2 ABEIZY 10 - Mara Bible RV (BSI)

Zehu ta Ahabâ pathlazy a thie

¹ Ahabâ ta Samâri liata sawchapaw sysari hnei ta. Zehu ta Samâri lâ châ paphao ta, khihpi ryureituhpazy, machâzy nata Ahabâ pathla mohôhtuhpazy hnohta,

² “Nama zibeipa pathlazy nama hnohta y ei ta, arâzy nata talailihzy nama hnohta y hra ei ta, thokhy hneipa khihpizy nata chariah chhaichhizy chhao nama hnei. Chavâta he châ he nama hmôpa nahta,

³ nama zibeipa pathlazy hry liata a pha chaipa nata a sia chaipa a tlyh u la, a paw beidyuchhai liata patyu u la, nama zibeipa chhôh­kha châta a dyuh muh vy,” tah ta.

⁴ Châhrasala chi ngaita ei ta, “Pachâ teh u, abei pano chhao ta ama pahnie thei leipa châ ta, keimo heta kheihta ma eima pahnie thei aw?” tah ei ta.

⁵ Abei o avaotuhpa nata khihpi avaotuhpa ta, machâzy nata hawti mohôhtuhpazy chhaota a paraohpa ta, Zehu lâ chyhsa tuah ei ta, a hnohta, “Châ chakaotuhpazy eima châ. Tao awpa miah na tahpa maih eima tao aw. Ahy hmah abei ta tao aw ma pi. Pha na tahpa hawhta tao mah y,” tah ei ta.

⁶ Châ mianona âmo lâ paphao heih ta, ama hnohta, “Ei chhâh a châpa ta, ei ao nama nathlie awpa khiahta cha, nama zibeipa pathlazy luh tai u la, mylâ tahmâ ti heta Zezari liata keima lâ vaw tlôkhei muh vy,” tah ta. Abei pathlazy cha sysari châ ei ta, âmo a deichhytuhpa khihpi pawhrâhpazy hnohta y ei ta.

⁷ Châ a tlôpa nahta, abei pathla sysarizy cha patu ei ta, thie ei ta, ama luh cha hrâbyhzy liata khô ei ta, Zezari liata Zehu lâ paphao ei ta.

⁸ Lyuhchâpa vaw tlô ta Zehu hnohta, “Abei pathlazy luh ama vaw tlôkhei,” tahpa ta chho ta. Zehu ta, “Thokhy chhikao liata su no ta pacho u la, mylâ my taih y mawh sy,” tah ta.

⁹ A mylâ my ta Zehu cha kei pua ta, zawpi zydua hmia liata a duah ta, ama hnohta, “Nâmo la paraona hnei veih ei chi. Kei ta ei zibeipa tei na ta, ei thiepa a châ. He sahlao zydua deikua he ahy ma a thie tly?

¹⁰ Abeipa ta Ahabâ chhôhkhazy kyh a reipa Abeipa bie cha leilô liata lei cheita aw vei tahpa pahno teh u. Abeipa ta a chakaotuhpa Elaizâh hmâpa ta a reipa kha a vaw patlô ha hih,” tah ta.

¹¹ Zehu ta Zezari liata Ahabâ chhôhkha laibâhpa zydua, pawhrâhpa zydua, a viasa phapa zydua nata a theihthaipa zydua cha pakha hmah pahlôh leipa ta a thie khai ei.

¹² Chatawhcha thyu ta, pua ta, Samâri lâ sie ta. Lâpi liata mietaku vaituhpazy mietaku hmi ngyuna o a kei tlô nahta,

¹³ Zehu ta Zudâh bei Ahazia unawhzy a tyh ta, ama hnohta, “Ahyzy nama châ?” tah ta. Âmo ta, “Ahazia unawhzy eima châ. Abei sawzy nata abeinô sawzy a naoh awpa ta eimâ zu,” tah ei ta.

¹⁴ Zehu ta, “Ahrohpa ta patu teh u,” tah ta. Ahrohpa ta patu ei ta, mietaku hmi ngyuna o khaohtlô liata thie ei ta. Chyhsa sypalih nata pano châ ei ta, pakha hmah pahlôh vei.

¹⁵ Cha su tawhta a pua nahta, ano dy awpa ta a vypa Rekhâ sawchapawpa Zehônadâ a tyh ta. Zehu ta ano cha a naoh ta, a hnohta, “Na chô liata palôh dopa ei phaopa hawhna heta, ei chô liata palôh dopa na phaoh hra ma?” tah ta. Zehônadâ ta, “Ei phaoh,” tah ta. Zehu ta, “Cha khiahta la, na ku na vaw hlâ teh,” tah ta. Zehônadâ ta a ku kei hlâ ta. Zehu ta Zehônadâ cha a hnohta talailih liata pakiasa ta.

¹⁶ Zehu ta, “Ei hnohta vaw sie la, Abeipa châta phahnai ei ngiahzie vaw hmô tua mah y,” tah ta. Chatanachata a talailih liata pakiasa ta.

¹⁷ Samâri a kei tlô nahta, Abeipa ta Elaizâh hnohta a reipa bie hawhta, Ahabâ chhôhkha Samâri liata laibâhpa a ypa zydua thie lymâ ta, a pamua khai ha ei.

Zehu ta Bâlâ achhyna a pahlei

¹⁸ Zehu ta zawpi zydua awpakhy ta, ama hnohta, “Ahabâ khata Bâlâ he a chyhta dei vaw chakao ta, Zehu deikua ta cha thata a chakao aw.

¹⁹ Chavâta tahmâ Bâlâ hrohsopa, Bâlâ achhytuhpa zydua nata Bâlâ theihthaipa zydua keima lâ awpakhy teh u. Ahy hmah a ki leipa ta y khah ei sy. Atheihna rônah ngaitapa Bâlâ lâ hlâ awpa ei hnei. Ahy rai a ki leipa maih cha hroh aw vei,” tah ta. Cha hmo cha Zehu ta Bâlâ achhytuhpazy a thie thei nawpa ta dôveipa ta a taopa a châ.

²⁰ Zehu ta, “Bâlâ moh ta pakhypi pathaihpa tao teh u,” tah ta. Cha cha pathâhsa ei ta.

²¹ Zehu ta Izarei zydua lâ chyhsa tuah ta, Bâlâ achhytuhpa zydua a vy ei ta. A vy leipa pakha hmah y veih ei. Bâlâ achhyna o liata a ngia ei ta, Bâlâ achhyna o cha a chaki chakô taihta ama bie haw.

²² Atobina chysia mokhâhtuhpa hnohta, “Bâlâ achhytuhpa zydua châta atobina chysia vaw cheipa teh,” tah ta. Amâ tobi nawpa chysiazy cha vaw cheih ta.

²³ Zehu cha Rekhâ sawcha­pawpa Zehônadâ chhaota Bâlâ achhyna o chhôh lâ a ngia ta, Bâlâ achhytuhpazy hnohta, “He liata nama hry liana heta Bâlâ achhytuhpazy deita ama y awpa châ ta, Abeipa chakaotuhpazy ama y pathlei ma, tahpa tlua u la, moh teh u,” tah ta.

²⁴ Chatawhcha atheihnazy nata raopa hlânazy hlâ awpa ta a ngia ei ta. Zehu ta khôtho liata chyhsa sycharie paduasa ta, “He chyhsazy he nama ku liata cha pie ei na ta, ahy rai a parâsapa cha, a râ hapa vyuhpa ta, a parâsatuhpa ta ano hrona a pahlei aw,” tah ta.

²⁵ Raopa hlâna a hlâ khaipata nahta, Zehu ta vaituhpa nata pheisaih hyutuhpazy hnohta, “A kei ngia u la, thie teh u. Ahy hmah papua khuh vy,” tah ta. Zaozi ta chhawh ei ta, vaituhpa nata pheisaih hyutuhpazy ta âmo cha khôtho lâ kaw thy ei ta. Bâlâ achhyna o chhôhpadâhpa chhôh chaipa lâ a ngia ei ta,

²⁶ Bâlâ achhyna o liata khazoh nothlahpazy puakhei ei ta, mei ta rao ei ta.

²⁷ Bâlâ nothlahpazy parao ei ta, Bâlâ achhyna o chhao parao ei ta, tanoh taihta ie o ta hmâpa a châ.

Izarei bei Zehu

²⁸ Cha hawhna chata Zehu ta Bâlâ cha Izarei tawhta a pamua haw.

²⁹ Châhrasala Zehu ta Izarei a pamoleisapa Nebâ sawchapawpa Zerôbaw moleinazy pathleih leipa ta, Bethel nata Dânâ liata ngôh viahchaotaw nothlahpazy a chhy thlâh ha chy ta.

³⁰ Abeipa ta Zehu hnohta, “Ei modypa hmo na taopa vâta nata ei palôh liata a ypa zydua hawhta Ahabâ chhôhkha chô liata na taopa vâta, na pathlazy cha chhâ palihna taihta Izarei beidyuchhai liata amâ tyuh aw,” tah ta.

³¹ Châhrasala Zehu cha Abeipa, Izarei Khazohpa ryhpa a pathipalôh tlokhuh ta zyh leipa ta, Izarei a pamoleisapa Zerôbaw moleinazy pathleih leipa ta.

³² Cha nohzy liata Abeipa ta Izarei râh cha pachyh pathao ta. Hâze ta Izarei râh zydua liata Izarei sawzy pahnie lymâ ta.

³³ Zawdâh tawhta nochhi lâ Kilia râ zydua, Kâdâ mo, Rubena mo nata Manase mozy pahnie ta. Anaw saikao liata Arôerâ tawhta Kilia nata Bâsanâ taihta a pahnie lymâ ei.

³⁴ Zehu thâtih hropazy nata a hmotaopa zydua nata a thatlôna zydua cha, Izarei beizy thâtih rona châbu liata ropa a châ.

³⁵ Zehu cha a pathlatuhpazy hnohta a mô ta, Samâri liata pabu ei ta, a sawchapawpa Zehôahâ ta ano su liata â bei.

³⁶ Samâri liata Izarei chô liata Zehu abeina kô zydua cha kô kih nata kô charie a châ.