2 ABEIZY 18 - Mara Bible RV (BSI)

Zudâh bei Hezekia

¹ Elâ sawchapawpa Izarei bei Hôsia kô thôh â bei kô ta, Ahâza sawchapawpa Zudâh bei Hezekia a bei pathao ta.

² Kô kih nata kô pangawhpa a châ nota a bei pathao ta, Zerusale liata kô kih nata kô chaki â bei. A nô moh cha Abi châ ta, Zekaria sawchanô a châ.

³ A pathlatuhpa Dâvi taozie zydua hawhta, Abeipa mohmô liata hmo dopa tao ta.

⁴ Su sâhpazy parao ta, lôbôzy pacho ta, Aseri tôhzy a chhawh pachhô khai haw. Mawsi ta dawh parih a taopa chhao kha a pakeichheih khai haw, cha daihti taihta Izarei sawzy ta Nehustâ ama tahpa dawh parih lâ cha atheihnazy ama hlâ thlâh ha chypa vâta.

⁵ Hezekia cha Abeipa, Izarei Khazohpa ngâ ta, ano daihti hlâta Zudâh beizy hry liata ano hawhpa y leipa ei ta, ano khai tawh chhao ta y khao veih ei.

⁶ Abeipa cha khâchâ patu ta, Abeipa a pazipa tawhta tleisai beih leipa ta, Abeipa ta Mawsi hnohta bie a piepa biepiepazy a zyh lymâ.

⁷ A hnohta Abeipa y ta, a siena lâ maih a hlaotloh lymâ. Asuria bei ry tawhta pua ta, Asuria bei cha chakao khao leipa ta.

⁸ Philistinâ mo a dyuh ta, Kâza khih nata a râh zydua, riahvaina o nata thokhy hneipa khihpizy taih a pahnie khai haw.

Samâri paona

⁹ Bei Hezekia kô pali â bei kô ta, cha cha Elâ sawchapawpa Izarei bei Hôsia kô sari â bei kô nata a su ta, Asuria bei Salmanesa ta Samâri vaw siehnao ta, dôh ta.

¹⁰ Kô thôh a dôh khai tawhta la ha ta. Hezekia kô charu â bei kô ta, cha cha Izarei bei Hôsia kô chaki â bei kô nata a su ta, Samâri khihpi cha a pao haw.

¹¹ Asuria bei ta Izarei mo cha Asuria râh lâ siekhei ta, Hâlâh khih nata Hâbaw chavah kiah liata Kôzani khih nata Mede mo khihpizy liata a paysa ei.

¹² Cha hawhta ama yna chhâpa cha, Izarei sawzy ta Abeipa ama Khazohpa bie zyh khoh leipa ei ta, a biehrai nata Abeipa chakaotuhpa Mawsi biepiepazy nathlie khoh leipa ei ta, ama zyh khoh leipa vâta a châ.

Senâkeri ta Zudâh a siehnao

¹³ Bei Hezekia kô hrawh hleipalih â bei kô ta, Asuria bei Senâkeri ta Zudâh râh liata thokhy hneipa khihpi zydua khyhnao ta, la khai ha ta.

¹⁴ Zudâh bei Hezekia ta Lakhi khih liata Asuria bei lâ lyuhchâpa tuah ta, a hnohta, “Ei vaw tao chhei ha na, nâ sysai teh. Einâ hnawpa maih chi ei tao aw,” tah ta. Asuria bei ta Zudâh bei Hezekia cha tâkâ talent za thôh nata ngôh talent sythôh a hnaw ta.

¹⁵ Hezekia ta Abeipa o liata tâkâ a ypa zydua nata abei o ryubyh liata a ypa zydua pie ta.

¹⁶ Cha daihti liata Hezekia ta Abeipa Achhyna o ochhizy liata ngôh nata Zudâh bei Hezekia ta otôh liata ngôh a pahupazy cha la khai ha ta, Asuria bei cha pie ta.

¹⁷ Asuria bei ta pheisaih hyutuhpa Tartâ nata Râbâsari nata Râbâsake zy cha pheisaih hluhpi chhaota Lakhi tawhta Zerusale liata Bei Hezekia lâ tuah ta. Zerusale lâ khy ei ta, ama tlô nahta, machhua tipo ti lâpi kiapâh liata a ypa Chysia Pasuna su lâ siena lâlai liata a duah ei ta.

¹⁸ Abei cha pado ei ta, Hikia sawchapawpa abei o hyutuhpa Eliakima, chârôhtuhpa Sebanâ nata Asâpha sawchapawpa thâtih rohtuhpa Zôah zy âmo lâ kei pua ei ta.

¹⁹ Râbâsake ta ama hnohta, “Hezekia cha kei chho teh u. Bei rônahpa Asuria bei ta hetana heta a tah: Khâpa ma nâ ngâchhâ?

²⁰ Bie thlâhthlipazy cha a dyuhzie thaina nata hmotaotheina hawhta ma na pachâ? Ahy a ngâchhâ chi ta ma, tahmâ einâ dyuh chi?

²¹ Pachâ teh, tahmâ he Izi a ngâchhâ chi ta, Izi cha lohthi tliepa-ipa chôchahrei châ ta, a pachyuna châta ano a chhôtuhpa kupazah a chhô tyhpa a châ. Izi bei Phiraoh cha ano a ngâchhâpazy chô liata cha hawhta a tao tyhpa a châ.

²² ‘Keimo la Abeipa eima Khazohpa na eimâ ngâchhâ,’ nama tahpa chhao ta, ano cha Hezekia ta Zudâh râhsawzy nata Zerusale khihsawzy hnohta, ‘Zerusale liata he maisâh hmiakô lia deita ta namâ chhy awpa a cha,’ tah ta, a su sâhpazy nata a maisâhzy a parao khai hapa kha châ vei ma?

²³ Tahmâ a vy la, ei zibeipa Asuria bei hnohta sôhkâ pie awpa ta bie a taih teh. Keima lâ tawhta cha, arâ pheisaih sâh no na hnei khiahta cha, arâ sâh no ei cha pie aw.

²⁴ Talailih nata arâ pheisaih zy kyh liata Izi nâ ngâchhâ chhôh zydua cha, kheihta ma ei zibeipa chakaotuhpa chyh chaipazy hry liata pheisaih hyutuhpa pakha chhao he na pakhâ thei aw?

²⁵ Cha dei châ vei, he su parao awpa heta, Abeipa a hlao leipa ta a khypa ma ei châ? Abeipa ta ei hnohta, ‘Cha râh cha khyhnao la, kaw parao teh,’ eina tahpa vâta â khypa mah ei châ tâh,” tah ta.

²⁶ Hikia sawchapawpa Eliakima nata Sebanâ nata Zôah zy ta Râbâsake hnohta, “Ngiachhiepa ta châ chakaotuhpazy he Aramia reih ta bie miah chho teh, eima thei thlâh haw. Thokhy chô liata chyhsazy nah theina liata Zudâh reih ta rie miah chho khah y,” tah ei ta.

²⁷ Châhrasala Râbâsake ta ama hnohta, “Ei zibeipa ta he biezy he na zibeipa hnohta nata nâma hnoh dei ta reih awpa ta ma eina kaw tuah? Thokhy chô liata a tyuhpa, nama hnohta ama ie nie ta, ama pazô a doh awpazy hnohna chhao heta reih awpa ta eina kaw tuahpa châ vei ma” tah ta.

²⁸ Râbâsake cha a duah ta, Zudâh reih ta ao paro ngaitapa ta awh ta: “Bei rônahpa Asuria bei bie he nathlie teh u!

²⁹ Abei ta hetana heta a tah: ‘Hezekia a padôveisa khuh vy. Ano ta ei ku tawhta cha pachha thei aw veih ei.

³⁰ Hezekia ta, “Abeipa ta miah pachha tlai aw ta, he khihpi he Asuria bei ku liata piepa châ aw vei,”’ tahpa ta, Abeipa a ngâchhâ chhei awpa ta cha tao khah ei sy.

³¹ Hezekia bie nathlie khuh vy. Asuria bei ta hetana heta a tah: ‘Nâ ryh u la, kei lâta vaw pua teh u. Chatanachata nama kre zôh chyu tawhta nie pazao aw ei chi ta, nama theiku kô chyu tawhta niepa ta, nama tikhaoh chyu tawhta tizy nama doh pazao thei aw.

³² A vy aw na ta, thi leipa ta nama hroh thei nawpa ta, nama râh hawhta sâh nata kresawhti puana râh, viahchhâ nata kre sadô yna râh nata ôli kôzy nata kheihti yna râh lâ ei châ chhi hlâlei ei cha, cha hawhta nama y lymâ thei aw. Hezekia ta, “Abeipa ta miah a pachha aw,” tahpa ta, châ chhi chhei a châ chhuahpa ei cha nathlie khuh vy.

³³ Phopizy khazohzy hry liata, Asuria bei tawhta a râh a pachha theipa khazoh pakha chhâ ama y ma?

³⁴ Hâmathi khihpi nata Apâ khihpi khazohzy kha khataih liata ama y haw? Sephavai, Henâ nata Ivâ khazohzy chhao kha khataih liata ama y khai haw? Samâri kha ei ku tawhta ama pachha ma?

³⁵ Ahy râh khazohzy kha ma ei ku tawhta ama râh a vaw pachha ha ei? Abeipa chata Zerusale he ei ku tawhta zua a pachha aw ma?’” tah ta.

³⁶ Bei biepiepa ta, “A chhy khuh vy,” a tah hapa vâta, zawpizy cha a chalih thlâh ha ei ta, kawh kha hmah a chhy veih ei.

³⁷ Chatawhcha Hikia sawchapawpa abei o hyutuhpa Eliakima, chârohtuhpa Sebanâ nata Asâpha sawchapawpa thâtih rohtuhpa Zôah zy cha ama chysiazy hriepa ta Hezekia lâ vawh ei ta, Râbâsake bie reipazy cha kei chho ei ta.