2 ABEIZY 14 - Mara Bible RV (BSI)

Zudâh bei Amaziah

¹ Zehôahâ sawchapawpa Izarei bei Zôasâ kô no â bei kô ta, Zôasâ sawchapawpa Zudâh bei Amazia a bei pathao ta.

² Â bei pathao nota kô kih nata kô pangawhpa châ ta, Zerusale liata kô kih nata kô chaki â bei. A nô moh cha Zehôdadi, Zerusale zuah a châ.

³ Abeipa mohmô liata hmo dopa tao ta, a pathlatuhpa Dâvi deikua a tlu vei. A paw Zôasâ hmotaopa maih tao hra ta.

⁴ Su sâhpazy deikua cha paraopa châ leipa ta, Izarei phopi ta su sâhpazy liata atheihnazy hlâ ei ta, ropahâhpazy ama rao thlâh ha chy.

⁵ Abeina biehneina a ku liata â ipa ta a ypa nahta, a chakaotuhpazy hry liata a paw Zudâh bei a thietuhpazy thie khai ta.

⁶ Châhrasala Mawsi Ryhpa Châbu liata, “Sawzy vâta pawzy thie awpa châ leipa ta, pawzy vâta sawzy thie awpa châ hra vei. Chyhsa to âmo moleina vâ chyu ta thie awpa a châ,” tahpa ta Abeipa ta bie a piepa hawhta, lianycheituhpa sawzy deikua cha thie vei.

⁷ Alôh Saikao liata Edômâ mo thy kha thie ta. Selâ khih a dyuh ta, la ta, a moh ta Zôthelâ bi ta, cha cha tanoh taihta a moh a châ haw.

⁸ Amazia ta Zehu sawchapawpa Zehôahâ sawchapawpa Izarei bei Zehôasâ lâ lyuhchâpa tuah ta, a hnohta, “A vy la, hmiachhypa ta a moh tua ei si,” tah ta.

⁹ Izarei bei Zehôasâ ta Zudâh bei Amazia lâ chyhsa tuah ta, a hnohta, “Lebanaw ahloh buh ta Lebanaw sidy tho hnohta, ‘Na sawchanô kha ei saw­chapaw hnohta a lapinô awpa ta pie teh,’ tah ta. Lebanaw râhsa a vy ta, ahloh buh cha a tly pabai haw.

¹⁰ Edômâ cha pahnie ha tlai chi ta, chavâta na palôh a lai kaw bâ he. Na rônahna liata na palôh tlâh sala, o liata tlao y molo mah y. Khazia tymâna taopa ta, nâma paona liata Zudâh chhao na paokhei aw?” tah ta.

¹¹ Châhrasala Amazia ta nathlie khoh leipa ta. Chavâta Izarei bei Zehôasâ cha khy ta, Zudâh râh Beseme khih liata Zudâh bei Amazia nata hmiachhypa ta a dyuh ei ta.

¹² Zudâh cha Izarei ta pahnie ha ta, chyhsa to ama o chyu lâta a râ ha ei ta.

¹³ Izarei bei Zehôasâ ta Ahazia sawchapawpa Zehôasâ sawchapawpa Zudâh bei Amazia cha Beseme liata patu ta. Zerusale lâ vawh ta, Zerusale thokhy cha Epharai Chhikao tawhta Aki Chhikao taihta dy za palih pacho ta.

¹⁴ Abeipa o nata abei o liata a ypa ngôh nata tâkâ zydua nata hmobaoh zydua la ta, seizy chhao a chhi ta, Samâri lâ a lie ha ta.

¹⁵ Zehôasâ hmotaopa thâtih hropazy, a thatlôna nata Zudâh bei Amazia â dyuhna thâtihzy cha Izarei beizy thâtih rona châbu liata ropa a châ.

¹⁶ Zehôasâ cha a pathlatuhpazy hnohta a mô ta, Izarei beizy hnohta Samâri liata pabu ei ta, a sawchapawpa Zerôbaw ta ano su liata â bei.

¹⁷ Zôasâ sawchapawpa Zudâh bei Amazia cha, Zehôahâ sawchapawpa Izarei bei Zehôasâ a thi tawhta kô hrawh hleipangawh hroh ta.

¹⁸ Amazia hmotaopa hropazy cha Zudâh beizy thâtih rona châbu liata ropa a châ.

¹⁹ Chyhsa thokha ta ano cha Zerusale liata arulâta tei ei ta, chavâta Lakhi lâ a râ ta. Châhrasala Lakhi lâ cha chadaisa ei ta, cha liata ama thie haw.

²⁰ A ri cha arâ ta vaw phaoh ei ta, a pathlatuhpazy hnohta Dâvi khihpi Zerusale liata ama pabu.

²¹ Zudâh chyhsa zydua ta kô hrawh hleicharupa Azariah cha a chhi ei ta, a paw Amazia su liata abei ta ama tao.

²² A pathlatuhpazy hnohta abei â mô tawhta, Azariah ta Elathâ khihpi paduapathi ta, Zudâh râh liata a pahlao heih.

Izarei bei Zerôbaw II

²³ Zôasâ sawchapawpa Zudâh bei Amazia kô hrawh hleipangawh â bei kô ta, Zôasâ sawchapawpa Izarei bei Zerôbaw cha Samâri liata a bei pathao ta, kô sypalih nata kô kha â bei.

²⁴ Abeipa mohmô liata hmo pha lei ngaitapa tao ta. Izarei a pamoleisapa Nebâ sawchapawpa Zerôbaw moleina zydua siesai tlâ vei.

²⁵ Abeipa, Izarei Khazohpa ta a chakaotuhpa Kahepha khihpa Amitai sawchapawpa hrohsopa Zawna hmâpa ta bie a vaw reipa hawhta, Lebôhamâ tawhta Arabâ Tilaipi taihta Izarei râhri a pakawh heih.

²⁶ Abeipa ta Izarei rietheitaona pasazie hmô ta, sei chhao, khotalaipa chhao, riethei a tao leipa rai y leipa ei ta, Izarei a bao awpa ahy hmah y veih ei.

²⁷ Châhrasala Abeipa ta Izarei moh cha avâ ry tawhta a pahleipadia ha awpa kyh vaw reih beih vei. Chavâta Zôasâ sawchapawpa Zerôbaw hmâpa ta a pachha heihpa ei a châ.

²⁸ Zerôbaw thâtih hropazy, a hmotaopa zydua, a thatlôna nata chariah â dyuhna thâtihzy, Zudâh râh a châ tyhpa Dâmaskâ nata Hâmathi khihpizy Izarei châta a lapa kyhzy cha, Izarei beizy thâtih rona châ bu liata ropa a châ.

²⁹ Zerôbaw cha a pathlatuhpa Izarei beizy hnohta a mô ta, a sawcha­pawpa Zekaria ta ano su liata â bei.