2 ABEIZY 15 - Mara Bible RV (BSI)

Zudâh bei Azariah

¹ Izarei bei Zerôbaw kô kih nata kô kha â bei kô ta, Amazia sawchapawpa Zudâh bei Azariah a bei pathao ta.

² Â bei pathao nota ko hrawh hleicharupa châ ta, Zerusale liata kô sypangawh nata kô no â bei. A nô moh cha Zekôliah châ ta, Zerusale zuah a châ.

³ A paw Amazia hmotaopa hawhta tao hrapa ta, Abeipa mohmô liata hmo dopa tao ta.

⁴ Su sâhpazy deikua cha paraopa châ leipa ta, Izarei phopi ta su sâhpazy liata atheihnazy hlâ ei ta, ropahâhpazy ama rao thlâh ha chy.

⁵ Zehôvâh ta abei cha hrie ta, chatanachata a thi noh taihta phawh ha ta, o nano ta paysapa a châ. Abei sawchapawpa Zôthâ cha abei o liata hyutuhpa ta y ta, râh chyhsazy chô liata ryureina a siekheituhpa a châ.

⁶ Azariah hmotaopa hropa zydua cha, Zudâh beizy thâtih rona châbu liata ropa a châ.

⁷ Azariah cha a pathlatuhpazy hnohta a mô ta, a pathlatuhpazy hnohta Dâvi khihpi liata ama pabu. A sawchapawpa Zôthâ ta ano su liata â bei.

Izarei bei Zekaria

⁸ Zudâh bei Azariah kô sythôh nata kô charie â bei kô ta, Zerôbaw sawchapawpa Zekaria cha Izarei chô liata Samâri liata thla charu a bei ta.

⁹ A pathlatuhpazy taopa hawhta, Abeipa mohmô liata hmo pha lei ngaitapa tao ta. Izarei a pamoleisapa Nebâ sawchapawpa Zerôbaw moleinazy siesai vei.

¹⁰ Zabe sawchapawpa Sâluh ta arulâta ano cha tei ta, zawpi hmiakô liata chhawh ta, thie ha ta, ano su liata â bei haw.

¹¹ Zekaria hmotaopa thâtih hropazy cha, Izarei beizy thâtih rona châbu liata ropa a châ.

¹² Abeipa ta Zehu hnohta, “Izarei beidyuchhai liata na sawchapawzy chhâ palihna taih amâ tyuh aw,” tahpa ta bie a taih ta. A bietai hawhta a vaw tlôpa a châ.

Izarei bei Sâluh

¹³ Zudâh bei Uzia kô sythôh nata kô chaki â bei kô ta, Zabe sawchapawpa Sâluh cha abei pathao ta, Samâri liata thla kha chhôh â bei.

¹⁴ Kâdi sawchapawpa Menâhe cha Tizah tawhta Samâri lâ khy ta, Zabe sawchapawpa Sâluh cha Samâri liata chhawhsao ta, ano su liata â bei haw.

¹⁵ Sâluh hmotaopa thâtih hropazy nata teiparuna rai a hriana kyh zy cha, Izarei beizy thâtih rona châbu liata ropa a châ.

¹⁶ Menâhe ta Tiphasa khih nata a chhôh liata a ypa zydua nata Tizah a vaw pazipa râh zydua a dyuh ta. Ano châta amâ pahy leipa vâta parao khai ta, saw phaohpa chanô taihta ama py hriechheih ta a pahy khai ei.

Izarei bei Menahe

¹⁷ Zudâh bei Azariah kô sythôh nata kô chaki â bei kô ta, Kâdi sawcha­pawpa Menâhe cha Izarei chô liata a bei pathao ta, Samâri liata kô hrawh â bei.

¹⁸ Abeipa mohmô liata hmo pha lei ngaitapa tao ta. Izarei a pamoleisapa Nebâ sawcha­pawpa Zerôbaw moleinazy kha a hro chhôh zydua ta siesai vei.

¹⁹ Asuria bei Puli ta Izarei râh za siehnao ta. Menâhe ta â beina pa-i awpa nata bao awpa ta Puli cha tâkâ talent sâh kha pie ta.

²⁰ Menâhe ta Asuria bei pie awpa ta, Izarei hneirôhpa zydua tawhta tâkâ sekel sypangawh chyu khei ta. Chatanachata Asuria bei cha a lie ta, Izarei râh liata y parei khao vei.

²¹ Menâhe thâtih hropazy nata a hmotaopa zydua cha, Izarei beizy thâtih rona châbu liata ropa a châ.

²² Menâhe cha a pathlatuhpazy hnohta a mô ta, a sawchapawpa Pekahia ta ano su liata â bei.

Izarei bei Pekahia

²³ Zudâh bei Azariah kô sypangawh â bei kô ta, Menâhe sawchapawpa Pekahia cha Izarei chô liata ryureih awpa ta Samâri liata a bei pathao ta, kô no â bei.

²⁴ Abeipa mohmô liata hmo pha lei ngaitapa tao ta. Izarei a pamoleisapa Nebâ sawchapawpa Zerôbaw moleinazy kha siesai vei.

²⁵ A pheisaih hyutuhpa, Remâliah sawchapawpa Pekâ ta ano cha arulâta tei ta, Samâri liata abei o thokhy chhôh liata a thie haw. Pekâ hnohta Kilia chyhsa sypangawh y ei ta, Arakô nata Aria chhao ama thie ha hra. Pekâ ta Pekahia cha thie ta, ano su liata â bei haw.

²⁶ Pekahia thâtih hropazy nata a hmotaopa zydua cha, Izarei beizy thâtih rona châbu liata ropa a châ.

Izarei bei Pekâ

²⁷ Zudâh bei Azariah kô sypangawh nata kô no â bei kô ta, Remâliah saw­chapawpa Pekâ cha Izarei chô liata Samâri liata a bei pathao ta, kô kih â bei.

²⁸ Abeipa mohmô liata hmo pha lei ngaitapa tao ta. Izarei a pamoleisapa Nebâ sawchapawpa Zerôbaw moleinazy kha siesai vei.

²⁹ Izarei bei Pekâ â bei nota, Asuria bei Tikalâpilesa ta Izaw, Abelamâkâh, Zanô, Kedesâ nata Hâzaw khihpizy, Kilia nata Kâlili râhzy nata Nâthalai râh zydua la ta. Chyhsazy sei ta Asuria râh lâ a chhi ta.

³⁰ Elâ sawchapawpa Hôsia ta Remâliah sawchapawpa Pekâ cha arulâta tei ta, chhawhsao ta, ano su liata â bei haw. Hôsia cha Uzia sawchapawpa Zôthâ kô kih â bei kô ta a bei pathaopa a châ.

³¹ Pekâ thâtih hropazy nata a hmotaopa zydua cha, Izarei beizy thâtih rona châbu liata ropa a châ.

Zudâh bei Zôthâ

³² Remâliah sawcha­pawpa Izarei bei Pekâ kô no â bei kô ta, Uzia sawchapawpa Zudâh bei Zôthâ cha a bei pathao ta.

³³ A bei pathao nota kô kih nata kô pangawhpa châ ta, Zerusale liata kô hrawh hleicharu â bei. A nô moh cha Zerusâ châ ta, Zadô sawchanô a châ.

³⁴ A paw Uzia hmotaopa zydua tao hrapa ta, Abeipa mohmô ta hmo dopa tao ta.

³⁵ Su sâhpazy deikua cha paraopa châ leipa ta, Izarei phopi ta su sâhpazy liata atheihnazy hlâ ei ta, ropahâhpazy ama rao thlâh ha chy. Zôthâ ta Abeipa o chô lâta chhikao taopathi ta.

³⁶ Zôthâ hmotaopa hropa zydua cha, Zudâh beizy thâtih rona châbu liata ropa a châ.

³⁷ Cha daihtizy liata, Abeipa ta Aramia bei Rezi nata Remâliah sawcha­pawpa Pekâ cha Zudâh a dyuh awpa ta tuah pathao ta.

³⁸ Zôthâ cha a pathlatuhpazy hnohta a mô ta, a pathlatuhpazy hnohta a mapaw Dâvi khihpi liata pabu ei ta, a saw­chapawpa Ahâza ta ano su liata â bei.