2 ABEIZY 17 - Mara Bible RV (BSI)

Izarei bei Hôsia

¹ Zudâh bei Ahâza kô hrawh hleino â bei kô ta, Elâ sawchapawpa Hôsia cha Izarei chô liata Samâri liata a bei pathao ta, kô chaki â bei.

² Abeipa mohmô liata hmo pha lei ngaitapa tao ta. Châhrasala ano daihti hlâta Izarei beizy hawh ngâsâ ta la tao vei.

³ Asuria bei Salmanesa ta vaw siehnao ta. Chatanachata Hôsia cha Salmanesa ry liata bei ta y ta, a hnohta râhpaw a pie tyh.

⁴ Hôsia ta Izi bei Sô lâ lyuhchâpa tuah ta, Asuria bei hnohta a kô charei ta râhpaw a pie tyhpa cha pie khao leipa ta. Cha hawhta Hôsia ta a dôveina cha Asuria bei ta pahno ha ta. Chavâta Asuria bei ta Hôsia cha patu ta, chahryna chôta patâhna o liata khô ta.

⁵ Asuria bei ta Izarei râh zydua chho laih ta, Samâri kei tlô ta, kô thôh chhôh dôh ta.

Izarei paona

⁶ Hôsia kô chaki â bei kô ta, Asuria bei ta Samâri khihpi cha la ta, Izarei mo cha Asuria râh lâ siekhei ta, Hâlâh khih nata Hâbaw chavah liah liata Kôzani khih nata Mede mo khihpizy liata paysa ta.

Nothlahpa achhyna vâta hiepatlana

⁷ Cha hawhta ama yna chhâpa cha, Izarei sawzy ta Izi bei Phiraoh ku ry liata ama yna Izi râh tawhta a kaw chhi papuatuhpa Abeipa ama Khazohpa chô liata hmo parao ei ta, khazoh hropazy tlao chi ei ta,

⁸ Abeipa ta Izarei sawzy hmiakô liata a papua hapa phopizy taozie nata Izarei beizy tao tyhpa hmo pha leipazy ama taopa vâta a châ.

⁹ Izarei sawzy ta Abeipa ama Khazohpa chô liata hmo doleipa arulâta tao tyh ei ta. Ama khih zydua liata, riahvaina o sâhpa tawhta thokhy hneipa khihpi taihta su sâhpazy tao ei ta.

¹⁰ Tlâh sâhpa to liata nata tho hrohpa to ry liata lôbôzy bôpa ta Aseri tôhzy padua ei ta.

¹¹ Cha su sâhpa zydua liana chata Abeipa ta ama hmiakô liata a chadai hapa phopizy taozie hawhta ropahâhpazy rao ei ta. Hmo molei ngaitapazy tao ei ta, Abeipa hie ama pahâh haw.

¹² Abeipa ta ama hnohta, “He hmo he nama tao awpa châ vei,” a tahpa nothlahpazy ama chakao tyh.

¹³ Chatanachôta Abeipa ta hrohsopa to nata hmôtheituhpa to hmâpa ta, “Nama yzie moleipazy a heihsai u la, châ pathlatuhpazy hnohta bie ei piepa Ryhpa nata nâ chakaotuhpa hrohsopazy tuapa ta ei cha piepa ei, ei biepiepazy nata bieraopazy zyh teh u,” tahpa ta Izarei nata Zudâh zy cha zikyu khâ a râ tyh ta.

¹⁴ Châhrasala a pyh khoh hlei veih ei. Abeipa ama Khazohpa a ngâ khoh leipa ama pathlatuhpazy ta kuhchhapa ta ama ypa hawhta, kuhchhapa ta ama y hra.

¹⁵ Ama pathlatuhpazy hnohta bieraopa nata biehrai a taopazy nata zikyurâna a piepazy cha tlyhnypa ta, nothlahpa hraoleipazy pangai ei ta, âmo chhao hraoleipa ama châ haw. Abeipa ta ama taozie hawhta tao lei awpa ta bie a vaw pie hapa, ama chheipâh liata phopizy taozie ama zi lymâ.

¹⁶ Abeipa ama Khazohpa biepiepa zydua tleisai ei ta, viahchaotaw nothlahpa leihpa miano a tao ei ta. Aseri tôh padua ei ta, avâ liata a ypa zydua a chhy ei ta, Bâlâ ama chakao tyh.

¹⁷ Ama sawchapawzy nata ama sawchanôzy raopa hlâna atheihna ta hlâ ei ta, pachaopazy nata dyuzy hmâh ei ta, Abeipa mohmô liata hmo pha leipa tao awpa ta âmosasyh a zuah ei ta, Abeipa hie ama pahâh tyh.

¹⁸ Chavâta Abeipa cha Izarei chô liata a pathi ia ngaita ta, a mohmô tawhta a papua ha ei. Zudâh chi tah leipa ta cha pahlôhpa y khao veih ei.

¹⁹ Zudâh mo chhao ta Abeipa ama Khazohpa biepiepazy zyh leipa ei ta, Izarei mo pathaopa taoziezy zi hra ei ta.

²⁰ Chavâta Abeipa ta Izarei pathla zydua cha dytha ta, ama rie patheipa ta, hraotuhpazy ku liata hlâpa ta, a mohmô tawhta a thy pathlah ha ei.

²¹ Nebâ sawchapawpa Zerôbaw ta Izarei cha Dâvi pathla tawhta pachhaih ta, ano cha bei ta ama tao. Zerôbaw ta Izarei cha Abeipa ama pazipa tawhta tleikhei ta, moleina lai ngaitapa a pataosa ei.

²² Izarei sawzy ta Zerôbaw moleina taopa zydua tao hra ei ta, chazy cha a heihsai khoh veih ei.

²³ Chavâta Abeipa ta a hrohsopa zydua hmâpa ta a rei hapa hawhta, Izarei cha a mohmô tawhta a papua haw. Chatanachata Izarei cha ama râh tawhta Asuria lâ a chhipa châ ei ta, tanoh taihta cha su liata ama y.

Chihropazy Samâri liata ama pahrâ

²⁴ Asuria bei ta Babylaw, Kuthâ, Avâ, Hâmathi nata Sephavai khihzy tawhta chyhsazy a zâ chhi ta, Izarei sawzy vyuhpa ta Samâri khihpizy liata a pahrâsa ei. Chatanachata Samâri cha la ei ta, a khihpizy liata ama pahrâ haw.

²⁵ Cha liata ama y tua nota, Abeipa chi leipa ei ta, chavâta Abeipa ta ama hry liata chakeibarôhneipazy vaw tuah ta, chyhsa thokha a siesao haw.

²⁶ Asuria bei hnohta, “Pasie chi ta, Samâri râh khihpizy liata na sopa phophizy ta a râh khazoh ryhpa pahno leipa ei ta. Chavâta a râh khazoh ta chakeibarôhneipazy vaw tuah ta, a râh khazoh ryhpa ama pahno leipa vâta, chyhsazy ama siesao ngâ kaw,” tahpa ta chho ei ta.

²⁷ Asuria bei ta, “Cha râh tawhta sei ta namâ chhipazy hry liata theihthaipa pakha a chhi u la, sie sala, cha liata pahrâ sala, a râh khazoh ryhpa cha pachu mawh sy,” tahpa ta biepie ta.

²⁸ Chatanachata Samâri râh tawhta amâ chhipazy hry liata theih­thaipa pakha cha Bethel liata kei y ta, Abeipa ama chi nawpazie âmo pachu ta.

²⁹ Châhrasala phopi to ta ama khazoh chyu a tao pyly ei ta, Samâri chyhsazy ta su sâhpazy liata achhyna su ama taopazy liata soh ei ta, cha hawhna chata phopi to ta ama pahrâna khihpizy liata tao ei ta.

³⁰ Babylaw mo ta Sukôbenô tao ei ta, Kuthâ mo ta Nakâ tao ei ta, Hâmathi mo ta Asimâ tao ei ta,

³¹ Avi mo ta Nibâ nata Tartâ tao ei ta; Sephavai mo ta ama khazoh Adarâmele nata Anâmele lâta ama sawzy raopa hlâna atheihna ta ama hlâ tyh.

³² Abeipa chhao chi ei ta, ama hry liata chyhsa kheihawhpa rai su sâhpa theihthaipazy ta rao ei ta, âmo chata su sâhpa achhyna suzy liata atheihna ama hlâpa tyh.

³³ Abeipa cha chi taraw ei ta, châhrasala lapapuapa ta ama yna phopizy taoziezy zipa ta, ama khazohzy ama chakao pâ lymâ.

³⁴ Ama taozietyhpa hawhta tanoh taihta ama tao lymâ. Abeipa chi leipa ei ta, Abeipa ta Izarei tahpa ta a bipa Zakaw pathlazy hnohta a piepa bieraopazy, pachianazy, ryhpazy nata biepiepazy zyh khoh veih ei.

³⁵ Abeipa ta ama hnohta biehrai tao ta, “Khazoh hropazy nama chi awpa châ leipa ta, ama hmiakô liata namâ bôh awpa châ leipa ta, nama chakao awpa châ leipa ta, âmo lâ atheihna nama hlâ awpa châ vei,

³⁶ A hmotaotheina rônahpa nata bâh pazawhpa ta Izi râh tawhta châ kaw chhipapuatuhpa Abeipa deita nama chi awpa a châ. Ano cha namâ chhy awpa châ ta, ano lâta namâ theih awpa a châ.

³⁷ Bieraopazy, pachianazy, ryhpa nata biepiepa nama châta a ropazy kha chhâzaw ta nama zyh awpa a châ. Khazoh hropazy nama chi awpa châ vei.

³⁸ Nama hnohta biehrai ei taopa kha nama my awpa châ leipa ta, Khazoh hropazy nama chi awpa châ vei.

³⁹ Abeipa nama Khazohpa deita nama chi awpa châ ta, ano ta nama chariahpa zydua ku tawhta a cha pachha aw ei,” tahpa ta ama hnohta biepie ta.

⁴⁰ Châhrasala nathlie khoh leipa ei ta, ama taozietyhpa hawhta ama tao lymâ.

⁴¹ Cha phopizy chata Abeipa cha chi taraw ei ta, ama khazoh nothlahpa leihpazy chhao ama chakao pâ lymâ. Tanoh taihta ama pathlatuhpazy taozie hawhta ama sawzy ta tao ei ta, ama samohzy chhao ta ama tao lymâ.