1 TIMAWTHY 4 - Mara Bible RV (BSI)

Paosaina chhochhieliena

¹ Hmialâ daihti vaw tlô awpa liata cha, chyhsa thokhazy ta dôveina thlahpa nata ahripazy pachuna bie zopa ta, ngiapâna ama bâhsai aw tahpa Thlahpa ta a siapa ta a reih.

² Cha hawhpa pachunazy cha phapakheipa haihthaipazy tawhta vaw pua ta, ama chhie nata pha pahnona cha thua sahpa ta pakâ hapa hawhta a châ.

³ Nôvah ahneina pakhâ ei ta, biehmeiseihpa pahnotuhpa nata ngiapâtuhpazy ta alyna bie reina chôta nie awpa Khazohpa ta a taopa niedozy nie lei awpa ta bie ama pie.

⁴ Khazohpa hmotaopa to cha pha ta, alyna bie reina chôta daopa a châ khiahta cha, khâpa hmah dytha awpa châ vei.

⁵ Khazohpa bie nata thlahchhâna ta pathaisa hapa a châ.

Krista chakaotuhpa phapa

⁶ Chazy cha unawhzy na pahnosa khiahta cha, Krista Zisu chakaotuhpa phapa, ngiapâna bie nata biezyhpa phapa pachuna liata a laiseihpa na châ aw.

⁷ Khazohpa nata a zao leipa phôhpa thlâhthlipazy nata nôpipazy biephôh liata pahâh leipa la, Khazohpa chyhsa châ awpa ta nâmasasyh ta a hrie mah y.

⁸ Pôhpa a hriepa he phahnaina rakha hnei ta, Khazohpa chyhsa châna deikua cha, tahmâ hro nata hro a vaw y awpa châta bietai a hneipa a châpa vâta, kyh to liata a phahnai.

⁹ Cha bie cha ngâ a chhih ta, a pyh tlâh a châ ngaita.

¹⁰ Khazohpa hrohpa liata eima hnabeiseihna eima sopa vâta, hriapasa pi ta, eima tei lylia. Ano cha chyhsa zydua Pachhatuhpa châ ta, ano ngiapâtuhpazy Pachhatuhpa a châ pachai.

¹¹ He biezy he pie la, pachu mah y.

¹² Thyutliapa na châpa vâta ahy hmahta cha mohnao khah ei sy. Bie rei kyh liata zy, yzie kyh liata zy, kyhpachâna kyh liata zy, ngiapâna nata pathaihna kyhzy liata ngiapâtuhpazy a mopâ awpa ta tlao y mah y.

¹³ Ei vy hlâlei zawpi hry liata Biehrai reina, pasyuna nata pachuna raizy tiamapa ta vaw hria mah y.

¹⁴ Hmopiepa na hneipa kha uasa leipa ta y khah y. Kha hmopiepa kha, hrohsona bie hawhta, machâzy ta na chô liata ama ku ama pahnieh nota piepa na châ.

¹⁵ Chyhsa zydua ta na hmasiena ama hmô thei nawpa ta, hmopiepazy cha hmâh la, cha chakaona liata a hmâh khai mah y.

¹⁶ Na hro nata na pachuna biezy a phapa ta vaih mah y. Cha hawhta na tao khiahta cha, nâ nata na bie a theituhpazy na pachha aw ei.