1 ZAWHÂNA 5 - Mara Bible RV (BSI)

Khizaw pahniena

¹ Ahy rai Zisu cha Krista a châ tahpa a ngiapâpa maih cha Khazohpa sapa châ ta, ahy rai a satuhpa kyh a pachâpa cha a sapa chhao kyh a pachâ.

² Khazohpa kyhpachâ pi ta, a biepiepazy eima zyhpa liana heta, Khazohpa sawzy kyh eima pachâ tahpa eima pahno.

³ A biepiepazy eima zyhpa he Khazohpa kyh eima pachâna cha a châ. A biepiepazy cha a hri tlôh lei khâh ta.

⁴ Khazohpa sapa maihta khizaw ama tiah tyh. He he khizaw pahniepa ta eima tiahna cha a châ, eimâ ngiapâna hih.

⁵ Zisu he Khazohpa Sawchapawpa a châ tahpa a ngiapâtuhpa dei leipa ta cha, ahy ma khizaw a tiah thei tly?

Sawchapawpa pahnokheina

⁶ Zisu Krista cha ti nata thisaih ta a vypa châ ta, ti dei ta châ leipa ta, ti nata thisaih ta â vy. Thlahpa cha biehmeiseihpa a châpa vâta, Thlahpa ta ano cha a pahnokhei.

⁷ Pahnokheituhpa pathôh ama y.

⁸ Chazy cha Thlahpa nata ti nata thisaih zy châ ei ta, ama pathôh ta amâ paraoh.

⁹ Chyhsa pahnokheina hmah eimâ pyh khiahta cha, Khazohpa pahnokheina cha a rônah via. Cha cha a Sawchapawpa kyh liata Khazohpa pahnokheina a châ.

¹⁰ Khazohpa Sawchapawpa a ngiapâpa maih ano liata a pahnona a hnei. Khazohpa a ngiapâ leipa deikua cha, Khazohpa ta a Sawchapawpa a pahnokheina â ngiapâ leipa vâta, Khazohpa cha a haihpa ta a tao.

¹¹ Pahnokheina cha he he a châ: Khazohpa ta chhâzaw hrona miah pie ta, cha hrona cha a Sawchapawpa liata a y.

¹² Sawchapawpa a hneipa maihta hrona hnei ta, Khazohpa Sawchapawpa a hnei leipa cha hrona hnei vei.

Chhâzaw hrona pahnona

¹³ Chhâzaw hrona nama hnei tahpa nama pahno thei nawpa ta, nâmo, Khazohpa Sawchapawpa moh a ngiapâtuhpazy hnohta, he biezy he ei roh.

¹⁴ He he ano liata eima thlalôhna a châ: Khâpa rai a khozie hawhta eima hiah khiahta cha, miah a nathlie tyh.

¹⁵ Eima hiapa maih miah a nathlie tahpa eima pahno khiahta cha, ano lâta eima hmo hiapa cha eima hmô haw tahpa eima pahno.

¹⁶ Chyhsa ta thina taih a châ leipa moleina a unawhpa taopa a hmô khiahta cha, thlah a chhâpa awpa a châ. Chatanachata thina taih a châ leipa moleina a taotuhpazy cha Khazohpa ta hrona a pie aw ei. Thina taih a châpa moleina y ta, cha hawhpa châta thlahchhâpa awpa ei tahpa châ vei.

¹⁷ Paraona zydua cha moleina châ ta, thina taih a châ leipa moleina a y hra.

¹⁸ Khazohpa sapa maihta molei ngâ thlâh ha veih ei tahpa eima pahno. Khazohpa sapa a châna ta ano cha hrôbieh ta, Sâtâ ta hria thei vei.

¹⁹ Keimo cha Khazohpa tawhtapa châ pi ta, khizaw pôhpalôhpa he Sâtâ rei sai ta a y tahpa eima pahno.

²⁰ A hmeiseihpa cha ahy ma a châ tahpa eima pahno thei nawpa ta, Khazohpa Sawchapawpa cha a vy ta, novâhna miah a pie tahpa eima pahno. Keimo cha a hmeiseihpa, a Sawchapawpa Zisu Krista liata a ypazy eima châ. Ano cha Khazohpa hmeiseihpa châ ta, chhâzaw hrona a châ.

²¹ Sawzy saih u, khazoh nothlahpa tawhta a panano teh u.