2 ABEIZY 16 - Mara Bible RV (BSI)

Zudâh bei Ahâza

¹ Remâliah sawchapawpa Pekâ kô hrawh hleisari â bei kô ta, Zôthâ sawchapawpa Zudâh bei Ahâza a bei pathao ta.

² Ahâza cha kô kihpa a châ nota a bei pathao ta, Zerusale liata kô hrawh hleicharu â bei. A pathlatuhpa Dâvi ta Abeipa mohmô liata hmo dopa a taopa hawhta tao leipa ta,

³ Izarei beizy lâpi tlao a chhih hra ta. Abeipa ta Izarei sawzy hmiakô liata a papua hapa phopizy ta hmo pasichhih ngaitapa ama tao tyhpazy tao hrapa ta, a sawchapawpa cha raopa hlâna ta hlâ ta.

⁴ Su sâhpazy, tlâhzy nata tho hrohpa to ry liatazy atheihnazy hlâ ta, ropahâhpazy a rao tyh.

⁵ Aramia bei Rezi nata Remâliah sawchapawpa Izarei bei Pekâ cha Zerusale a dyuh awpa ta khy ei ta, Ahâza cha dôh ei ta, châhrasala pahnie thei leipa ei ta.

⁶ Cha daihti liata, Aramia bei Rezi ta Elâ khihpi cha Aramia râh châta la heih ta. Zu chyhsazy cha Elâ khihpi tawhta papua ta, Edômâ mo a vy ei ta, tanoh taihta Elâ khihpi liata ama pahrâ haw.

⁷ Ahâza ta Asuria bei Tikalâpilesa lâ lyuhchâpa tuah ta, a hnohta, “Châ chakaotuhpa nata na sawchapawpa ei châ hih. A khy la, nâ dyuh ngâpa Aramia bei ku tawhta nata Izarei bei ku tawhta na kaw pachha teh,” tah ta.

⁸ Ahâza ta Abeipa o liata tâkâ nata ngôh a ypazy nata abei o ryubyh liata a ypazy la ta, Asuria bei lâ kuhria paphao ta.

⁹ Asuria bei ta a bie reipa cha a vaw pyh ta. Chatanachata Asuria bei ta Dâmaskâ khihpi cha siehnao ta, la ta, a chyhsazy cha Kiri lâ sei ta a chhi ta, Rezi cha a thie haw.

¹⁰ Bei Ahâza cha Asuria bei Tikalâpilesa a hmô awpa ta Dâmaskâ lâ sie ta, Dâmaskâ liata maisâh a ypa kei hmô ta. Bei Ahâza ta maisâh nothlahpa nata ama taonaziezy cha â kipa ta theihthaipa Uria lâ paphao ta.

¹¹ Theihthaipa Uria ta maisâh tao ta. Bei Ahâza ta Dâmaskâ tawhta a vaw paphaopa hawh tlai ta, theihthaipa Uria ta Dâmaskâ tawhta Bei Ahâza a vaw tlô hlâta maisâh cha tao ta.

¹² Dâmaskâ tawhta abei a vaw tlô nahta, abei ta maisâh cha moh ta. Abei ta maisâh lâ cha pangai ta, kiah ta,

¹³ maisâh chô liata raopa hlânazy rao ta, niepa hlânazy hlâ ta, dopa hlânazy patlai ta, aryhna hlâna thisaihzy thia ta.

¹⁴ Dawh maisâh Abeipa hmiakô liata a y tyhpa cha ohmia tawhta, ano maisâh nata Abeipa o likawh tawhta pasie ta, ano maisâh maw lâ liata soh ta.

¹⁵ Bei Ahâza ta theihthaipa Uria cha biepie ta, a hnohta, “Maisâh laipa chô liana heta my ta raopa hlânazy, zâla ta niepa hlânazy, abei raopa hlânazy, abei niepa hlânazy, râh chyhsa zydua raopa hlânazy, ama niepa hlânazy nata ama dopa hlânazy na hlâ tyh awpa a châ. Maisâh chô liata raopa hlâna thisaih zydua nata atheihna thisaih zydua na thia tyh aw. Dawh maisâh deikua cha, keima ta Khazohpa ei saohiah tyh nawpa châta a châ aw,” tah ta.

¹⁶ Theihthaipa Uria ta Bei Ahâza biepiepa hawhta, cha zydua cha tao ta.

¹⁷ Bei Ahâza ta biebuh patyuna tôhtlâhzy chhawh pachhô ta, patyunazy tawhta biebuh pasie ta, tipâh chhao a ry liata dawh viahchao tôhpazy tawhta la ta, alô paraihpa chô liata patyu ta.

¹⁸ Pahânoh châta chôkhu a hneipa lâpi Abeipa o chhôh liata ama taopa nata khôtho lâta abei angiana zy cha Asuria bei palysa nawpa ta Abeipa o tawhta pasie khai ta.

¹⁹ Ahâza hmotaopa hropazy cha, Zudâh beizy thâtih rona châbu liata ropa a châ.

²⁰ Ahâza cha a pathlatuhpazy hnohta a mô ta, a pathlatuhpazy hnohta Dâvi khihpi liata pabu ei ta, a sawchapawpa Hezekia ta ano su liata â bei.