1 THYSALAWNIKA 5 - Mara Bible RV (BSI)

Abeipa Noh

¹ Châhrasala unawh saih u, a daihti nata nohzy kyh ropa awpa a ngiah veih ei chi.

² Abeipa Noh cha zâ ta parutuhpa hawhta a vaw tlô aw tahpa nâmo tlai ta a sia kawpa ta nama pahno.

³ Chyhsazy ta, “Thlalôhna nata abohna,” tahpa ta ama rei hai nota, chanô saw zeihpa hawhta eikhapi ta leidiana ama chô liata vaw tlô aw ta, khôkhâh cheita aw veih ei.

⁴ Châhrasala unawh saih u, cha noh liata parutuhpa hawhta pachhai awpa ta, nâmo la zohna liata y veih ei chi.

⁵ Nama zydua ta khaihna sawzy nata noh sawzy nama châ. Zâ chyhsa châ leipa pi ta, zohna liata a ypa châ hra ma pi.

⁶ Chavâta mohropazy hawhta a mô leipa ta, a hra sih la, palôh pasohpa ta y ei suh u.

⁷ A môpazy cha zâ ta a mô tyh ei ta, sahma paripazy chhao zâ ta ama pari tyh.

⁸ Keimo deikua cha, noh chyhsazy eima châpa vâta, ngiapâna nata kyhpachâna chachôhna vyhphao a kypa ta, pachhana hnabeiseihna lakhu a khu sih la, palôh pasohpa ta y suh u.

⁹ Khazohpa ta hiehâhna pasa tao awpa ta miah rao leipa ta, eima Beipa Zisu Krista zawhzi ta pachhana hmô awpa ta tlao miah a rao.

¹⁰ Eimâ hrapa chhao ta, eimâ môpa chhao ta, a hnohta eima hro thei nawpa ta, Krista cha keimo châta a thipa a châ.

¹¹ Chavâta nama tao tyhpa hawhta, a pasyu raihrie u la, tha a patlô raihrie tyh muh vy.

Pachuna chhâna nata byhnâ awna

¹² Unawh saih u, nama hry liata hriapasapazy nata Abeipa liata nama hyutuhpazy nata châ chhoreituhpazy za awpa ta eima châ haw.

¹³ Ama raihria vâta kyhpachâ ta pasô ngaita awpa ta eima châ haw hra. Adyryhpa ta y teh u.

¹⁴ Unawh saih u, thathipazy chhorei u la, palôh chhâpazy thapatlôpa ta, chiehleipazy bao u la, chyhsa zydua chô liata nôpha awpa ta eima châ haw.

¹⁵ Moleina cha moleina ta viarithô leipa u la, hmopha a taopa raihriepa ta, chyhsa to chô liata hmopha tao teh u.

¹⁶ Khâ a ly u la,

¹⁷ bâh leipa ta thlahchhâ u la,

¹⁸ kyh to liata alyna bie reih teh u. Cha cha nama châta Krista Zisu liata Khazohpa khozie a châ.

¹⁹ Thlahpa cha pachhai khuh vy.

²⁰ Hrohsona biezy mohnao leipa u la,

²¹ ato pasiapa ta, a phapa maih a pyh u la,

²² moleina chi to a heihsai teh u.

²³ Thlalôhna Khazohpa ta tlokhuh cha pathaisa ei sala, nama thlahpa, nama pathipalôh nata nama pôhpa cha, eima Beipa Zisu Krista â vy tita, seina hnei leipa ta cha paysa mawh ei sy.

²⁴ Châ awtuhpa ei cha ngâ a chhih ta, cha cha a tao tlai aw.

²⁵ Unawh saih u, thlah miah chhâpa teh u.

²⁶ Unawh zydua kha apahnâna pathaihpa ta miah a naohpa muh vy.

²⁷ He châpaphaopa he unawh zydua hnohta rei awpa ta, Abeipa moh ta bie ei cha pie ei.

²⁸ Eima Beipa Zisu Krista ngiachhiena cha nama hnohta y mawh sy.