2 ABEIZY 12 - Mara Bible RV (BSI)

Zudâh bei Zehôasâ

¹ Zehu abeina kô sarina liata, Zehôasâ a bei pathao ta, Zerusale liata kô sypalih â bei. A nô moh cha Besebâ zuah Zibia a châ.

² Zehôasâ cha theihthaipa Zehôdâ ta a pachu chhôh zydua cha, a hro chhôh zydua ta Abeipa mohmô ta hmo dopa tao ta.

³ Su sâhpazy deikua cha paraopa châ leipa ta, Izarei phopi ta su sâhpazy liata atheihnazy hlâ ei ta, ropahâhpazy ama rao thlâh ha chy.

Zehôasâ ta Achhyna o a taopathi

⁴ Zehôasâ ta theihthaipazy hnohta “Abeipa o liata a ngiakheipa hmo pathaihpa chatlaina sôh zydua, chyhsa to thyupa sôh a ngiapa zydua nata chyhsa ta lôhthai ta Abeipa o lâ a vaw cheipa sôh zydua cha,

⁵ theihthaipazy ta ama hnohta a vaw piepa chyu tawhta la ei sala, Achhyna o raona ama hmôpa maih taopathi mawh ei sy,” tah ta.

⁶ Châhrasala Bei Zehôasâ kô kih nata kô thôh â beina taih chhao ta, theihthaipazy ta Achhyna o cha taopathi leipa ei ta.

⁷ Chavâta Bei Zehôasâ ta theih­thaipa Zehôdâ nata theihthai hropazy aw ta, ama hnohta, “Khazia Achhyna o nama taopathi to vei? Chavâta tahmâ tawhta cha nâmo hnohta châ pietuhpazy tawhta sôh la khao leipa u la, Achhyna o raopa tao nawpa sôh liata tlao pahmaoh muh vy,” tah ta.

⁸ Chavâta theihthaipazy ta chyhsazy tawhta tâkâ dao khao lei awpa nata Achhyna o raopazy chhao âmo ta taopathi lei awpa cha paryhsa ei ta.

⁹ Theihthaipa Zehôdâ ta thobyh miakha la ta, a phiehru liata a khaoh vieh ta, Abeipa o lâ angiana chachâh lâ maisâh thaby liata patyu ta. Ochhi vaituhpa theihthaipazy ta Abeipa o liata tâkâ a vaw pangiapa zydua, cha liata khô lymâ ei ta.

¹⁰ Thobyh liata tâkâ a hluh kaw bâ tahpa ama pahno nahta, abei chârohtuhpa nata theihthai beichaipa khy ei ta, sykhao ta chaty ei ta, Abeipa o liata tâkâ a ypa zie cha reih tyh ei ta.

¹¹ Ama tâkâ reipa cha Abeipa o rai hriatuhpazy mohôhtuhpazy ku liata hlâ ei ta, âmo ta Abeipa o a sapa zôthaipazy nata o satuhpazy hlao châta ama hmâh tyh.

¹² Abeipa o raopa taopathi nawpa ta alô khietuhpa nata alô khaituhpazy hlao châta chhao hmâh ei ta, tho chalei nawpa nata alô chaona châta nata Abeipa o taopathi nawpa ta byuhpa maih châta ama hmâh lymâ.

¹³ Abeipa o chhôh lâ ama vaw cheipa tâkâ cha, Abeipa o liata tâkâ biebuhzy, meiôh lao chakienazy, rahôzy, chiahmiezy, ngôh hmobaohzy nata tâkâ hmobaohzy taona châta deikua hmâh veih ei.

¹⁴ Abeipa o taopathina rai hriatuhpazy raihria nawpa châta piepa a châ.

¹⁵ Hriatuhpazy hlao pie awpa ta tâkâ ama pavaosapazy ku liata tâkâ ypa chhao, â do ngaitapa ta ama tao lymâpa vâta, mohpasia hlei veih ei.

¹⁶ Thaileichâna hlâna tâkâzy nata moleina hlâna tâkâzy deikua cha, theihthaipazy tovyuh a châpa vâta, Abeipa o lâ vaw cheih veih ei.

¹⁷ Cha daihti liata Aramia bei Hâze cha khy ta, Kâthâ khih a dyuh ta, la ta. Hâze cha Zerusale lâ khy lymâ a chhuah ta.

¹⁸ Zudâh bei Zehôasâ ta a pathlatuhpa Zudâh bei Zehôsaphâ, Zehôrâ nata Ahazia zy ta ama vaw hlâ hapa hmo ziehpa zydua nata ano daihti liata hmo ziehpa a pachôpazy nata Abeipa o liata nata abei o liata ryubyhzy liata ngôh a ypa zydua la ta, Aramia bei Hâze hnohta paphao ta. Chatanachata Hâze ta Zerusale cha kuasai ha ta.

Zôasâ thina

¹⁹ Zôasâ thâtih hropazy nata a hmotaopa zydua cha Zudâh beizy thâtih rona châbu liata ropa a châ.

²⁰ Bei Zôasâ chakaotuhpazy ta thyu ei ta, abei cha arulâta tei ei ta, Silâ lâ zuna lâpi liata thokhy ta dôhpa o liata thie ha ei ta.

²¹ A chakaotuhpa Simiathi sawchapawpa Zôzakâ nata Sôme sawchapawpa Zehôzabâ ta ama thie haw. A pathlatuhpazy hnohta Dâvi khihpi liata pabu ei ta, a sawchapawpa Amazia ta ano su liata â bei.