1 TIMAWTHY 2 - Mara Bible RV (BSI)

Achhyna siekheizie

¹ A hmiatua ta, hmo hiapa thlahchhânazy, thlahchhâna sôpipazy, chyhsa châta thlahchhâna nata alyna bie reina thlahchhânazy chyhsa zydua châta tao awpa ta ei châ haw ei.

² Thlalôhpa nata chhôhmohpa ta ypa ta, Khazohpa a pachâpa nata zachhihpazy eima châ lymâ thei nawpa ta, beizy nata biehneituhpa zydua châta thlahchhâ tyh awpa ta ei châ haw ei.

³ Cha cha miah Pachhatuhpa Khazohpa mohmô ta pha ta, â lyzie a châ.

⁴ Khazohpa ta chyhsa zydua pachha ama châ khai awpa nata biehmeiseihpa ama pahno khai awpa a khoh.

⁵ Khazohpa cha pakha deita y ta, Khazohpa nata chyhsazy likah liata lyuhchâpa pakha deita a y. Ano cha chyhsapa ta a pihpa Krista Zisu a châ.

⁶ Krista Zisu cha chyhsa zydua chatlai nawpa ta anosasyh ta a pie ta, a daihtita liata chatlaina bie a phuah haw.

⁷ Cha châna chata biechhotuhpa nata lyuhchâpa ta raopa châ na ta, biehmeiseihpa nata ngiapâna kyh liata Zenitaizy pachutuhpa ta raopa ei châ. Biedopa ei reih, haih va na.

⁸ Chapawzy cha su to liata ku pathaihpa avâ lâ pazawhpa ta, hiehâh leipa nata a eichhia leipa ta thlah ama chhâ tyh awpa ei khoh.

⁹ Cha hawhna chata chanôzy chhao â daihpa rakha ta a tobiepa ta, mongiapa nata zachhihpa ta y ei sala ei khoh. Sâ phiehpa ta tlyma, ngôh ta tlyma, taikulô ta tlyma, chysia mâ rupa ta tlyma a tobi leipa ta,

¹⁰ Khazohpa a uasapa chanôzy châta a tobi awpa rakhapa ta a tobipa ta, hmo pha taopa ta tlao amâ tobi awpa ei khoh.

¹¹ Chanô cha reingiahpa nata a chalihpa ta a chu mawh sy.

¹² Chanô ta a pachu awpa tlyma, chapaw chô liata bie a hnei awpa tlyma pasaih va na. A chalihpa ta a y awpa tlao a châ.

¹³ Âdâh kha tao tuapa châ ta, cha hnôhlâ ta Evâ kha taopa a châ.

¹⁴ Âdâh kha dôpa ta y leipa ta, chanô kha dôpa ta y ta, paraona liata a paopa kha a châ.

¹⁵ Châhrasala ngiapâna nata kyhpachâna nata pathaihna hneipa ta, hrozie ngiapa ta ama hroh khiahta cha, saw sana vâta pachhapa ama châ aw.