2 ABEIZY 19 - Mara Bible RV (BSI)

Isai ta Hezekia thlah a palôh

¹ Bei Hezekia ta cha bie cha a thei nahta, a chysiazy hrie ta, latho poh a bupa ta Abeipa o chhôh lâ a ngia ta.

² Hezekia ta abei o hyutuhpa Eliakima nata chârohtuhpa Sebanâ nata theihthaipa uhthei viapazy cha latho poh pabusapa ta Amôza sawchapawpa hrohsopa Isai lâ tuah ta.

³ Âmo ta Isai hnohta, “Hezekia ta hetana heta a tah: ‘Tanoh he nôpona noh châ ta, rana noh chhao châ ta, nohzaona noh a châ. Sawzy ama pina daihti tlô ha ta, châhrasala papihsa awpa ta thatlôna y khao vei.

⁴ Khazohpa hrohpa pasipasawh awpa ta, a zibeipa Asuria bei ta a kaw tuapa Râbâsake bie zydua kha, Abeipa na Khazohpa ta thei ta, a biereipa a theipazy vâna chata Abeipa na Khazohpa ta a ra tlai aw. Chavâta laibâhpa a y tlakaihpazy châta na thlahchhâna avâ lâ pakiasa mah y,’ a cha tah,” tah ei ta.

⁵ Bei Hezekia chakaotuhpazy Isai kô ama tlô nahta,

⁶ Isai ta ama hnohta, “Nama zibeipa cha kei chho teh u, ‘Abeipa ta hetana heta a tah: Na bie theipa, Asuria bei chakaotuhpazy ta eina reipachhienazy vâ ei ta chi khah y.

⁷ Pachâ teh, a chhôh liata thlahpa soh aw na ta, bie pathâhpa a thei aw. Chatanachata a râh lâ a lie aw ta, ano râh liata zaozi ta ei papaosa aw,’ tahpa ta,” tah ta.

Senâkeri ta Abeipa chi vei

⁸ Râbâsake cha Lakhi khihpi tawhta Asuria bei a sie hapa thâtih a theipa vâta, Zudâh tawhta a lie ta. Asuria bei cha Libnâ khihpi â vaw dyuh haipa hmô ta.

⁹ Cha nona chata Kusi bei Tihâkâ ta ano a dyuh awpa ta a vaw puapa thâtih Asuria bei ta thei ta. Hezekia lâ lyuhchâpazy tuah heih ta.

¹⁰ Ama hnohta, “Hetana heta Zudâh bei Hezekia cha nama chho aw: ‘Asuria bei ku liata Zerusale piepa châ aw vei tahpa ta nâ ngâchhâpa na Khazohpa cha a padôveisa khah y.

¹¹ Pachâ teh, râh zydua chô liata Asuria beizy hmo taozie nata râh zydua ama parao khaizie zy na thei khai. Nâ chhao pachhapa na châ hlei aw ma?

¹² Nâ pathlatuhpazy ta ama pahleipadia hapa phopizy, Kôzani, Harânâ, Reze nata Telasâ liata a ypa Idâh mo zy kha ama phopi khazohzy ta ama pachha thei ma?

¹³ Khataih liata Hâmathi bei, Apâ bei, Sephavai khihpi bei, Henâ bei nata Ivâ beizy kha ama y khai haw?’ tahpa ta nama chho aw,” tah ta.

Hezekia thlahchhâna

¹⁴ Hezekia ta lyuhchâpazy vaw phaopa châ cha hmô ta, reih ta. Hezekia cha Abeipa o lâ khy ta, châ cha Abeipa hmiakô liata pakai ta.

¹⁵ Hezekia cha Abeipa hmia­kô liata thlahchhâ ta, “Hy Abeipa, Izarei Khazohpa, cherubizy chô liata beidyuchhai liata a tyuhpa y, nâ cha Khazohpa châ chi ta, nâma deita he lei liata khinarâh zydua Khazohpa na châ. Nâ ta alei nata avâ he na tao.

¹⁶ Hy Abeipa y, na nah pachôh la, nathlie tua. Hy Abeipa y, na mo padeih la, moh tua. Senâkeri ta Khazohpa hrohpa pasipasawhna bie a vaw paphaopa he nathlie tua.

¹⁷ Hy Abeipa y, Asuria beizy ta phopizy nata ama râhzy cha parao ha tlai ei ta,

¹⁸ ama khazohzy chhao mei liata ama thy ha tlai. Chazy cha Khazohpa châ leipa ei ta, chyhsapa ku ta taopa tho nata lô dei ama châpa vâta pahleipadiapa ama châ.

¹⁹ Chavâta Hy Abeipa eima Khazohpa y, nâma deita he Zehôvâh Khazohpa cha na châ tahpa alei chô liata khinarâh zydua ta ama pahno thei nawpa ta, ngiachhiepa ta Senâkeri ku tawhtapa he miah pachha tlai mah y,” tah ta.

Isai ta Senâkeri paona a chhochhielie

²⁰ Chatawhcha Amôza sawchapawpa Isai ta Hezekia lâ lyuhchâpa tuah ta, a hnohta, “Abeipa, Izarei Khazohpa ta hetana heta a tah: ‘Asuria bei Senâkeri kyh liata kei lâta thlah na chhâpa kha ei thei haw.’

²¹ He he Senâkeri kyh Abeipa ta a reipa bie a châ: “Zaio zuah laihsa kôpa ta Cha mohnao ta a cha pahneisao; Zerusale zuah ta A luh a cha chahuah chie.

²² “Ahy ma pasipasawh chi ta na reipachhie tly? Ahy chô liata ma na ao ki pasâh thlu chi ta, Na mo nâ pasâh thlu? Izarei Mo Pathaihpa chô liata na taopa a châpa kha!

²³ Na lyuhchâpazy hmâpa ta ei Zibeipa pasipasawh chi ta, ‘Ei talailih hluhpi chhaota tlâh sâhpazy kiah na ta, Lebanaw chhâna taihta ei kiah haw; A sidy tho a sâh chaipazy thlu na ta, A meisah tho pha chaipazy ei thlu haw; A riehmo a hla chaipa a ngia na ta, A râhmâh pha chaipa ei ngia haw.

²⁴ Tikhaoh chaopa ta, Râh hropa tizy doh na ta; Izi vahtiepa zydua Ei pheipazah ta ei pakua khai ha ei,’ tah chi ta.

²⁵ “Khahlâ tawhta ei vaw rao hapa a châzie thei beih va chi ma? Thokhy khihpizy cha, Raona apachona khihpizy lâta na pachâsa awpa kyh, Hlâno tawhta ei vaw pachhuah hapa cha, Tahmâ ei vaw patlôsa hih.

²⁶ Chavâta a chhô liata a ypazy cha, Thatlôna hnei leipa ei ta; Riahchhiepa ta y ei ta, Ama maophyuh hapa kha. Lyu chicheipa hawhta châ ei ta, Si panyupa ama lyu; Vâphuh liata sibiepa hawhta, Ama lai hlâta ama uah haw.

²⁷ “Châhrasala nâ tyupa pahno na ta, Na puapa nata nâ ngiapa chhao ei pahno; Ei chô liata na hiehâhna chhao ei pahno.

²⁸ Ei chô liata na ruchhô ta, Nâ palaina ei nah liata â kaw ngia hapa vâta, Na hnari cha daoh aw na ta, Ei chhâri na hmao liata pabawpa ta, Nâ vyna lâpi lâ tlai khata ei cha pakuasa heih aw.”

²⁹ “He he na châta ngiana a châ aw: Atakô cha sâh sawhlipa a ngiapâ aw ei chi ta, hâhkô chhao a sawhlipa namâ ngiapâ aw. A kô thôhna liata chi cheih aw ei chi ta, nama hria aw. Kre sadôzy tao aw ei chi ta, a theilâpazy nama nie aw.

³⁰ Zudâh pathla laibâhpazy cha a ry lâ thari thla aw ei ta, a chô lâta thei ama pathei heih aw.

³¹ Laibâhpazy cha Zerusale tawhta pua aw ei ta, ahrohpazy Zaio Tlâh tawhta ama pua aw. Abeipa phahnaingiahna ta chazy cha a tao aw.

³² “Chavâta Abeipa ta Asuria bei kyh liata hetana heta a tah: ‘He khihpi he vaw tlô leipa aw ta, he liata châtai tai kha chhao ka aw vei. Vyhphao chhaota khihpi hmiakô liata a vy leipa aw ta, khihpi dôhna alei chhao thokhy liata pathlu thlu aw vei.

³³ Â vyna lâpi lâta, cha lâpi lâ tlai chata a lie aw ta, he khihpi he vaw tlô aw vei,’ Abeipa ta a tah.

³⁴ Keima vâta nata nâ chakaotuhpa Dâvi vâta, he khihpi he vaih aw na ta, ei pabohsa aw,” tah ta.

³⁵ Cha zâ ta Abeipa vâlyuhchâpa cha pua ta, Asuria mo riehmo liata pheisaih 185,000 thie ta. Asuria pheisaihzy cha mydi kari ta ama thyu nahta, riehmo cha athihpa ri ta a biepa hmô ei ta.

³⁶ Chatanachata Asuria bei Senâkeri cha pua ta, a lie ta, Ninivâ khihpi liata y ta.

³⁷ Noh kha cha a khazoh Nisrô achhyna o liata khazoh â chhy hai nota a sawchapawzy, Adarâmele nata Sareze ta zaozi ta chhawhsao ei ta, Ararâ râh lâ amâ râ hapa vâta, a sawchapaw hropa Esâhadô ta ano su liata â bei haw.