châ haw,” tah ta.

¹⁰ Elaizâh ta, “Hmo ru ngaitapa dia na hia! Chatatlyh, ru hra sala nâ tawhta lapa ta ei y nota eina hmô khiah chi ta la, to aw chi ta, eina hmô vei khiah chi ta deikua cha, to aw va chi,” tah ta.

¹¹ Chatawhcha hmaohkha ta sie lymâ ei ta, bielôhawhpa ama rei hai nota, mei talailih nata mei arâ zy thlai a vaw lâ ta, ama likawh liata vaw tla ta, âmo pano cha vaw pachhaih ta, Elaizâh cha khisô liata vârâh lâ kiah ha ta.

¹² Cha cha Elaisâh ta hmô ta, “Ei pâ, Hy ei pâ, Izarei talailihzy nata ama arâ pheisaihzy ta a ypa y,” tah ta. Cha khai tawhta cha, Elaisâh ta Elaizâh cha hmô khao vei. Chatawhcha Elaisâh cha a chysiazy la ta, hlai no ta hrie ta.

¹³ Elaizâh viahkao pasipa a zâ tlapa cha chaba ta, kua ta, Zawdâh kiah liata a kei duah ta.

¹⁴ Elaizâh tawhta viahkao pasipa a zâ tlapa la ta, cha chata ti cha tu ta, “Zehôvâh, Elaizâh Khazohpa cha khataih liata a y?” tah ta. Ti a tu nahta, chavei chachâh ta a vaw pachhaih ta, Elaisâh cha chaka ta.

Elaisâh ta Elaizâh su â thla

¹⁵ Zerikô liata hrohsopa sahlao sawchapaw ano dady ta a ypazy ta, ama hmô nahta, “Elaizâh thlahpa cha Elaisâh chô liata â choh ha tlai na,” tah ei ta. Ano dy awpa ta vawh ei ta, a hmiakô liata alei lâ a bôhpa ta, a naoh ei ta.

¹⁶ A hnohta, “Tahmâ pachâ teh, châ chakaotuhpazy hnohna heta chyhsa thatlôpa sypangawh ama y. Na zibeipa tlua awpa ta âmo cha pasiesa ei suh u. Abeipa Thlahpa ta khykhei aw ta, khataih tlâh liata tlyma, khataih saikao liata tlyma, a pathla thei ngyu mâh tâh,” tah ei ta. Elaisâh ta, “Nama pasiesa awpa châ vei,” tah ta.

¹⁷ Ama hmia a kha khao leina taihta ama rei ngâ thlâh hapa vâta, Elaisâh ta, “Pasiesa teh u,” tah ta. Chatanachata chyhsa sypangawh tuah ei ta. Noh thôh chhôh tlua ei ta, châhrasala hmô leipa ei ta.

¹⁸ Zerikô liata Elaisâh a y thlâh ha chy nota ano lâ vaw kua ei ta, Elaisâh ta ama hnohta, “‘Sie khuh vy,’ cha tah ha veih eina ma?” tah ta.

¹⁹ Cha khihpi chyhsazy ta Elaisâh hnohta, “Moh tua, ei zibeipa ta na hmôpa hawhna heta, he khihpi he khih pha kawpa a châ. Châhrasala ti pha leipa vâta, a chhaohlei he a choh haw,” tah ei ta.

²⁰ Elaisâh ta, “Biebuh thiehpa na vaw pie u la, cha liata alôh soh teh u,” tah ta. Biebuh cha pie ei ta.

²¹ Tihnawh lâ vawh ta, alôh mia ta, “Abeipa ta hetana heta a tah: He ti he ei pathaisa haw. Tahmâ tawhta cha thina tlyma, nawh raona tlyma, ti tawhna heta y khao aw vei,” tah ta.

²² Elaisâh reipa hawhta, ti cha tanoh taihta a pathaih pathlah haw.

²³ Cha tawhna chata Bethel lâ khy ta, lâpi liata a sie hai nota, chapaw hawtizy khihpi tawhta vaw pua ei ta, vaw pahneisao ei ta, a hnohta, “Nâ, luh pôlôpa, khy ha teh; nâ, luh pôlôpa, khy ha teh,” tah ei ta.

²⁴ A vaw heih ta, âmo cha vaw hmô ta, Abeipa moh ta ama chô liata chhiesa ta. Lyurâhpa tawhta chavyh panô pô no vaw pua ei ta, ama hry liata hawti sypalih nata panozy cha a hriechheih khai ha ei.

²⁵ Cha su tawhta Kâmel Tlâh lâ sie ta, cha tawhna chata Samâri lâ kua ha ta.