1 THYSALAWNIKA 4 - Mara Bible RV (BSI)

Khazohpa palysana hro

¹ Unawh saih u, achhâna liata cha, nama yzie awpa nata Khazohpa nama palysa nawpa kyh liata, keimo tawhta nama daopa, nama tao lymâpa kha tao via lymâ awpa ta Abeipa Zisu moh ta eima châ haw.

² Abeipa Zisu biehneina hmâpa ta biepiepa eima cha piepazy kha nama pahno.

³ Nama pathaih awpa he Khazohpa khozie a châ. Apatlana moleina bâhsai ha muh vy.

⁴ Nama pôhpa cha pathaihpa nata zachhihpa châ awpa ta a vao pahniezie nama pahno chyu awpa a châ.

⁵ Khazohpa a pahno leipa Zenitaizy hawhta parâna liata a hmâh khuh vy.

⁶ He kyh liata ahy hmah a unawhpa chô liata moleipa ta hmopha leipa a tao awpa châ vei. Cha chho chhielie ha pi ta, a phapa ta zikyu eima châ râ hapa hawhta, Abeipa cha, cha hawhpa hmo a taotuhpa zydua chô liata phuh latuhpa a châ.

⁷ Apuapa ta y awpa ta Khazohpa ta miah aw leipa ta, pathaih awpa ta miah a aw.

⁸ Chavâta he hmo a papeisa leituhpa cha, chyhsa a papeisa leipa châ leipa ta, a Thlahpa Pathaihpa miah pietuhpa Khazohpa a papeisa leipa a châ.

⁹ Unawhzy kyhpachâna kyh liata, nama hnohta châpaphaopa ei ro awpa a ngiah veih ei chi. Kyh a pachâ raihrie awpa ta Khazohpa ta a cha pachu ei.

¹⁰ Cha tlai cha Mâsidônia râh liata unawh zydua chô liata nama taopa kha a châ. Châhrasala unawh saih u, kyhpachâna rai hria via lymâ awpa ta eima châ haw.

¹¹ Eima cha chho hapa hawhta, a chalihpa ta hro a chhuah u la, nama rai chyu hriapa ta, nama ku tlai ta hria a chhuah teh u.

¹² Chatanachata khôtho chyhsazy hmiakô liata zachhihna hlao aw ei chi ta, ahy hmah a ngâchhâ aw veih ei chi.

Abeipa avyna

¹³ Unawh saih u, hnabeiseihna rai a hnei leipa mohropazy hawhta nama pachâ a rôh lei nawpa ta, a môpazy thâtih nama pahno lei awpa khoh ma pi.

¹⁴ Zisu thi ta a thyu heihpa eimâ ngiapâpa vâta, Zisu liata a môpazy cha Khazohpa ta ano hnohta â vaw chhi aw ei tahpa eimâ ngiapâ.

¹⁵ Cha cha Abeipa bie tawhta nama hnohta eima reipa kha a châ. Keimo Abeipa â vyna taihta ahrohpa ta a ypazy pi heta, a môpazy cha chhao cheita aw ma pi.

¹⁶ Abeipa cha rahaopa nata vâlyuhchâpa chônôchaipa ao nata Khazohpa chiahmie pyu chhaota avâ tawhta za chô aw ta, Krista liata athipazy cha ama thyu tua aw.

¹⁷ Cha hnôhlâ ta keimo ahrohpa ta a ypazy pi he, avâ ruapa meihdozy hry liana khita Abeipa dy awpa ta ama hnohta lapa châ aw pi ta, chhâzaw ta Abeipa hnohta eima y ha aw.

¹⁸ Chavâta cha biezy chata thlah a palôh raihrie teh u.