1 TIMAWTHY 3 - Mara Bible RV (BSI)

Awnanopa chhituhpa tlohna

¹ Ahy rai Awnanopa chhituhpa châ awpa a khoh khiahta cha, raihria phapa a khoh, tahpa cha bie ngâ tlâhpa a châ.

² Awnanopa chhituhpa cha seina hnei leipa, lapinô pakha a hneipa, a sohsi theipa, sasyh a vao pahniepa, zachhihpa, chyhsa papyupahly a thaipa, a pachu theipa,

³ kresawhti pari hmâh leipa, thachahra hmâh leipa chyhsa nônaipa, ahryuchhiana a tao leipa nata tâkâ sôh liata karâ y leipa a châ awpa a châ.

⁴ A chhôhkha khihsatôhtu a phapa ta mohôh thei ta, a sawzy ta zapa ta a rei amâ ngiahpa a châ awpa a châ.

⁵ Ano chhôhkha khihsatôhtuna hmahta a phapa ta a mohôh thei vei khiahta cha, kheihta ma Khazohpa Awnanopa cha a mohôh thei aw?

⁶ Ngiapâ thiehpa chyhsa a châ awpa châ vei. Chataleipatala a palai aw ta, ahripa thailei pachâsana liata a pao pathlei aw.

⁷ Cha dei châ vei, khôtho chyhsazy lia chhao ta moh phapa a châ awpa a châ. Chataleipatala reipachhiepa ta y aw ta, ahripa khoheih liata â ao pathlei aw.

Chakaotuhpa tlohna

⁸ Cha hawhna chata chakaotuhpazy chhao chyhsa zachhihpa, haipa bie a reih leipa, kresawhti parâ leipa nata avyuhna ta athôhna a tlua leipa ama châ awpa a châ.

⁹ Chhie nata pha pahnona pathaihpa hmâpa ta, ngiapâna bienyupa khâchâ a patupa ama châ awpa a châ.

¹⁰ Pasiapa châ tua ei sala, seina hnei leipa ama châ khiahta cha, chakaotuhpa rai cha hria mawh ei sy.

¹¹ Cha hawhna chata chanôzy chhao chyhsa zachhihpa, chyhsa kyh a reih leipa, a sohsi theipa nata ato liata ngâchhihpa ama châ awpa a châ.

¹² Chakaotuhpazy cha lapinô pakha dei a hneipa ama châ awpa châ ta, ama sawzy nata ama chhôhkha khihsatôhtuna a phapa ta mohôh theipa ama châ awpa a châ.

¹³ Chakaona rai a phapa ta a hriapa chakaotuhpazy cha, moh phana to aw ei ta, Krista Zisu ngiapâna kyh liata riahphana thata ama hnei aw.

Zyhna bienyupa

¹⁴ Nâ lâ a vy patoh awpa ei chhuah. He hmozy kyh liata châpaphaopa ei vaw rona chhâpa deikua cha,

¹⁵ vaw hawh pathlei mawh sah la, Khazohpa chhôhkha liata kheihta y awpa ma a châ tahpa na pahno thei nawpa ta ei vaw ropa a châ. Khazohpa chhôhkha cha Khazohpa hrohpa Awnanopa châ ta, cha cha bie hmeiseihpa tôh nata abôna a châ.

¹⁶ Khazohpa pahnona bienyupa cha a rônah ngaita, reipasipasua awpa y vei: Sapa ta a vaw luah ta, Thlahpa ta thai pachâsa ta, Vâlyuhchâpazy ta ama hmô. Phopizy hry liata phuahpa châ ta, Khizaw ta a ngiapâ ta, Rônahpa ta chô lâ a chhipa a châ.