2 ABEIZY 13 - Mara Bible RV (BSI)

Izarei bei Zehôahâ

¹ Ahazia sawchapawpa Zudâh bei Zôasâ kô kih nata kô thôh â bei kô ta, Zehu sawchapawpa Zehôahâ cha Izarei chô liata Samâri liata a bei pathao ta, kô hrawh hleisari â bei.

² Abeipa mohmô liata hmo pha lei ngaitapa tao ta, Izarei a pamoleisapa Nebâ sawcha­pawpa Zerôbaw moleinazy kha tao lymâ hra ta, siesai vei.

³ Chavâta Abeipa cha Izarei chô liata a pathi ia ta, âmo cha Aramia bei Hâze ku liata nata Hâze sawchapawpa Benhadâ ku liata ama hro chhôh zydua ta a pie ha ei.

⁴ Chatawhcha Zehôahâ ta Abeipa khokheina tlua ta, Aramia bei ta Izarei a tlybaipa a hmôpa vâta, Abeipa ta a bie cha nathlie ta.

⁵ Chatanachata Abeipa ta Izarei cha pachhatuhpa pie ta, Aramia mo ku tawhta pua ei ta, Izarei sawzy cha ama y tyhpa hawhta ama o chyu liata y heih ei ta.

⁶ Anodeikua Izarei a pamoleisapa Zerôbaw chhôhkha moleinazy kha siesai leipa ei ta, tlao tao lymâ ei ta, Aseri tôh chhao Samâri liata y thlâh ha chy ta.

⁷ Zehôahâ cha arâ pheisaih sypangawh, talailih miahrawh nata alei pheisaih thy kha dei hnei bâ ta. Aramia bei ta pahleipadia khai ha ta, sawhri buchadoh hawhta a tao khai hapa vâta a châ.

⁸ Zehôahâ thâtih hropazy, a hmotaopa zydua nata a thatlôna zy cha Izarei beizy thâtih rona châbu liata ropa a châ.

⁹ Zehôahâ cha a pathlatuhpazy hnohta a mô ta, Samâri liata pabu ei ta, a sawchapawpa Zôasâ ta ano su liata â bei.

Izarei bei Zehôasâ

¹⁰ Zudâh bei Zôasâ kô sythôh nata kô sari â bei kô ta, Zehôahâ sawchapawpa Zehôasâ cha Izarei chô liata Samâri liata abei pathao ta, kô hrawh hleicharu â bei.

¹¹ Ano chhao cha Abeipa mohmô liata hmo pha lei ngaitapa tao ta, Izarei a pamoleisapa Nebâ sawchapawpa Zerôbaw moleina zydua siesai leipa ta, tao lymâ ta.

¹² Zôasâ thâtih hropazy, a hmotaopa zydua nata thatlô ngaitapa ta Zudâh bei Amazia â dyuhzie zy cha Izarei beizy thâtih rona châbu liata ropa a châ.

¹³ Zôasâ cha a pathlatuhpazy hnohta a mô ta, Zerôbaw ta a beidyuchhai liata a tyuh ta, Zôasâ cha Izarei beizy hnohta Samâri liata pabupa a châ.

Elaisâh thina

¹⁴ Elaisâh cha thikhei awpa pasana hri ta pasa ta. Izarei bei Zôasâ cha ano lâ zu ta, chakhei ta, “Ei pâ, Hy ei pâ! Izarei talailihzy nata ama arâ pheisaihzy ta a ypa y!” tah ta.

¹⁵ Elaisâh ta a hnohta, “Libaw nata châtaizy a chaba teh,” tah ta. Libaw nata châtaizy a chaba ta.

¹⁶ Elaisâh ta Izarei bei hnohta, “Libaw kha a kei teh,” tah ta, a kei ta. Elaisâh ta abei ku chô liata a ku pahnieh ta.

¹⁷ Elaisâh ta, “Nochhi la opy kei pahy teh,” tah ta, pahy ta. Elaisâh ta, “Ka teh,” tah ta, ka ta. Elaisâh ta, “Kha kha pahniena Abeipa châtai, Aramia mo pahniena châtai a châ khawh! Aphe liata Aramia mo a dyuh aw chi ta, ama chhâ khaina taihta na thie aw ei,” tah ta.

¹⁸ “Châtaizy kha la teh,” tah heih ta, la ta. Izarei bei hnohta, “Alei kha a chô teh,” tah ta, ei thôh a chô ta, a chalih ha ta.

¹⁹ Khazohpa chyhsa cha a chô liata a pathi ia ta, a hnohta, “Ei pangawh ei charu chhâ nâ chô awpa mâh a châ tâh. Cha hawhta na tao khiahta cha, Aramia mo cha ama chhâna taihta na thie ha awpa ei châ ta, tahmâ deikua cha Aramia mo cha ei thôh deita na pahnie aw,” tah ta.

²⁰ Chatawhcha Elaisâh cha thi ta, pabu ei ta. Châhvâ daihti liata Môabâ mo ta Izarei râh kaw siehnao tyh ei ta.

²¹ Chyhsa pakha ama pabu hai nota, hraotuhpa py kha kei hmô ei ta, chyhsapa ri cha Elaisâh thlâ liata za thy ei ta, a ri ta Elaisâh ruzy a za hriapa nahta, vaw hroh heih ta, a phei ta a kaw duah ta.

²² Aramia bei Hâze ta Zehôahâ hro chhôh zydua cha Izarei tlybai ta.

²³ Châhrasala Abeipa ta Abarahâ, Aisika nata Zakaw zy chô liata a biehrai vâta, Izarei sawzy cha ngiachhie ta, a thapasa kaw tyh ta. Chavâta âmo lâ a heih heih tyh ta, Izarei sawzy cha pahleipadia khoh leipa ta, tahmâ taihta a mohmô tawhta âmo cha thy pathlah khoh vei.

²⁴ Aramia bei Hâze a thi tawhta, a sawchapawpa Benhadâ cha ano su liata a bei ta.

²⁵ Hâze sawchapawpa Benhadâ ta Zehôasâ paw Zehôahâ siehnao ta khihpi a la hapazy cha, Zehôasâ ta chhu heih ta. Zôasâ ta Benhadâ cha ei thôh pahnie ta, Izarei khihpizy a la pakhua khai haw.