1 ZAWHÂNA 2 - Mara Bible RV (BSI)

Krista miah reikheituhpa

¹ Ei saw saih u, nama molei lei nawpa ta, he biezy he nâmo lâ ei vaw roh. Chatanachôta chyhsa ta a molei khiahta cha, Paw lâta miah reikheituhpa mosiapa Zisu Krista eima hnei.

² Ano cha eima moleinazy reihpha cheina châ ta, keimo moleina dei châ leipa ta, khizaw zydua moleina reihpha cheina chhao a châ.

³ A biepiepazy eima zyh khiahta cha, ano pahnotuhpazy eima châ tahpa eima pahno.

⁴ A biepiepazy zyh tlôh leipa ta, “Ano ei pahno,” a tahtuhpa cha a haihpa a châ. Biehmeiseihpa ano liata y vei.

⁵ A bie a zyhpa deikua cha, Khazohpa kyhpachâna cha ano liata a paki hmeiseihpa a châ. He liana heta ano liata eima y tahpa eima pahno:

⁶ Ano liata ei y a tahtuhpa cha, ano hrozie hawhta a hroh hra awpa a châ.

Biepie thiehpa

⁷ Kho ngaitapa saih u, biepie thiehpa nâmo lâ vaw roh leipa na ta, biepie parohpa, kha hlâ tawhta nama hneipa kha tlao ei vaw roh. Cha biepie parohpa cha, bie nama thei hapa kha a châ.

⁸ Kao kha lâ tawhta la, biepie thiehpa nâmo lâ a vaw rohpa ei châna kao a y. Cha cha ano liata nata nâmo liata â do, zohna cha lei hai ta, khaihna hmeiseihpa a vaw khaih hapa vâta.

⁹ Khaihna liata a ypa hawhta a reih tlôh ta, a unawhpa a haopa cha, zohna liata a y thlâh ha chy.

¹⁰ A unawhpa kyh a pachâtuhpa cha khaihna liata a ypa châ ta, a hluah aw vei.

¹¹ A unawhpa, a haotuhpa deikua cha zohna liata y ta, zohna liata a charei. Zohna ta a mo a pachaosapa vâta khataih lâ ma a sie tahpa chhao pahno vei.

¹² Sawzy saih u, ano moh ta nama moleinazy a ngiahthaipa a châpa vâta, nâmo lâ ei vaw roh.

¹³ Pawzy saih u, âthaona tawhta a y thlâhpa ano cha nama pahnopa vâta, nâmo lâ ei vaw roh. Satliazy saih u, moleina nama tiah hapa vâta, nâmo lâ ei vaw roh. Sawzy saih u, Paw nama pahnopa vâta, nâmo lâ ei vaw roh.

¹⁴ Pawzy saih u, âthaona tawhta a y thlâhpa ano cha nama pahnopa vâta, nâmo lâ ei vaw roh. Satliazy saih u, nama thatlô ta, Khazohpa bie nâmo liata y ta, moleipa nama tiah hapa vâta, nâmo lâ ei vaw roh.

Khizaw kyhpachâ lei awpa

¹⁵ Khizaw he kyhpachâ leipa u la, khizaw liata hmo a ypazy kyhpachâ hra khah u. Chyhsa ta khizaw kyh a pachâ khiahta cha, Paw kyhpachâna ano liata y vei.

¹⁶ Khizaw liata hmo a ypa zydua, sapa aohraohna, mokhaoh aohraohna nata hro chhôh hneirôna a palaikheina zy he Paw tawhta a puapa châ leipa ta, khizaw tawhta a puapa a châ.

¹⁷ Khizaw he a aohraohna chhaota a leidia hai. Khazohpa khopa a taotuhpa deikua cha, chhâzaw ta a y thlâh ha aw.

Krista dyuhtuhpa

¹⁸ Sawzy saih u, daihti hnôhchaipa a châ haw. Krista dyuhtuhpa â vy aw tahpa nama theipa hawhna khata, tahmâ chhao Krista dyuhtuhpa hluhpi ama vaw pua haw. Chavâta daihti hnôhchaipa a châ haw tahpa eima pahno.

¹⁹ Âmo cha eima hry tawhta pua ei ta, châhrasala eima chyhsa hmeiseihpa châ veih ei. Eima chyhsa hmeiseihpa châ ei sala, eima hnohta ama y lymâ aw. Châhrasala ama zydua ta eima chyhsa hmeiseihpa châ veih ei tahpa a lâ pasia nawpa ta, miah ama puasai haw.

²⁰ Nâmo deikua la, Mo Pathaihpa ta sathaw a thupa châ ei chi ta, nama zydua ta biehmeiseihpa nama pahno.

²¹ Biehmeiseihpa nama pahno leipa vâta, nâmo lâ châ a vaw rohpa châ leipa na ta, biehmeiseihpa pahno ei chi ta, biehmeiseihpa tawhta haipa a pua beih leipa vâta ei vaw ropa a châ.

²² Zisu cha Krista a châ tahpa a pyh leipa hleikhô ta a haihpa ahy ma a y? Paw nata Sawchapawpa a pyh leipa cha Krista dyuhtuhpa a châ.

²³ Sawchapawpa a pyh leipa cha Paw hnei vei. Sawchapawpa a pyhpa cha Paw chhao a hnei.

²⁴ Nâmo la, âthaona tawhta nama pahnopa kha, nama palôh liata y thlâh ha mawh sy. Âthaona tawhta nama pahnopa kha nama palôh liata a y thlâh ha khiahta cha, nâmo chhao Sawchapawpa nata Paw liata nama y thlâh ha aw.

²⁵ Chhâzaw hrona to awpa ta ano tlai ta bie miah â taih.

²⁶ Cha paviasa a chhuahpazy vâta, chazy cha nâmo lâ ei vaw roh.

²⁷ Nâmo la, ano tawhta sathawthuna nama hmôpa kha nâmo liata y thlâh ha ta, ahy hmah pachu a ngiah veih ei chi. A sathawthuna ta kyh toti cha pachu ei ta, cha cha a do ta, haipa bie châ vei. A sathawthuna ta a cha pachupa hawhna ei khata, ano liata y thlâh ha teh u.

Khazohpa sawzy

²⁸ Chavâta sawzy saih u, ano liata y thlâh ha muh vy. Chatanachata â vaw luah tita hnangâhpa ta y aw pi ta, â vy tita a hmiakô liata noza leipa ta eima y thei aw.

²⁹ Ano cha mosiapa a châ tahpa nama pahno khiahta cha, siana a hrokheipa maih cha ano sapa a châ tahpa nama pahno aw.