1 TIMAWTHY 6 - Mara Bible RV (BSI)

Sôh kyh liata karâypa pha vei

¹ Khazohpa moh nata a pachunazy reipachhiepa ta a y lei nawpa ta, sei raopaky a kypazy ta ama zibeipazy cha za tlâhpa ta ama pachâ awpa a châ.

² Ngiapâtuhpa zibeipa a hneipazy ta, Krista liata unawh ama châpa vâta, ama zibeipazy ama hno awpa châ leipa ta, ama chakaona a thôhkheituhpazy cha ngiapâtuhpa nata kho ngaitapazy ama châpa vâta, a pha viapa ta ama chakao rili awpa a châ. He biezy he pachu la pasyu mah y.

³ Ahy rai biezyhpa hropa pachupa ta, eima Beipa Zisu Krista biedopa nata Khazohpa khozie hawhta hroh awpa pachunazy â pyh vei khiahta cha,

⁴ apalaina ta a biepa châ ta, khâpa hmah a pahno leipa a châ. Aeichhiana nata ahryusina a y thei awpa biezy hrukhei ei ta, chazy chata uahvana, atudaina, reipachhiena nata ngâleina hmo pha leipazy a paysa tyh.

⁵ Chyhsa nata chyhsa likah liata bie pha leipa a tu tyhpa châ ei ta, cha hawhpa chyhsazy cha palôh chhiepa, biehmeiseihpa liata a duah leipa, Khazohpa lâ hmo pachâpa cha athôhna khiah ma a tahpazy ama châ.

⁶ Khazohpa khozie hawhta hroh ta, hneipa rakha liata palôhtlâh a paohpa he athôhna rônahpa a châ.

⁷ Khizaw liata khâpa hmah a ngiakhei leipa pi ta, khizaw tawhta khâpa hmah puakhei thei hra ma pi.

⁸ Nie awpa nata chysia a tao awpa eima hnei khiahta cha, chazy liana chata palôhtlâh a paoh ei suh u.

⁹ Hneirôh a chhuahpazy ta reipasaona liata a ngia ei ta, khoheih liata amâ ao tyh. Âmo a parao thei awpa hmozy khoh ei ta, hru kawpa ta hmo taopa ta, ama pao tyh. Hneirôh khona ta chyhsazy cha raona nata leidiana liata a pamôh tyh ei.

¹⁰ Tâkâ sôh kyh liata karâyna cha moleina to thabypa a châ. Thokha sôh tlaichhaina vâta ngiapâna paviasai ei ta, pachârôhna hluhpi taopa ta, âmosasyh amâ pasasa tyh.

Ngiapâna ta adyuhna phapa

¹¹ Nâ, Khazohpa chyhsa y, cha hmozy cha a râsai la, siana, Khazohpa pachâna, ngiapâna, kyhpachâna, daotheina nata nônaina zy a chadai lymâ mah y.

¹² Ngiapâna ta adyuhna phapa a dyuh la, chhâzaw hrona patu mah y. Cha cha to awpa ta awpa châ chi ta, pahnotuhpa hluhpi hmiakô liata a phapa ta nâ duakheipa kha a châ.

¹³ Hmo to hrona a pietuhpa Khazohpa nata Pawtia Pilâ hmiakô liata biedopa a duakheituhpa Krista Zisu mohmô liata bie ei cha pie.

¹⁴ Eima Beipa Zisu Krista â vaw luah heih hlâlei cha, biepiepa kha apuapa kiah leipa nata seina hnei leipa ta zyh mah y.

¹⁵ Reithai tlâh Khazohpa nata ato chô liata biehneituhpa a y chhôhpa, beizy Beipa nata zibeizy Zibeipa ta eima Beipa Zisu Krista cha a daihtita liata a vaw paluahsa aw.

¹⁶ Ano deita cha thi thei leina hnei ta, khaihpa a hnia thei rimâ leipa liata a pahrâ. Ano cha ahy hmah hmô beih leipa nata hmô thei leipa a châ. Khazohpa hnohta palyupalihna nata hmotaotheina chhâzaw ta y mawh sy. Amen.

¹⁷ He khizaw liata hneirôhpazy cha a palai lei awpa nata a leidia theipa sôh nata piah liata ama hnabeiseihna pachhô leipa ta, eimâ ly nawpa ta ato miah pietuhpa Khazohpa liata ama hnabeiseihna tlao pachhô awpa ta biepie mah y.

¹⁸ Hmopha ama tao awpa châ ta, hmopha taona liata hneirôhpa ta, riaphapa ta, ama hneina mohropazy amâ chhaih hra awpa a châ.

¹⁹ Chatanachata daihti vaw tlô awpa liata ama ryuto châta lôbô phapa a bô aw ei ta, hrona hmeiseihpa cha ama patu thei aw.

²⁰ Hy Timawthy, na mohôh awpa ta nâ liata pavaosapa kha a phapa ta vaih mah y. Â doleipa ta “pahnona” ama tahpa Khazohpa a hlao leipa bie sisaw leipa reipa nata saizie a lyu leipa hmozy liata aeichhianazy a hneisai tyh mah y.

²¹ Cha cha thokhazy ta zi ei ta, ngiapâna ama paviasai haw. Ngiachhiena na hnohta y mawh sy.