2 ABEIZY 11 - Mara Bible RV (BSI)

Zudâh beinô Athaliah

¹ Ahazia nô Athaliah ta a sawchapawpa a thi haw tahpa a pahno nahta, thyu ta abei chipathla zydua pamua khai ta.

² Ahazia sawchapawpa Zôasâ deikua cha, Bei Zôrâ sawchanô Zehôsebâ, Ahazia sietanô ta abei sawchapaw ama thie awpazy hry tawhta lapapua ta, ano nata a mokhâhtuhpa cha aziana chhôhpadâhpa liata nyu ta. Athaliah ta a hmô thei lei nawpa ta nyu ha ta, chavâta Zôasâ cha thiepa châ vei.

³ Râh chô liata Athaliah kô charu â bei chhôh zydua a hnohta y ta, Zehôsebâ ta Zôasâ cha Abeipa o chhôh liata nyu ta.

Zudâh bei Zôasâ

⁴ A kô sarina liata, Zehôdâ ta Kari mo pheisaih za kha hyutuhpazy nata vaituhpazy paawsa ta, Abeipa o liata ano lâ a vy ei ta. Ama hnohta bie hraih ta, Abeipa o liata bie a pataihsa khai tawh ei ta abei sawchapawpa cha âmo pahmô ta.

⁵ Zehôdâ ta âmo cha biepie ta, “Nama tao awpa cha he he a châ: Pahânoh ta riah a vaihpa py thôhpazy hry liata, su thôh su kha ta abei o vaih aw ei chi ta,

⁶ su thôh su kha hropa ta Surâ Chhikao vaih aw ei chi ta, su thôh su kha hropa ta vaituhpazy hnôh lâta thokhy chhikao ama vaih aw. Cha hawhna chata Achhyna o cha paraopa a châ lei nawpa ta nama vaih awpa a châ.

⁷ Pahânoh ta a pahâ tyhpa py nopazy ta abei yna Abeipa o vaih aw ei chi ta, abei vaina rai chhao nama hria pâ aw.

⁸ Chyhsa to nama chaihrai a chabapa ta abei cha nama chadô aw. Ahy rai pheisaihzy yna châ vaw hniapa maih nama thie lymâ aw. Abei a puana nata â ngiana maihta a hnohta nama y lymâ aw,” tah ta.

⁹ Pheisaih za kha hyutuhpazy ta theihthaipa Zehôdâ biepiepa zydua hawhta tao ei ta. Hyutuhpazy ta Pahânoh ta a pahâ awpa nata Pahânoh ta a hria awpa vaituhpazy a vaw chhi chyupa ta, theihthaipa Zehôdâ lâ a vy ei ta.

¹⁰ Theihthaipa ta pheisaih za kha hyutuhpazy cha Abeipa o liata a ypa Bei Dâvi aseizy nata vyhphaozy pie ta.

¹¹ Vaituhpa pheisaihzy cha chaihrai a chaba khaipa ta abei cha chadô ei ta. Achhyna o chho lâ tawhta maw lâ taihta, maisâh nata Achhyna o chadôpa ta vaih ei ta.

¹² Zehôdâ ta abei sawchapawpa cha vaw puakhei ta, beilakho pakho ta, biehraina ryuchâ pie ta. Chatawhcha bei ta phuahpa ta, sathaw thu ei ta, ama ku chabaih ei ta, “Abei cha hroh pareih mawh sy,” tah ei ta.

¹³ Vaituhpa pheisaihzy nata zawpi pyu cha Athaliah ta a thei nahta, Abeipa o liata zawpi lâ cha vawh ta.

¹⁴ Mohmia pasaih ta, abei cha taozietyhpa hawhta, otôh kiapâh liata a duah ta, pheisaih hyutuhpazy nata chiahmie tôtuhpazy cha abei kiapâh liata a duah ei ta, râh chyhsa zydua ta thapha ngaitapa ta y ei ta, chiahmiezy thata ama tôpa hmô ta. Athaliah cha a chysiazy hrie ta, “Râh apaphasaina, Râh apaphasaina!” tahpa ta awh ta.

¹⁵ Theihthaipa Zehôdâ ta pheisaih hyutuhpazy biepie ta, “Pheisaihzy ta chadô ei sala, vaw puakhei u la, ahy rai ano a pazipa maih cha zaozi ta thie teh u,” tah ta. Theihthaipa ta, “Abeipa o liata thie awpa châ vei,” tah ta.

¹⁶ Chatanachata patu ei ta, arâ chhikao lâ tawhta abei o lâ a chhi ei ta, cha liata ama thie haw.

¹⁷ Zehôdâ ta Izarei sawzy cha Abeipa phopi châ awpa ta, Abeipa nata abei likah liata zy, Abeipa nata zawpi likah liata zy, abei nata zawpi likah liata zy biehrai tao ta.

¹⁸ Chatawhcha râh chyhsa zydua cha Bâlâ achhyna o lâ vawh ei ta, achhyna o cha parao ei ta, Bâlâ maisâhzy nata a nothlahpazy pakeichheih ei ta. Bâlâ theihthaipa Mâtâ cha maisâhzy thaby liata thie ei ta. Abeipa o vaih awpa ta, theihthaipa ta vaituhpazy soh ta.

¹⁹ Theihthaipa ta pheisaih za kha hyutuhpazy, Kari mozy, vaituhpazy nata râh chyhsa zydua a chhi ta, abei cha Abeipa o tawhta a zâ chhi ei ta, vaituhpazy chhikao lâ tawhta abei o lâ pangai ei ta. Chatanachata Zôasâ cha abeizy beidyuchhai liata a tyuh ta.

²⁰ Chatanachata a râh chyhsa zydua cha a ly ngaita ei ta, Athaliah cha zaozi ta abei o liata thiepa a châ tawhta, khihpi cha sidia ha ta.

²¹ Zehôasâ cha â bei pathao nota kô saripa a châ.