2 ABEIZY 1 - Mara Bible RV (BSI)

Ahazia chô liata Khazohpa pachiana

¹ Ahabâ a thi tawhta Môabâ ta Izarei a dyuh ta.

² Ahazia cha Samâri liata a o chô chhôhpadâhpa diahpai opy tawhta tla ta, pasa ha ta. Chavâta lyuhchâpazy tuah ta, ama hnohta, “Sie u la, ei pasapa he ei tlâh thei aw ma tahpa Ekaraw khih khazoh Bâlâzebu kei hiahri teh u,” tah ta.

³ Châhrasala Abeipa vâlyuhchâpa ta Tisabi chyhsa Elaizâh hnohta, “Thyu la, Samâri bei lyuhchâpazy a kaw tyh la, ama hnohta, ‘Izarei liata Khazohpa a y khao leipa vâta ma, Ekaraw khih khazoh Bâlâzebu a saohiah awpa ta ma nama sie?

⁴ Chavâta Abeipa ta hetana heta a tah, rakhô na kiapa tawhta chô khao aw va chi, na thi tlai aw,’ tah mah y,” tah ta. Chatanachata Elaizâh cha sie ta.

⁵ Lyuhchâpazy cha abei lâ a lie ei ta, abei ta ama hnohta, “Khazia namâ vaw lie haw?” tah ta.

⁶ Âmo ta a hnohta, “Chyhsa pakha miah a vaw tyh ta, eima hnohta, ‘Sie u la, châ vaw tuahtuhpa abei lâ cha kua u la, a hnohta, Abeipa ta hetana heta a tah, Izarei râh liata Khazohpa a y khao leipa vâta ma Ekaraw khih khazoh Bâlâzebu cha a saohiah awpa ta na tuah ei? Rakhô na kiapa tawhta chô khao aw va chi, na thi thlyu aw,’ kei tah muh vy tahpa ta miah a chho,” tah ei ta.

⁷ Abei ta ama hnohta, “Nâmo châ vaw tyhpa nata cha biezy châ chhotuhpa cha kheihawhpa chyhsa ma a châ?” tah ta.

⁸ Âmo ta a chhy ei ta, “Sahmi chysia a tobi ta, a chai liata savo chaisaihna â saih,” tah ei ta. Abei ta, “Tisabi chyhsa Elaizâh a châ chuh,” tah ta.

⁹ Abei ta pheisaih sypangawh hyutuhpa cha a pheisaih sypangawh chhaota Elaizâh lâ tuah ta. Tlâh laki liata a tyuhpa Elaizâh lâ khy ta, a hnohta, “Nâ, Khazohpa chyhsa y, abei ta, ‘A zu mawh sy,’ a cha tah,” tah ta.

¹⁰ Elaizâh ta pheisaih sypangawh hyutuhpa hnohta, “Khazohpa chyhsa ei châ tlai khiahta cha, avâ tawhta mei za tla sala, nâ nata na pheisaih sypangawh kha cha kâ patlô khai mawh ei sy,” tah ta. Avâ tawhta mei za tla ta, ano nata a pheisaih sypangawh cha kâ patlô khai ha ta.

¹¹ Abei ta pheisaih sypangawh hyu­tuh hropa pakha a pheisaih sypangawh chhaota tuah heih ta. Ano ta Elaizâh hnohta, “Nâ, Khazohpa chyhsa y, abei ta, ‘A chatliepa ta a zu mawh sy,’ a cha tah,” tah ta.

¹² Elaizâh ta a chhy ta ama hnohta, “Khazohpa chyhsa ei châ tlai khiahta cha, avâ tawhta mei za tla sala, nâ nata na pheisaih sypangawh kha cha kâ patlô khai mawh ei sy,” tah ta. Avâ tawhta Khazohpa mei za tla ta, ano nata a pheisaih sypangawh zy cha kâ patlô khai ha ta.

¹³ Abei ta pheisaih sypangawh hyutuhpa pathôhna a pheisaih sypangawh chhaota tuah heih ta. Pheisaih sypangawh hyutuhpa pathôhna cha khy ta, Elaizâh hmiakô liata a pakhu paneih ta, a hnohta, “Hy Khazohpa chyhsa y, keima hrona nata châ chakaotuhpa chyhsa sypangawh hrona he, na mohmô liata hmo sôhpa châ mawh sy.

¹⁴ Pachâ teh, avâ tawhta mei za tla ta, pheisaih sypangawh hyutuhpa panozy kha, ama pheisaih sypangawh chhaota mei ta a kâ patlô khai ha ei. Ngiachhiepa ta ei hrona he na mohmô liata hmo sôhpa châ mawh sy,” tahpa ta a haw ta.

¹⁵ Abeipa vâlyuhchâpa ta Elaizâh hnohta, “A hnohta zu teh, abei cha chi khah y,” tah ta. Chatanachata thyu ta, pheisaih sypangawh hyutuhpa hnohta abei lâ cha zu ta.

¹⁶ Elaizâh ta abei hnohta, “Abeipa ta hetana heta a tah: ‘A bie a saohiah awpa Khazohpa Izarei râh liata a y khao leipa ma a châ haw? Khazia Ekaraw khih khazoh Bâlâzebu a saohiah awpa ta lyuhchâpazy na tua? Chavâta rakhô na kiapa tawhta chô khao aw va chi, na thi tlai aw,’” tah ta.

¹⁷ Elaizâh reipa Abeipa bie hawhta, Bei Ahazia cha thi ha ta. Sawchapaw a hnei leipa vâta Zehôrâ ta ano su liata â bei. Zehôsaphâ sawchapawpa Zudâh bei Zehôrâ abeina kô nona liata Izarei bei Zehôrâ â bei pathao.

¹⁸ Ahazia hmotaopa thâtih hropazy cha Izarei beizy thâtih rona châbu liata ropa a châ.