1 TIMAWTHY 5 - Mara Bible RV (BSI)

Awnanopa liata azaona

¹ Pawhrâhpa cha ra leipa la, paw hawhta pasyu la, chapaw thyutliazy cha unawhzy hawhta moh mah y.

² Nôhrâhpazy nô hawhta moh la, chanô thyutliazy cha sietanôzy hawhta pathaih kawpa ta moh mah y.

³ Nôhmei hmeiseihpazy cha za mah y.

⁴ Châhrasala nôhmei cha sawzy tlyma, samohzy tlyma a hnei khiahta cha, Khazohpa chyhsa ama châna cha ama chhôhkha liata palâsa ei sala, ama nôpawzy chyh awpa ta a chu tua mawh ei sy. Cha cha Khazohpa alynazie a châ.

⁵ Nôhmei hmeiseihpa, ano dei ta a ypa cha, Khazohpa chô liata hnabeiseihna a sohpa châ ta, chhô nah zâ ta hiapa nata thlahchhâpa ta a y tyh.

⁶ Sapa lôhrâtlôna châta a hrohpa nôhmei deikua cha, a hroh thlâhpa chhao ta a thipa a châ.

⁷ Seina hnei leipa ta ama y thei nawpa ta, cha biezy cha pie hra mah y.

⁸ Sanawh a chyh leipa chyhsa, a eih pachaipa ta a chhôhkhazy a chyh leipa chyhsa cha, ngiapâna a paphasaipa châ ta, ngiapâleipa hlâ chhao ta a chhie via.

⁹ Nôhmei cha kô sycharu chô lâ chanô châ sala, vahpa pakha dei a vaw hneipa,

¹⁰ a sawzy a mohôhpa, khichhai a pasôpa, mopathaihpazy phei a pasipa, chyhsa nôpopazy a deichhypa nata hmo pha to taona liata a hmâhpa, hmo pha taona kyh liata reithai a hlaopa a châ khiahta cha, nôhmeizy hry liata pahlaopa châ mawh sy.

¹¹ Nôhmei hawti viapazy deikua cha, nôhmei hry liata pahlao khah y. Krista châta amâ piena hlâta ama sapa khona a vaw lai via nahta, vahpa hnei awpa ama khoh tyh.

¹² Amâ ngiapâ tuana ama siesaipa vâta thaileichâpa ta ama y tyh.

¹³ Cha dei châ vei, thathipa ta y ei ta, o to ta amâ khiekhâ tyh. Ama thathipa dei châ leipa ta, chyhsa kyh reih ei ta, biethâhzy taopa ta, rei lei awpazy ama reih tyh.

¹⁴ Chavâta nôhmei hawti viapazy cha, dyhchâ ei sala, sawzy hneipa ta, ama chhôhkhazy mohôh ei sala, sei nawpa rypaohpa khakhaipa hnohta ama pie lei awpa ei khoh.

¹⁵ Tahmâ tlai chhao he thokha cha Sâtâ lâ ama tlei haw.

¹⁶ Ngiapâtuhpa chanô ta sanawh nôhmeizy a hnei khiahta cha, âmo cha ano ta deichhy mawh sy. Awnanopa phao a pahri awpa châ vei. Chatanachata Awnanopa ta nôhmei hmeiseihpazy a deichhy thei aw.

¹⁷ Awnanopa chhituh phapa, a eih pachaipa ta biechhona nata pachuna liata hriapasapazy cha, a lie no ta palyupalih tlâh ama châ.

¹⁸ Biehrai ta, “Viahchao tôhpa ta sâh a tly nota a hmao nama hi awpa châ vei,” tah ta, “Raihriatuhpa cha hlao hmô tlâh a châ,” a tah hra.

¹⁹ Awnanopa chhituhpa leihna cha, pahnotuhpa pano tlyma, pathôh tlyma ama y leipa khiahta cha, nâ pyh awpa châ vei.

²⁰ Moleina taotuhpazy cha, zawpi hmiakô liata chhorei la, chatanachata mohropazy chhao ta ama chi aw.

²¹ He ryhpazy he thailei pachâsa chhieliena y leipa ta, khokhei eih viapa hnei hra leipa ta hmâh awpa ta, Khazohpa nata Krista Zisu nata vâlyuhchâpa atlyhpazy mohmô liata bie ei cha pie.

²² Chyhsa chô liata ku pahnieh awpa ta a para leipa la, mohropazy moleina liata a hlao leipa la, pathaihpa ta y mah y.

²³ Ti deita doh khao leipa la, na pavyhpi châta nata na pasa tyhpa vâta, kresawhti chhao a chyhta do tyh mah y.

²⁴ Chyhsa thokha moleina cha a lâluah ta, ama hmia lâta pachiana lâ sie ta, thokha moleina deikua cha, hnôh lâta â vaw luah tyh.

²⁵ Cha hawhna chata, hmo phapa cha a lâluah ta, a lâ mah leipazy chhao nyu theipa châ vei.